ДукIу-кIурссану на чивчуссия НицIавкIуллал шяравалу цIу дуккан дуллалисса ЦIунтIаев Абуияпсиннуя. КутIану дакIнийн бутан, 2013 шинал Абуияпсин аийвхьуссия буттал къатри дакьин дуллай, тава ппурттуву шяравунсса ххуллугу бакьин буллай. Буттал къатри цIу дуккан дувайхту, Абуияпсин айивхьуссия щайх Сайпуллагь-Кьади Башларовлул музей буллай, хъирив шинал ттукI бувцуссия шяравун.

Вай давуртту дувайхту, ппугу, арсгу — Абуияпсин ва цIанихсса архитектор Камил ЦIунтIаевхъул байбивхьуссия НицIавкIуллал мизит цIу буккан буллай, мизитрал чIирттал чартту бякъайкьиншиврул, гьарцагу чарий номерду бихьлай. Вана укун цIунил, хьхьичIва бивкIсса куццуй, чартту капливун багьан бувну чIиртту буллай, цIу буккан бувссар вайннал мизит.

Зунттал архитектуралул эмаратсса гьайкал. На Камил ЦIунтIаевлул страницалий хъирив бавцIуну бура мизит цIу буккан баврил даву чун дирну дурив. ЧIирттугу гьаз бувну, магъигу дирхьуну дур. Утти мизитрал вивсса давуртту дуллай бур. Бургияра цукун ящунал дакI хIайран дуллалисса даражалий цIу буккан бувну бурив 18 аьсрулий бувсса исвагьийсса мизит.

Ва НицIавкIуллал жяматрацIун, щалвагу миллатрал барчаллагьран лайкьсса давур. «КIия акьирча кьун бутайссар» учарухха. Ппугу, арсгу ппухълуннал мина ядан, цIу дуккан дуван аьркиншиврий цалийн бучIаврицIун, лахъсса даражалий ва даву дувансса бюхъу-хIарачатрал заллухъругу бур. Дуллайгу бур. Дувавайгу бур.

ПатIимат Рамазанова