Уттигъанну Буйнакскалий шагьрулул 4-мур школданул библиотечно-информационный центрданул «Ларец доброты и мудрости» литературалул гостинаялуву хьунни Литературалул шинан хас дурсса шадлугъирттавасса ца – МахIачкъалалия бувкIсса хIурмат бусса хъамаллуращалсса хьунабакьаву. Хъамаллуравух бия «Дараччи» клубрал президент Мариян Илиясова, ва клубрал члентал – шаэр Космина Исрапилова ва ишбажаранчи Жанна Хавчаева.
Бадрижамал Аьлиева
Ва кьини вайннащал хьунабакьин бувкIун бия шагьрулул школарттал педагогтал, библиотекарьтал, дуклаки оьрчIру. ЧIюлу бувсса библиотекалуву хъамал хьунабакьлай бия Буйнакскаллал КIулшиву дулаврил управлениялул начальникнал хъиривчу Зарема Пахруттинова, КIулшиву дулаврил управлениялучIасса информациялул ва методикалул центрданул хъунмур Дагият Ибрагьимова, 4-мур школданул директор Бурлият Казиева ва библиотекалул ва информациялул центрданул хъунмур Барият Зайналова.
Ва батIаву дачин дурсса педагог Исрапил Мудуевлул увкунни:
— ХIакьину жунма тачIавнияргу хъинну аьркинну бур даву дуллан, хIасул хьусса тагьар даххана дуллан бюхъайсса, ва дуниял хъиншиврул ва цIимилул дуцIин дуллансса инсантал. Мукунсса инсантуравасса цанугу бур Мариян Илиясова. Ванил сакин дурсса организациялул буручлай, ябуллай бур жулва буттахъал, буттал буттахъал ирс, культуралул аьдатру, цIулаган дуллай бур виричушиву ва патриотизм, — увкунни ванал.
Гихунмай ванал бувсунни «Дараччи» клубрал тарих байбихьлай бушиву 1998-ку шиная шинмай, Мариян ЧIибиевнал цила лагма лаган бувну махъ цуппа кунма пикри буллалисса, оьрмулухсса цилла куннасса бургаву дусса инсантал, лагма-ялттуминнан, мюхтажминнан кумаг буллан хIадурсса. Бувсунни, ихIсаниятрал даву дуллай, ва клубрал кIулшиву дулаврил, культуралул идарарттащалсса уртакьшиврийсса зузаврия, вай шиннардил дянив дурсса хъин-хъинсса давурттая.
Мариян Илиясовал ва шагьрулул дуклаки оьрчIан бахшишран лавсун бувкIун бия лакку мазрайсса луттирду.
МахIачкъалалиясса хъамаллурал ва Буйнакскалий вай кьамул бувминнал ихтилатру бия уттиния тинмайгу дусшиврийсса ва уртакьшиврийсса арарду цIакь дуллансса умудирайсса.
