Мартрал 4-нний Дагъусттаннал БакIчи Рамазан АьбдуллатIипов хьунаавкьунни Дагъусттаннайсса чачаннал жяматрал чулухасса вакилтуращал. Тикку ххалбивгьунни Аухуллал район цIудуккан даврил масъалартту.

Хьунабакьаврил хъунмур мурад бия 20 шинал лажиндарай агьамнува личIлачIисса масъала чулийн буккан баву. «Агана ДАССР-данул шамилчинмур съездрая махъ 1991 шинал му масъала щаллу баврин хасъсса план дурну диркIссания, ттул пикрилий, масъала 2000-ку шиннардил дайдихьулийра чулийн бувккун бикIанссия», — увкунни ванал.
Республикалул БакIчинал му­къурттийн бувну, ЦIуссалакрал райондалия лак цIусса миналийн бизан буллалийни ва Аухуллал район цIудуккан дуллалийни хIисавравун ласун аьркинссар бизлазисса гьарца кулпатрал мурад. «ПаччахIлугърал цIусса миналий къатравун бизан ччими бизан битан аьркинссар, агарда квартира ласун ччисса бухьурча, миннан дагьайсса арцу дулун аьркинссар квартира ласун. Ттул пикрилий, шанна шинавату бюхъанссар уттара дуккан дан Аухуллал район ва щаллу бан му масъала», — увкунни Рамазан АьбдуллатIиповлул.
ЦIанасса ппурттуву лак цIусса миналийн бизан баврил программалун хасну Къумтуркъалаллал райондалий лакран бувну бур 3050 къатта, тихун бизан бувну бур сайки 1,5 азарва кулпат.
ДР-лул Экономикалул министерствалул ккаккиярттайн бувну, бизан буллалисса лакран уттигу 664 къатта бан аьркинни. Вице-премьер Рамазан ЖахIпаровлул мукъур­ттийн бувну, захIматшиву дур къатри баврияр ххишала цIусса миналийн бивзсса инсантал инфраструктуралулгу щаллу бавриву, дуккаврил, цIуллушиву дуруччаврил, культуралул ва цаймигу объектру бавриву. Мунияту халкь бизан анавар буклай бакъар.
Дагъусттаннал БакIчинал бувс­мунийн бувну, ДР-лул ХIукуматрал кьамул дурсса Программалуву ккаккан бувсса масъалартту щаллу буллай бур. Агьалинащалгу даву дачин дан аьркинни, миннал цIусса миналийн бизаву лахъи дуккан къадулланшиврул. Дур шяраваллу школардугу, азарханардугу бувну хIадурсса, амма тиккун халкь бивзун бакъар. Школарду бакъасса шяраваллавун автобусру занази буллан аьркинни.
Рамазан ЖахIпаровлул мукунма бувсунни цIусса миналийн бивзсса лакран компенсациялун 604 млн. къуруширттал аьркинну душиву. Республикалул БакIчинал мукъур­ттийн бувну, ми арцу ялун нанисса шинал дулунтIишиву. Аухуллал район уттара дуккан даншиврул даххана дурну дур цаппара шяраваллал цIарду (чачаннал диркIсса цIарду зана дурну дур), чачанна­хьхьун зана бувну бур 347 къатта ва цаппара аьрщив.
Хьунабакьаврий ххалбивгьунни цаймигу масъалартту.
Хьунабакьаврий ихтилатру бунни ДР-лул Халкьуннал Мажлисрал депутат Хазали Мисиевлул, ветеринариялул комитетрал председатель Вахмурад Курчаевлул ва цайминнал. Миннал барчаллагь увкунни Республикалул БакIчинахь чачаннал масъаларттах къулагъас дуллалаврихлу.
ХIадур бувссар ХI. Аьдиловлул