Гьуртту хьуминнал пикрирду
Камил Давдиев, Дагъусттаннал Халкьуннал Мажлисрал председательнал хъиривчув ва «Справедливая Россия» фракциялул каялувчи:
– На барчаллагьрай ура Москавливсса Дагъусттаннал диаспоралийнгу, Постпредстволийнгу лакку мазрал диктант чичаврил даву лавайсса даражалий гьаншиврул биялсса захIмат бишаврихлу. Москавлив яхъанахъисса дагъусттанлувтал, жулва халкьуннал тарих , культура лахьхьин, аьдатру ва ниттил маз ябан личIинува хIарачат буллалисса бушиву чIалан бикIай дуллалисса мероприятиярттава. ХIакьину, зузи кьини духьурчагу, чIявусса инсантал бувкIунни ва КьатIаллил билаятирттал литературалул библиотекалувун, давурттугу, гьарзатгу кьариртун бувкIцириннайнгу барчаллагьрай ура. Жуйва цинявннайсса буржри ялун нанисса наслулун ниттил маз лахьхьин буван, жулвами ппухълуннал жунма лахьхьин бувсса кунма. ХIакьинусса диктантгу му ххуллийсса давур.
Жанна Абуева, Дагъусттаннал технический университетрал кьатIаллил билаятирттал мазурдил кафедралул хъунмур, шаэр:
– На ххарину бура хIакьину Москавлив укун агьамсса мероприятие душиврия, навагу ваний гьуртту хьун бучIаврия. Ва библиотекалуцIун бавхIуну буссар ттул дакIнивусса ххуйсса асарду. Студент заманнай на ччя-ччяни бучIайссияв ва библиотекалувун, хаснува дипломрал даву чичлачисса ппурттуву. Сайки гьарца кьини тIиссакссагу, бучIайссияв, диялсса чIун гьан дурссар луттирду ххилтIу тIий, ккалай, чичлай. ДакIнил лавсъсса ужагъри. КIилийну ххи дуллай дур тIааьнсса дакIнийнбичавурттал лак шивун батIавриясса ххаришивугу.
Гульшан Хасаева, Мариян Илиясовал цIанийсса «Дараччи» фондрал президент:
– Жунма хIакьину цал уттигу исват хьунни, Расул ХIамзатовлул творчество – Ккавкказуллал литературалул кьиматрайсса хъус-ххазина душивугу, ванал поэзиялул ирс-ххазина жулва билаятрал, щалва планеталул агьалинан бусравну бушивугу. Расул ХIамзатовлул луттиравасса халкьуннал шаэр АбутIалиб Гъапуровлуясса текст язи бугьаврийнугу аьч хъанай дур цамургу тема: Дагъусттаннал халкьуннал литературалул ва чичултрал хIала-гьурттушиву, дусшиву. Ва тотальный диктантрай гьуртту хьун чIявусса инсантал батIаврилгу ккаккан бунни, Москавливсса Лакрал диаспоралун лакку мазгу, лакрал культурагу хьхьичIунну душиву. Уттигъанну, ЦIуссалаккуйсса цIусса садикру тIитIлатIисса шадлугъирттай лакку маз бакъашиву ттун кьурчIи бивзуна. Лаккуйми садикирттай ва школардайгу вара тагьар дур, маз ишлану бакъар я ичIува, я кьатIув. Буван шаймур, жулва биялалиймур буван багьлай бур. «Дараччилул» цIаниясса обращение хIадур дуллай буру, садикирттай, школардай мероприятияртту лакку мазрайгу чара бакъа дуллан аьркиншиврух къулагъас дувара тIисса.
Басират Билалова, диктантрал сакиншинначи, филолог:
–Ттул пикрилий, гьашину диктант чичин жулва лак гьарзану, гъирарай, ххарину байрандалийн кунма бавтIунни. Шамилчинсса ниттил мазрайсса диктантри ва Москавливсса лакрал чирчусса, хьхьичI шиннардийгу мадарасса инсантал бучIайва. Цурда диктант чичавугу ларгсса шиналнияр ца даражалул лахъну дия. Арула инсаннал ца гъалатI бакъа чирчуну дия, ца ацIа инсаннал мюрш-кьюршсса гъалатIру бия, бунугу миннангу «ххюварду» бишарду. Жул мурад буссия гьашинумур диктантрайн оьрмулул бугьарами ва студентътал кIункIу бувансса, ва мурадгу бартбигьарду. Бия МоскавуллачIан гъансса шагьрурдая бувкIссагу.
Ххадижат ЦIаххаева, лакку мазрал педагог, шаэр:
– На мероприятиелийн хIадуршинна дуван багьлай бушиврия кIицI лавгссия лакрал жагьи-жугьултрал ккуранчитурахь дуккаврил шин дайдихьулул дарсирай. ХIадуршинна дувансса чIунгу чIирисса дия, амма ччясса мутталий, цинявппа лагма лавгун, лахъсса даражалий гьурттушинна дурна. Хъинну рязинугу, ххаринугу бия ттул студентътал, ччя-ччяни ниттил мазран хас дурсса мероприятияртту сакин дуллан дур тIий. Ттулмур дакIгу ххари хъанай дур, пахругу бур, жулва миллатрал итххявхсса, ххаллилсса жагьилтал ва душру бушиву чIалай.
Жандаров АхIмад, студент:
– Мероприятие лахъсса даражалий ларгунни. Ттун щаллагу программа ххуй дирзунни. Диктантгу ххуйну ларгунни, зал хъунмасса бухьурчагу, текст ххуйну баллай бия, чичин ка хъирив лаллай дия. Цахъис программа лахъи дурнуккива. Мероприятиелул дайдихьулийра диктант чирчуссания, чивчуминнал ккал-аьдад хъун хьунссия, залдануву цIубутIуй чIявусса агьлу бия.
Авкаева Шуаьнат, хIакин-ординатор:
– Мероприятие цурда гьакссагу ххуйну ларгунни, бавтIцири рязину бия. Программагу цимурца хIисаврайн ларсун сакин дурну дия. Ва даврил сиптачитурайнгу, захIмат бивхьуминнайнгу барчаллагьрай бура, ва даву дюхъан дурнутIий. Дагъусттаннаясса хъамаллурайнгу оьвкуну, Москавливсса лакрал студентъталгу хIала буххан бувну, циняв гьурттуну, бавкьуну, миллатрал хъункъушлийн бавтIсса кунмасса асарду дакIурдиву гьузиххин бувансса даву дунни. Ва тарихравун багьансса ишри, ва иширал бардултравух гьуртту хьуминнавух навагу бушиврия дакIниву ххаришиву дур.
Шарип Сайдуев, предприниматель:
– Жу «Баттерфляй» фабрикалиясса цIувкIул, ряха-арула инсан бувкIру ва кIанайн, диктант чичин. Амма диктант чичинну тIий бувкIсса жу унгу-унгунусса байрандалийн багьунну. Гьарзат асар хьунни, ххуйя лакрал дукрарду, ччарча гьавккури бия, ччарча хьхьахьхьари. Лакрал чаннацIуртти гьурттусса концерт дия. Яла-яларив, лакку гъалгъа дакIурдин малхIанну бия. Диктантралгу школалул оьрму дакIнийн бувтунни, бия школа къуртал бувну мукьах цалчинну диктант чичлачисса тIиссагу. Халкьуннал шаэр АбутIалиб Гъапуровлун хас бувсса текстраву жагьилтурансса тарбиялул дарсгу дур, текст цуппагу пасихIну экьи нанисса бур. Басират Билалова ххуйну ккалай бия. ДакIний личIансса мероприятие хьунни. Ттущал бувкIциригу укунма тIий бия.
Зарема Аьлиева, хIакин (Тула):
– Мероприятие бакIрая ахирданийн дияннин ца тIааьнсса бущилий, сантирай ларгунни. Байрандалул ца ххуйсса хIахI бия библиотекалул ЖанахIравун буххайхтува. ДакIнийхтунусса барчаллагь ва мероприятиелуха зий бивкIцириннайн. ПасихIну, дюхханну ккалай бия жагьилтал Расул ХIамзатовлул назмурду. Ниттил маз ябан аьркиншиврия агьамсса бия ихтилатру. Гьаннайсса, лакку мазрал цачIун бувну бия лак, лакку мазрал биялалул хъуншиврул, ххуйшиврул дакIру шадну дия. Диктантрай на щябивкIун бивкIра ттула ниттищал архIал ккалай ивкIсса академик АьбдурахIман Халиловлущал. Вагу ца тирхханну хьунни.
Салимат Мусиева, экономист-бухгалтер:
– Лакку диктант сававну чIявусса агьлу бувкIун бур, нагу Жуковское шагьрулия бувкIра. Ххариссара лакку маз ябансса шартIру душиву ва ябуван хIарачатрайми чIалай, укунсса агьлу жулва дянив буссаксса, жущава хьунтIиссар ниттил мазгу, миллатгу, аьдатругу ядан. На диктант чичинсса хIарачат бував, амма чирчусса бланк къадулав. Ламус хьунни, гъалатIру биялсса бушиву кIулли ттунма, чIявусса махъру хъамава бивтун бия. На ттулва ссурахъийн оьвтIий буссияв, гьуртту хьун бухьхьу тIий, вагу гъалатI бакъа чичин къашай тIий къабувкIунни, ламус хъанай. На маслихIат бавияв, ялунчIин, тулунчIингу вара даву дулларча, диктант къачичирчагу чIарав щябикIан бухьхьияра учара куну. Гъира багьминнал чичинссар, бувагу чичин къакIулминнал лакку мазрайсса гъалгъалия неъматвагу ласунссар. Ттун ххуй бивзунни Лакрал ккурандалул жагьилтурал ккаккан бувсса сценка, лакрал чIиви театр. ДакIнийн дагьунни цIуну дунияллийн увкнан цIа дизаврил аьдат. Ххуйсса аьдат дуссия жулла оьрчI кIанттуву ахIаймур аьдатгу. Вай аьдатру жагьилтуран, оьрчIан кIулну хъиннихха. Хъинну ххуй бивзунни лакку чичру дусса блокнотругу, диктантрал логотипращалсса ручкардугу. Ттулва луттирдал шкафрал чIамуй язимур кIану утти вайннухьгур бикIантIисса.
Диктант «ххювардай» чирчуми барча бунни
Сентябрьданул 22-нний, Дагъусттаннал мазурдий диктантру чирчусса КьатIаллил билаятирттал литературалул библиотекалий барча бунни марцIсса ххювардай диктантру чирчуми, вайннавух лакку мазрай чирчумигу. Цинявннан дипломру буллунни Аьрасатнал Президентнал Дагъусттаннал Постпред Владислав Тостюклул. Ванал бувсунни мукьва миллатрал агьулданул чирчушиву диктантру, аьмну 242 инсаннал. Вайннава 39 инсаннал «ххювардай» чирчушиву.
Вайнна дипломран лайкь хьусса лакралми цIарду: МахIаммадлул арс Давдиев Камил, Нураттиннул арс Мурсалов МахIаммад,Узунайл душ Саидова Альбина, Оьмардул арс Абакаров Рамазан , НурмахIаммадлул душ Билалова Анфиса, Нураттиннул душ Валиева Роза, Исмяиллул арс Халилов АьбдурахIман. ДакIнийхтуну барча буллай буру дипломирттан лайкь хьуми.
Анфиса Билаловал увкусса куццуй, «ххюннин» лакку мазрай диктант чичаврихлу буллусса диплом, ларайсса наградалун ккаллиссар. Ххи буванна, диктантрай гьуртту шавугу, хаснува гъурбатрай, мура наградалул кьиматрайсса бушиву.
ПатIимат Рамазанова
