ХIурмат лавайсса лакрал жямат! Ххирасса гьалмахтал! ХIакьинусса жула батIаву лакрал тарихрал ва мунил оьрмулул лахъишиврий ца ляличIину ябацIансса шадлугъран, байрандалун ва миллатрал даккаврин – буттахъал заманнай кунма, хъунмукъуйн цачIун шаврийн ккалли хъанахъи­ссар. Ва батIаву жува бушиврул, бивкI­шиврул ва мукьахунмайгу абадлий личIаншиврул ца яргсса лишанни ва шартIри.

Ларгунни, цукун гьавивав, цу чIарав ацIавивав тIий, щалагу жул коллектив вас-ццахлий ялугьлай бивкIсса «Илчи» кказитрал юбилей.

Лакгу ххирасса ва миллатрая пахру буллайнасса лаккучу хIисаврай, на дакIнийхтуну ххарину ура жула «Илчи» респуб­ликалийсса миллатирттал кказитирттаву мудангу хьхьичIунну, буккултрангу бусравну, цилва хьхьичIсса буржру биттур буллай буну тIий.

Бурувгун буруганнин ларгсса кунна чIалай дур хIакьину вай 25 шин. ЗахIматралгу, талихI-тирххандаралгу дурцIусса шинну. Пикри барча, цуксса баххана хьуну бур замана вай гьалаксса, бигьа дакъасса шиннардий. Циксса хъамакъабитансса, жулва оьрмурду мархлуцIакул ба­ххана бувсса ишру къавхьур. Циксса инсанталгума, ва кказитраву рухIгу, жангу дирхьуну зий бивкIсса, лавгри жула ялату. 25 шин.

ЧIивиния шинмай ттул «Илчи» кказитращал бур яла ххуйми асарду бавхIуну. Таний Гъумук дуклакисса чIумал на назмурду «ЧIимучIалттул» лажиндарайн гьан дайссия. Ссавур дакъа ялугьлай бикIайссияв ттулла назмурду рищуннин.

ЦIанасса заманнай ужагърай машина бакъасса, миннуцIун бавхIусса къайгъурдащал хьунакъаакьайсса инсан нажагьсса ухьунссар. ХьхьичIва цалва масъалартту щаллу буллай, очердай бацIлай, инсантуран хъунмасса хIаллай ялугьлан багьайва.

Кказит дахьва тIивтIусса шинну диркIссар билаят ва рес­публика политикалул, маэшатрал ва социал ххуллурдал шанбачIулий бавцIусса, цумур ххуллу язи бугьантIиссарив къакIулсса, цалий къабавцIусса заманалул шинну.

Ххирасса дустал! На мудангу пахрулий дакIнийн бутара нава 25 шинал хьхьичI «Илчилул» гьану бивзминнавух бивкIшиву. «Илчилул» хъунама редактор Качар ХIусайнаевал цуппа хъунмурну бивтния мукьах къулбас дурсса цалчинсса

Ххирасса «Илчилул» зузалт ва буккулт! Кьамул бувара зул кказит­рал ххаллилсса юбилейращал барча буллалисса ттул чулухасса дакIнийхтунусса махъру! Зул миллатрал кказитрал хъунмур мяъна-мурад — информация зучIан биян баву бакъарча, зул миллат щаллушиврул лишансса, «визитная карточка» кунмасса мурад бушивури.

«Илчи» кказитрал редакция кказитрал юбилейращал барча буллай, учин ччива жун, Лакку билаятрая архну ялапар хъанахъисса лакран, кIилий тIааьнну бикIай жул пикрирду, жущалсса интервьюрду жула лакку мазрайсса кказитрай рирщуний, ми ккалан ва жува бувсмур, жулва чIу ватанлувтуран бавхьунссар тIий.