ЦIуссалакрал райондалул администрациялий хьунни Сочилий хьусса хIала-ккаласса единоборствалул турнирданий хьхьичIунсса кIанттурду бувгьусса спортсментурал савлугъ дуллалисса мажлис. Му турнирданий ххув хьуну бур ЦIуссалакрал райондалиятусса жагьилталгу. Райондалул администрациялул аьдат дур спортрал бяст-ччаллил тIуркIурдай хьхьичIунсса кIантту бувгьуми райондалул цIаниятугу барча бувну, лахъа-хъун бувайсса.
П. Рамазанова
Ва ххуллух барча бунни Сочилийсса турнирданий Дунияллул Кубокру лавсъсса Европанал чемпион СалихI Къаравалиев ва Сулайман Абачараев. Барча увунни США-наву хьусса, чани чанминнал дзюдолул чемпионатрай ххув хьусса Илияс ХIамзатовгу. ЦIуссалакрал №1-мур школалул гьашинусса выпускник.
Илияс ХIамзатов шамийла ххув хьуну ур уттинингу Аьрасатнал чемпионатрай. Утти Американава дунияллул чемпионнал цIагу ларсун увкIун ур.
Спортсментал барча бунни ЦIуссалакрал райондалул бакIчи МахIаммадхIажи Айдиевлул, спортшколалул директор Сергей Аьлимовлул, мукунма ххув хьуминнал тренертурал. М. Айдиевлул щаллагу дунияллул спортрал майданнай райондалул цIа гьаз дуллалисса спортсментуран дуллунни арцуйнусса бахшишру, СалихI Къаравалиевлун тIурча райондалул агьалинал цIанияту машиналул кIулли дуллунни.
Райондалийсса жагьилтал спортрахун машхул буваву ца агьамсса масъалану чIалачIисса райондалул администрация уттиния тинмайгу спортраву хьхьичIунминнах къулагъас дуллан дакIний бур.
