Республикалул хьхьичIунми школардай чIун-чIумуй дувай дуклаки оьрчIахь терроризмалул, экстремизмалул ва наркоманиялул оьхIалшиврия бусласисса мероприятиярду. Февраль зурул 22-нний Новостройрайсса Аьхъардал школалийгу дия республикалул министерствардал ва ведомствардал вакилтурайн ва райондалул хъуниминнайн оьвкусса «ккуркки стол»: «Балугъравун биян буваминнал дянив терроризмалул, экстремизмалул ва наркоманиялул профилактика».

П. Рамазанова
А. Аьбдуллаева
Мероприятие дайдишин хьхьичI жу школалул директор Ибрагьимова Басиратлущал хьунабавкьуссияв. Мунил бувсуна Дагъусттаннай хIакьину терроризмалул ва экстремизмалул идеологиялущал ва наркоманиялущал унгу-унгусса талатаву дачин дуван багьлай бухьувкун, лавайми кла­ссирттал дуклаки оьрчIахь миннул зараллая буслан багьлай бушиву, мугу учительтурал коллективрал ца бурж хъанахъишиву. «ЧIявусса бур хIакьину аьдатрайсса ислам радикал течениярдая личIи дан къахъанахъисса, ласу-ка бувхIуну ливчIсса, му кIану хIисавравун лавсун жун хIукму хьунни ми цимурцаннуя балжину бусласисса, динийсса экстремистътурал биялалухьхьун къагьаншиврул цукун занакьулу хъанан аьркинссарив бувчIин буллалисса даву дуван, жаваблувсса къуллугъчитурайнгу оьвкуну», — увкунни Басират Ибрагьимовал.
Буниялттунгу, чIявусса хъамал бия школданул даврий гьуртту хьун бувкIсса: «ЦIуссалакрал район» муниципал сакиншинналул бакIчи Айдиев МахIаммад-ХIажи, мунал хъиривми Исрапилов Алик ва Мусаев Гаирбек, Дагъусттаннал Халкьуннал Мажлисрал депутат Зайнуллагь Мирзоев, Аьхъардал шяраваллил хъунама Магьдиев МахIаммад, райондалул КIулшиву дулаврил управлениялул хъунаманал хъиривчу Акаева Маликат, ЦIуссалакрал райондалул прокурор, юстициялул хъунама советник Сулайманов Юсуп, райондалул физкультуралул ва спортрал комитетрал председатель ХIасанов ХIасан, ДГПУ-рал инсаннал ихтиярдал ва правоведениялул кафедралул хъунама, генерал-майор, наркоманиялул масъалартту гьаз буллалисса тамансса публикациярдал автор Оьмаров Арсланаьли, ДР-лул террорданийн къаршисса комитетрал отделданул хъунаманал хъиривчу МахIаммадов ХIабиб, ДР-лул наркодиспансерданул хъунама хIакин ХIайдаров МахIаммад, Дагъусттаннал муфтийнал хъиривчу Тумалаев Давуд, ДГПУ-рал Уголовное правалул кафедралул хъунама преподаватель, юридический элмурдал кандидат Аьлиев Аьбдулмалик, Ростовуллал паччахIлугърал экономикалул университетрал кафедралул хъунама, доцент Рашидов Шарапуттин, Новостройрайсса циняв школардал директортал ва цаймигу бусравсса хъамал. «Ккуркки стол» хIадур баврил хъунмур хъар дия педагог-организатор МахIарамова ПатIиматлуй, оьрус мазрал ва литературалул учительница Маммаева Светланай, хъунмур вожатая Насруттинова ПатIиматлуй. Мероприятие дачин дурнугу бия ялув кIицI лавгсса ПатIимат Камалуттиновна ва Светлана МахIаммад-Саниевна.
Школданул спортзал хъинну ххуйну хIадур бувну бия: «ккур­кки столданул» темалун хасъсса оьрчIал суратирттал баннер дия, «ЦIуссалакрал райондалий террорданул щавщи» тIисса фотовыставка дия. «Запах сына» тIисса баннер дия 2011 шинал июнь зурул 22-нний Къизлардайсса контртеррористический операциялуву оьрмулуцIа увсса хъунама сержант Халидов Рустамлул, Аьхъардал шяраваллил язисса арснал оьрмулия ва чувшиврия бусласисса. Ми баннердай, фотовыставкардай тамаша бувсса жунгу, хъамаллурангу, чIалай бия школалий ххуйсса кружокру душиву. Утти мюрщими классирттахь дарс дихьлахьисса, Новостройрай­сса цалчинсса школалийва зий бивкIсса МахIаммадова Жамилал бувсунни Руслан Иманаьлиевич «ЧIава художник» тIисса кружок­рай каялувшиву дуллай ушиву, ПатIимат Камалуттиновна – краеведениялул кружокрай, спортзал оьрчIи-чIюлу бавугу миннал хIарачатрал хIасиллу душиву. Мукунма библиотекарь Марина Сулаймановал хIасул дурну дия терроризмалул ва наркоманиялул заралдания бусласисса луттирдал выставка. Музыкалулмур хъар цайнна ларсун дия Новостройрайсса Культуралул отделданул, му даврий каялувшиву дуллалисса ХIабибат Буттаевагу бия мероприятиялий.
Новостройрайсса КIулшиву дулаврил управлениялул зузалт бия Аьхъардал школалий хъинну ххуйсса драмкружок душиву буслай. Цалчинмур бутIа байбихьлахьисса лахIзалуву исват хъанай бия му кружокрай каялувшиву дуллалимигу давриву дакI дирхьуну зузисса бушиву. Залданул ца чулух шама дуклаки оьрчI ттуплий буклай бур, ккурчIав кIия къужа хавардай бур, чIивитIу канихьсса хъамитайпагу бур арх бакъа. Залданул тамур чулухрив БивкIу най бур ЛухIисса Варсуву. Аьрали лаххиялувусса гьалмагъай залданул дянив авцIуну ур. Жалин бур кIяла лаххиялуву. Мунищал архIал наними ссувхIатрай бур.
«Реквием» музыкалухун Па­тIимат Камалуттиновна ва Светлана МахIаммад-Саниевна буслай бур 2011 шинал июнь зурул 22-нний оьрмулуцIа увсса виричусса аьхъарачуная, хъунама сержант Халидов Рустамлуя. Дуклаки оьрчIрурив тиху-шихунмай щуруй, мунал оьрмулувасса лахIзарду ккаккан буллай бур. Рустам Халидов Рукьижатлул ца акъа-акъасса арс ивкIун ур. Дагъусттан радикал экстремистътурацIа ххартI буллалисса спецоперациялуву чувшиврий жан дуллусса Рустамлун 26 шин диркIун дур. Ташу бувну ххюва зурува лавгун ур дунияллия, оьрчIан хьусса кулпат Гулизаргу чIавасса оьрмулий щащарну кьабивтун. Рустамлул нину, кулпат, ссурвалгу бур макь дайгьин къа­хъанай. Ккулла щусса жагьилнал лагма лечлай бур. Биту-ххитулул чIурдавух оьлицIал хъанахъи­сса жагьилнал телефондалувух кулпатрайн оьвтIисса чIу баллай бур. КIилчинсса пIякь-шякьлил чIурдал муналмур чIу пахъ багьан бувай.
-Алло! Алло! Алло! Рустам! Ттун вил чIу баллай бакъар! – тIий бур Гулизар.
Щаву дирсса Рустам ур:
— Ххирай, ина ттущал гъалгъа тIутIу, телефон малещара, так гъалгъа тIутIу, — тIий.
ЛухIисса варсигу ялтту ливчуну Рустам лавсун нанини, базурдавун кьутIлай бур ниттил леххаврил чIу:
-Ттул дакI гъюжу дурккунни! Агь, дадал! Вил чIарасса щарния щащар хьунни! Вил жагьилсса ссурваврал хъару гъаргъунни! Жу вил хъаттирдайявхха лехлахисса! Утти жул хъару гъаргъунни! Ваксса винма ххирасса кулпатращал щалихханнин къаивтунна. Вила ца акъа-акъасса арсная ятин унни!
Дуклаки оьрчIру профессионал актертал хханссар. ТачIав хъамакъаитанссар Рустамлул роль дургьусса жагьил: хIакьсса артист куна аьтIий ур га макь дайгьин къахъанай. АьтIий бур залданувун бавтIциригу. Спортзалданул хьулух бавцIусса хъамитайпа хIал бивну, тиха-шиха бувгьуну бувцуну лагай. Экстремизмалул ва терроризмалул ххутIал дурсса щавурду ттигу хъин хъанан дурар…
Дуклаки оьрчIру хъамаллурахьхьун суаллу буллай, чялишну хIала бувххунни дискуссиялувух. Миннал суаллугу мура экстремизмалуцIун бавхIусса бур: властьрайн къаччан бивкIми ба­къарив терроризмалухун багьсса, марцIсса ислам радикал суккушиннардая личIи дан лахьхьин буллалисса дарсру школалул программалувун рутан къабучIиссарив, террористътурал ширишилун угьарча цукун занакьулу хъанан аьркинссар, терроризмалун ххуллу кьукьиншиврул ци давурттив дуллан аьркинссар ва м.ц.
Мусаева Аидал бувсуна 8-11 классирттаву дуклакиминнал наркоманиялул ва экстремизмрал хIакъиравусса суаллахьхьун чичрулийнусса жавабру дуллушиву, му анкеталул хIасиллу бувсуна. Наркотикирттая ва хIанттия архну бикIан аьркиншиву бусласисса хIаз дизансса постановкардугу хIадур дурну дия оьрчIал.
Ва мероприятие лайкьсса даражалий тIайла дукканшиврул хъунмасса захIмат бивхьушиву чIалай бия школалул директорналгу ва муниха зий бивкIсса учительтурал ва дуклаки оьрчIалгу.
Гьай-гьай, хъунмасса барчаллагьри, бигьалагай кьини дунура, чIун дур-дакъар къаувкуну, ва агьамсса мероприятие душиву бувчIуну, гьуртту хьун бувкIсса хъамаллурангу.