СМИ-рдал «хIарачатрайн» бувну бикIу, цайми-цайми сававрттайн бувну бикIу, щала Аьрасатнавугу, цайми билаятирттайгу щала къаххуйсса чулуха машгьурну бунугу махъсса шиннардий жулва Дагъусттан, жучIанма чил билаятирттая ва Аьрасатнал хъуншагьрулия гастроллай бучIан сисласисса балайчитал, артистал чан бакъар.
Мукун, уттигъанну Дагъусттаннайн бувкIун бия машгьурсса актертал Татьяна Арнтгольц ва Григорий Антипенко, вайннал Оьруснал театрдануву ккаккан бунни «Двое на качелях» тIисса спектакль. Мунийнсса билетругу ца къабивтун бавххуну бия му байбишин цикссагу ссятурдил хьхьичIва. Миннала хъирив, февральданул 21-нний МахIачкъалалив Оьруснал театрданул сахIналийн увккунни машгьурсса актер ва ведущий Марат Башаровгу.

Му кьини цурда дия дяркъусса, гъарал сир-сир тIисса. Оьруснал театрданул хьхьичIалу бувцIуну бия нузкьунттив тIитIиннин ссавур дакъа дякъиву ялугьлагьисса инсантурал. Ца хъамитайпалул тIива: «ХIакьинунин къакIулссия вайксса инсантал театрданувун бучIайшиву». Мяйжаннугу, биял­сса инсантал бувкIун бия ва кьини театрданувун, бачIвасса кIану сайки бакъая Оьруснал театрданул Хъунмур залдануву. Укун бувцIуну бикIайссания жулва миллатирттал, хаснува Лакрал, театрдал заллугу…
Татарсттаннал лайкь хьусса артист Марат Башаров цала даврил уртакьтуращал Дагъусттаннайн лавсун увкIун ия «Жениться вам надо, барин» цIанилусса къямадия, Н. Некрасовлул «Осенняя скука» тIисса къямадиялийн бувну бивхьу­сса. Амма, ттул пикрилийн бувну, къямадиялуву личIийну хъянсса кIанттурду бакъая, хIатта бачIиннул бачIи зал ва хьхьуну хъяй бивкIнугу. Сайки 3 ссятрай нанисса спектакль бия хъинну бизарсса. КъакIула ттунмаяв ци-бунугу къабувчIлачIисса, ягу хъярчруяв къахIазсса. Помещик, барин Ласуков (Марат Башаров) ва мунал къазахътал шанул лаглай бур ахттайнмай. Шанулгу бувччуну, ми чантI тIий бур хьхьувай ссят 21 хьуну. Цукунни утти лахъисса бизарсса кIинтнил хьхьу гьан дувантIисса? Муна му суал цахьхьунма ва залдануву щябивкIминнахьхьун буллай, «Господи! Что делать?» тIисса оьрус инсаннал оьрмул оьрмулухунсса суал зумух ласлай ия щала хьхьуну барин Ласуков. Му аьлахъан анмур буллай, балай тIун бикIавай, къавтIун бикIавай, лабикIулий бук­лан бикIавай, дукъар къадиртунни мунал къазахъналгу. Шеърирдугума ляхъан бансса кьаст дуллай ия барин бизаршиврул. Цахава лавхьхьусса бия мунал хьхьичIа зузимигу, танмалсса, анавар ба­къасса, дуллан-ритлан дакъашиврул авлия хъанахъисса. Га яла тяхъасса лахIзалуву, цинявппагу пахъ багьан бувну, барин ачайва аькьлурдайсса ихтилатру буллай, хъинну куртIсса щугълурдавун агьлайгу.
Ца Марат Башаров личIаннин, вайми актертураву цаягу кIулссагу акъая. Москавлив, кинорая, театр­дания лап архсса сантехникнал ва цIигьурнал (повар) кулпатраву, 22-мур августрай 1974 шинал увсса Марат Башаров, школа къуртал бувну махъ, увххун ур МГУ-рал юридический факультетрайн. Му ппурттуву «Современник» театрданул бихьлай бивкIун бур «Кентервильское привидение» цIанилусса спектакль. Мивунгу аьркинну ивкIун ур, хъундакъасса рольданийн, жагьил. Театрал критикну зузисса уссил ачу куну, Марат му роль ххалдуван увкIун ур. Язи увгьунугу ур му рольданийн Марат ва щаллусса кIира сезондалий му спектакльдануву роль дургьунугу ивкIун ур хавар бакъулий театрданувун агьсса жагьил. Муния махъ МГУ-рава цалва документругу махъунмай лавсун, Марат увххун ур Щепкиннул цIанийсса училищалувун. Мура чIумух Марат рекламалувухгу гьуртту хьуну ур ва Никита Михалковлул «Утомленные солнцем» тIисса фильмраву эпизодрал роль дургьуну дур. ХьхьичIра-хьхьичIсса агьамсса ванал роллив хьуну дур «Сибирский цирюльникравусса» роль. Муния махърив ванал творчествалул биографиялуву хьуну дур цикссагу хьхьичIунсса ва агьамсса роллу, цалгу актер щаллуну машгьур увсса.
Кинораву, «Ледниковый период» проектраву хьхьичIунминнавух ивкIсса, ва цаймигу проектирдавух гьурттуну ивкIсса Маратлущалсса оьрмулувусса хьунабакьавурив дакIний личIансса къархьунни жулла республикалул журналистуран. «Мунан къаххирассар интервью дуллан», — тIий, республикалул телеканаллал журналистал муначIан гъан хьунмагу къабивтунни. Гъан хьун бювхъуминнавух хьусса жунгу мунаща автограф ласаврийну гьашиву дуван багьунни. БучIия актернал ва журналистурал дянив ца-кIира минутIрайссавагу ихтилат хьун бувссаниягу, актернал жулла республикалиясса, мунил тамашачитураясса пикривагу кIул хьун.
КутIану учин, къадакIний личIансса хьунни машгьурсса актернащалсса хьунабакьавугу, личIийсса асарду биян къабунни щалва Аьрасатнавух ва чил билаятирттайх гастроллай лавсун заназисса «Жениться вам надо, барин» къямадиялулгу…
Лажин хIадур дурссар
Бадрижамал Аьлиевал