Ноябрьданул 20-нний Оьруснал театрданул Хъунмур залдануву хьунни Дагъусттаннал Халкьуннал шаэр, ДР-лул Чичултрал союзрал председатель МахIаммад АхIмадовлун 60 шин хъанахъисса юбилейран хасъсса хъуннасса шадлугъ. Шадлугърай гьуртту хьунни ДР-лул БакIчи Рамазан АьбдуллатIипов, ХIукуматрал ва министерстварттал вакилтал, шфаэрнал уссурссу, даврил уртакьтал ва Аьрасатнал регионная бувкIсса ванал дустал-шаэртал.

Залму АьбдурахIманова
Шадлугърал батIаву тIитIлай, ва юбилейращал М. АхIмадов барча уллай, Республикалул БакIчинал кIицI лавгунни, ва иш мяйжаннугу республикалий агьамсса шадлугъран ккаллишиву.
— Цинявннан ххирасса ва пахру-ххара бакъасса МахIаммад АхIмадов ур ниттил увния шинай шеърилугърал ясир увсса, муниву лявхъусса гьунар бусса шаэр. Оьрмулул 60 шин хъанарчагу, вайннува шаэрнал хъунмур оьрму – 45 шин, хас дурну дур творчествалун, шеърилугъран. Зунттал билаятрай ляхъаврицIун, ванан ялагу бахтти-талихI хьуссар цалва оьрмулуву ва хьунаакьаву бюхттулсса гьунарданул заллухъру Расул ХIамзатовлущал, ОьмархIажи Шагьтамановлущал ва мукунма цаймигу шаэр-чичултращал. Хаснува Расул ХIамзатовлул маслихIатрайну МахIаммад АхIмадович дуклан увхссар Москавливсса Литературалул институтравун. Мугу лахъсса кьиматирттай къуртал бувну, зана хьуну ур Дагъусттаннайн. Шикку ва кьамул увну ур Чичултрал союзрал оргсекретарьну. МахIаммад АхIмадов ур куртIсса дакIнил синттайн асар хьунну шеърирду чичайсса шаэр. Ванал творчествалуву чансса бакъар инсаннал оьрмулун хасъсса философиялул мяъна-мурад бусса шеърирду. Ванан хасъсса назму чирчуну дур Расул ХIамзатовлулгу. Укун куртIсса мисаллу гьаз буван гьунар буллусса шаэрнал юбилей республикалул даражалул шадлугъран ккалли дуван аьркинссар жура, — увкунни Р. АьбдуллатIиповлул.
Республикалул БакIчинал кIицI лавгунни, М. АхIмадов уттигъанну МахIачкъалалив цIуну тIивтIусса Шеърилугърал театрданул художествалул каялувчинал къуллугърайгу ивтшиву. Цанчирча ва театр тIитIин хъунмасса хIарачат бувминнавух, мунил сиптачину юбиляргу ивкIун тIий. М.АхIмадов ттинин чIярусса литературалул премиярттан ва хIукуматрал чулухасса бахшишир­ттан лайкь хьуну ур. Шадлугърай Рамазан АьбдуллатIиповлул, юбиляр ва агьамсса оьрмулул шачIанттущал барча уллай, хIукуматрал цIа кусса ссят ва ванал оьрмулун хасну цува авторсса лу пишкаш бунни.
М. АхIмадов барча ан ва кьини жулла республикалийн бувкIун бия Москавлиясса, Чачаннавасса, Ингушнавасса, Къалмукьнавасса, Татарсттаннаясса ва АьсатIиннавасса шаэртал ва вайннал Чичултрал союзирттал вакилтал. Цала дус 60 шин хъанахъисса юбилейращал барча уллай, вай циняв, цал архIал кунма, кIицI лаглай бия Дагъусттаннай шаэртурах, культуралух, творчествалух дуллалисса укунсса къулагъасрая жунма, дагъусттанлувтуран, хъунмасса пахру бикIан аьркиншиврия. МахIаммад АхIмадовлул творчествалун хасну вай регионнай ттинин итабавкьуну бусса бия шаэрнал оьрмулиясса, творчествалул ххуллиясса ва ванал назмурду таржума дурсса литературалул журналлу, жужру ва кказитрал рубрикартту.
Ва кьини юбилярнан пишкаш дурсса бахшиширттаву чан­сса да­къая Чачаннал, Ингушнал цIанихсса художниктурал дирхьусса суратру, нажагь бакъа хьунакъабакьайсса луттирдал томру ва ванан хасъсса шеърирду ва барчабавур­ттал махъру.
ДР-лул ХIукуматрал чулуха вице-спикер Юрий Левицкийл, шаэр юбилейращал барчагу увну, ХIурматрал грамота дуллунни.
МахIаммад АхIмадовлул творчествалул оьрмулия, ванал шеърирдал хасиятрая буслай, РАН ДНЦ-лул Мазрал, литературалул ва магьирлугърал институтрал директор МахIаммад МахIаммадовлул кIицI лавгунни, шаэрнал республикалул культуралуву бивхьусса захIматран кьимат бишлай, ванал гьунардания, пагьмулия, шеъри чичаврил ус­ттаршиврия цIа дуван лайкьшиву сивсуну ва дакI дарцIуну.
— Уттизаманнул Дагъусттаннал литературалуву ва культуралуву МахIаммад АхIмадовлул бивхьусса бутIуя чIявусса буслан аьркиншиву чIалай дакъар. Ва ур ххаллилсса шаэр, публицист, таржумачи, хIат-хIисав дакъасса назмурдал луттирдал автор, гьунар бусса инсан ва цалла давриву уххаву цирив къакIулсса зузала. Цалва произведениярттаву шаэр гьаз буллай ур инсаннал оьрмулуцIун ва обществалуцIун бавхIусса масъалартту ва «цIуцIи кIанттурду». Шаэрнал творчествалул дуниял хханссар ца цинналусса ттугъгу, гимнгу, мазгу, балайрдугу бусса караматсса дуниял. ХIакьину ччанавккусса, оьхIалсса заманнай ванал назмурдал дакIру, гъили лаган дурсса кунна, пахъ дагьан дувай. Мукунсса гуж бусса шеърилугърал заллу ур МахIаммад. Мудангу ванал цува ккалли увайссар Расуллул ученикнан. Расул кунасса учительнал укунсса ученик тарбия аву ккалли бан бучIиссар хъунасса шаэр жуна уллуссаксса иширан, — увкунни МахIаммад МахIаммадовлул.
Шиккун бувкIсса цинявннахь юбилярнал барчаллагьрал махъ лавхъун махъ, театрданул хъунмур сахIналий дайдирхьунни шадлугърал концерт.