Дагъусттаннал халкьуннал Цашиврул кьинилун хас дурсса мероприятиярттал лагрулий Имам Шамиллул цIанийсса Ухссавнил Ккавкказуллал чIяру профиллу дусса гуманитар колледжраву хьунни «Дусшиврул хоровод» тIисса миллатирттал культурардал фестиваль. Ванил мурад бия личIи-личIисса миллатирттал жагьилтурал дянив дусшиву цIакь даву, куннал хIурмат куннал баву. Фестивальданул лагрулий хьунни миллатирттал дукра, лаххи-ликкия, аьдатру, багьу-бизу ккаккан буллалисса конкурсру. Миннул кьимат бищун бувчIуну бия жюри.
Колледжрал преподавательтурал ва студентътурал лавайсса даражалий хIадур бувну бия байрандалул мажлис. ТIивтIуну бия миллатирттал дукрардал авадансса ссупра. Ккаккан дунни оьруснал, лакрал, нугъайнал, даргиял, лазгиял аьдатру, къавтIавуртту, увкунни балайрду.
КIицI лаган, колледж тIивтIуния шийнмай укунсса байран вайнначIа аьдатравун дагьну дур.
Цинярда командарттал программа ххал дурну махъ, жюрилул дунни конкурсирттал хIасиллу. Лакрал майданналул бувгьунни кIилчинсса кIану. Вай хIадур бувну бия директорнал хъиривчув, психолог Жамиля Керимовал. Вайннал кьини хъун дан Лакрал райондалия бувкIун бия райондалул Культуралул центрданул хъунаманал хъиривчу Мариян Жамалуттинова бакIчисса коллектив. ХьхьичIунсса кIанттурду бувгьусса шаннагу командалун буллунни дипломру ва арцуйнусса бахшишру.
Вай барча буллалисса ихтилатру бунни колледжрал учредитель Тавлу Казакбиевлул, директор Жавад ХIажиахIмадовлул. Хъамаллуралгу барчаллагь увкунни колледжрал каялувчитурахь, преподавательтурахь, студентътурахь укун ххаллилсса мероприятияртту хIадур дуллай тIий.

Андриана Аьбдуллаева