Тталат кьини ДР-лул Культуралул министерствалий хьунни Культуралул шинан хас бувсса конкурсирдай ххув хьусса магьирлугърал зузалтрансса премияртту дуллалисса шадлугъ. Муний гьуртту хьунни конкурсирдал жюрилул члентал, магьирлугърал ишккаккулт.
Зулайхат Тахакьаева
Культуралул министр Зарема Буттаевал барча бунни премиярттан лайкь хьуми, барчаллагь увкунни миннахь
республикалул магьирлугъ хьхьичIуннай дан бувсса творчествалул захIматрахлу. Бувсунни конкурсру бувшиву ДР-лул ХIукуматрал хIукмулийн бувну цIакь дурсса «Развитие культуры Республики Дагестан на 2014-2018гг.» ва мукунма гьунар бусса инсантуран кьимат бишлашисса конкурсру бан дакIний бушиву Литературалул шиналгу.
Музыкалул ва театрданул магьирлугърал аралуву учредить дурну дия Аьрасатнал лайкь хьусса артистка Барият Мурадовал цIанийсса 3 премия «За лучшую женскую роль», актриса ниттил бувну 100 шин там шаврил юбилейран хасну. Миннува ца премия ларсунни Лакрал театрданул актриса, Дагъусттаннал лайкь хьусса артистка Саният Рамазановал «Ханума» спектакльданувусса Ханумал рольданухлу.
Академический балай учаврил аралуву учредить дурну дия РСФСР-данул халкьуннал артистка Исбат Баталбековал цIанийсса премия; эстрадалул ва джазрал балай учаврил аралуву – Сергей Агабабовлул цIанийсса премия.
Культуралул министерствалул баян бувну бия республикалул конкурсру: хьхьичIунсса драматургиялул произведение, хьхьичIунсса концертрал журалийсса пьеса ва Ватандалухасса балай.
Вай конкурсру бакъассагу, баян бувну бия чIурду булаврил кьяйдалийсса конкурсругу. «Вокально-инструментальное произведение» номинациялуву 1-мур кIану бугьан лайкь хьунни Адаллол шеърирдан Ширвани Чаллаевлул чивчусса «Не спят обелиски» тIисса произведение. Ширвани Чаллаев цува Москавлив уну, премия дуллуна душнихьхьун Марияннухьхьун.
ДакIнийхтуну барча буллай буру Ширвани Чаллаев ва Саният Рамазанова. ЧIа тIий буру гихунмайгу тIайлабацIуртту.
