Февральданул 3-нний Аьрасатнал ХIукуматрал къатраву, вице-премьер Александр Хлопониннул каялувшиврулу, хьунни Дарбантуллан 2000 шин шаврил шадлугъирттайн хIадур шаврил сакиншинналул комитетрал заседание.

Заседаниялий гьуртту хьунни АьФ-лул СКФО-рал иширттал министр Лев Кузнецов, АьФ-лул Президентнал СКФО-райсса вакил Сергей Меликов, Дагъус­ттаннал БакIчи Рамазан АьбдуллатIипов, ДР-лул ХIукуматрал Председатель Аьбдуссамад ХIамидов, Дарбантуллал БакIчи Имам Яралиев ва цаймигу.
Александр Хлопониннул бувсунни, 2014 шинал сентябрьданий Аьрасатнал ХIукуматрал Председатель Дмитрий Медведевлул тапшур бувну бивкIшиву 2014-2015 шиннардий Дагъусттаннан федерал бюджетравату сайки 600 млн. къуруширттал итабакьин, паркру ххуй бан, кучарду бакьин бан ва цаймигу давурттан. Юбилейрайн чил билаятирттал делегациярдугу бучIан тIий бур, мунияту вице-премьернал ккаккан бунни миннал мюхчаншиву дуруччин шадлугъир­ттал гьантрай. Дарбантуллан 2000 шин шаврийн хIадур шаврил хIакъиравусса доклад бунни АьФ-лул Президентнал СКФО-райсса вакил Сергей Меликовлул. Ганал бувсмунийн бувну, 2014 шинал сентябрьданий сакин бувну бивкIссар зузи группа, миннавух бивкIссар вакилханалул зузалтгу. Зузи группалул цалчинсса батIаврийва ккаккан бувну бивкIссар ца Дарбантуллан бакъасса, щалва Дагъус­ттаннангу агьамсса мяъна дусса «цIуцIи кIанттурду». С. Меликовлул мукунма бувсунни юбилей хIадур дансса арцу диялну дакъашиву. Му информация ччясса мутталий кьамулгу бувссар, мунил хIакъираву хIукуматрал хIукмурдугу хьуссар.
«Ца нюжмардул хьхьичI Дарбантлив хьуссар зузи группалул батIаву, жун бувчIунни хIакьинусса кьини жу хIадурну бакъашиву ми арцу цила ххуллий харж дан. Аьркинни тIайла дацIан дан юбилейрайн хIадур шаврил план ва цурда байран 2015 шинал сентябрьданий давугу. Мунийн бувну, жул вариант укунсса дур. Цалсса гьашину дуван шадлугъру шагьрулул даражалий. Яла, Дагъусттаннал БакIчинал Аьрасатнал Президентнайн­сса обращениялийн бувну, Дарбантуллал социал структура ххуй баврин хасъсса давуртту лахъи лаган дуван, арцурду федерал ва республикалул бюджетирттава тIалав дурну», — увкунни полпреднал.
Рамазан АьбдуллатIиповлул мукъур­ттийн бувну, юбилейрал шадлугъру даврил масъалартту, давуртту дачIин аьркинни ведомстварттайх, гьарца министерствалул ведомствалул, республикалул, федерал центрданул ци дуллантIиссарив кIулну бикIаншиврул.
Аьбдуссамад ХIамидовлул бувсунни Дарбант юбилейрайн хIадур шаврин хасну дурсса давурттаяту, лирчIми давурттаяту.
Заседаниялия махъ Рамазан Аьбду­л­латIиповлул жавабру дуллунни журналистътурал суаллахьхьун.
Республикалул каялувчинал му­къур­ттийн бувну, Аьрасатнал Президент Владимир Путиннул махънин ларсунни шадлугъру даврил чIун — 2017 шинал байранну дуллантIиссар, Дарбантлив дакъасса, Дагъусттаннал цаймигу шагьрурдай ва районнай. Мукунна шадлугъру дантIиссар Франциянавугу.
ХIадур бувссар ХI. Аьдиловлул