Вихьуллал шяраву 2009 шинал сентябрьданий спортзал тIивтIуния махъ, шяраваллил жагьилтурал спортрахун багьаву хьхьичIуннай хьунни. ЛачIун буккавриву, волейболданий буккавриву личIи-личIисса турнирдай лахъсса кIанттурду бувгьунни. Дагъусттаннал чемпионтал хьусса жагьилтал бувккунни. Вана уттигъанну июльданул 14-нний Вихьуллал шяравусса спортзалдануву хьунни Александр МахIаммадовлул цIанийсса волейболданул турнир.

Чан-кьансса бусан ччива Александр МахIаммадовлуя. ЦIуй­шиял шяравасса МахIаммадов АхIмадпашанал ва оьрус учительница Раиса Киншинал арсъя Александр. Амма вайннал хъунмамур оьр­му лавгссар Вихьуллал шяраву­сса дянивмур даражалул школалий дарс дихьлай. Мунияту Сашагу Вихьуллал оьрчIал дянив хъунагу хьу­ссар, школалий дуклайгу икIайссия. Яла нитти-буттал касму язи дургьуну учитель хьуна. Александр Аллагьнал чIявусса пагьмурду буллусса жагьил икIайва. Цалчин ва ия спортсмен. Школалий дуклакисса чIумала чIивину унува турникрай кару къадархIунна «солнце» бувайва. Волейболданий ххуйну уккайва, куклу атлетикалувух гьуртту шай­ссия. Балай учаврил, личIи-личIисса музыкалул инструментирттай макьан дуцаврил чулухасса пагьмугу бикIайва ванаву. Интеллект гьарта-гьарзасса, чIявусса затру кIулсса жагьил уссия. амма 42 шинаву машина багьсса ишираву апатI нясив хьуну ахиратравун лавгуна. Цакьнирагу дурссар ванал цIанийсса волейболданий буккаврил турнирду. Вана гьашину Александрдул ссил Саидал арсурваврал, Мирославлул, Маратлул, Александрдул арснал АхIмадпашанал, ссурахъил Бухариннул спонсоршиву дурну цIуницIа турнир-соревнование дуллан хIукму бувунни.
Турнирданий гьуртту хъанай дия урчIра команда: шанна Ккулату, шанна Вихьлияту, кIира ЦIуйшату, ца Хъунату. Турнир тIиртIуна Вихьуллал шяраваллил администрациялул хъунама МахIаммад ХIусайновлул. Ванал кутIану бувсуна Александрдул оьр­мулул шаттирдаяту ва цими шин гьарчагу Александр Вихьуллал жяматран дакIния къалагантIишиву тасттикь бувуна. Ихтилатру бувуна Александрдул ссил МахIаммадова Саидал, чIярусса шиннардий Вихьуллал шяравусса школалий физкультуралул дарсру дихьлай ивкIсса учитель МахIаммадов Пирбудагълул, МахIачкъалалия увкIсса хъамаличу, Дагъусттаннал «Пенсионер Дагестана» тIисса кказитрал хъунама редактор, Да­гъусттаннал пенсионертурал профсоюзрал председатель МахIаммадов АьвдурахIманнул, Къяннал шяравасса Александрдул школалийссава дус, спортсмен Ибрагьимов Робинзоннул ва цаймигу хъамаллурал. Гьай-гьай, турнир тIитIлатIийни ккаккан дуруна шяраваллил брендну хъанахъисса Вихьуллал ни­ттихъал янна лархсса къавт1авугу. Яла дайдирхьуна волейболданий буккаву.
Турнир лахъи ларгуна кIюрххил ссят ацIунния маркIачIан чIумал ссят мяйра хьуннин. Финалданий дуклай дия Ккуллал кIилчинмур ва Вихьуллал цалчинмур командарду. Ххув хьуна Вихьуллал команда. КIилчинмур кIану лавсуна Ккуллал кIилчинмур командалул, шамулчинмур кIану лавсуна ЦIуйшиял кIилчинмур командалул Вихьуллал кIилчинмур командалуяр ххув хьуну. Цалчинмур кIану бувгьусса Вихьуллал командалун буллуна занази-кубок, диплом ва 15 азарда къуруш. КIилчинмур кIану бувгьусса Ккуллал командалун буллуна диплом ва 13 азарда къуруш. Шамулчинмур кIану бувгьусса ЦIуйшиял командалун буллуна диплом ва 9 азарда къуруш. Турнир лакьлай икьрал дуруна шин лях лаган къадиртун гьарца шинах дуллантIишиву ва турнир. Жувагу умуд бишинну ванийн.
Ахирданий кIицI буван ччива Александрдул ссил Саидал тIивтIушиву нахIусса гьавккур­ттащалсса, дикIущалсса, сокирдащалсса ссупрагу. Чара бакъа кIицI буван ччива къадиркIшиву ссупралий цукунчIавсса спирт хIаласса хIачIиягу.