Августрал 22-нний ЦIуссалакрал райондалул администрациялул къатраву хьунни Украиннал аьрщарай нанисса хасъсса операциялуву гьуртту хъанай бивкIсса, цIана кутIасса отпускрай бувкIсса аьралитуращалсса хьунабакьаву. Вайннавух бия мобилизоват бувсса, хушрай операциялувух гьуртту хьун ва контракт чирчуну лавгсса аьралитал. Хьунабакьаврий гьуртту хьунни ЦIуссалакрал райондалул бакIчи МаматIи ХIамзатов ва ванал хъиривчувтал.
МаматIи ХIамзатовлул аьралитурахь цIувххунни аьралитурал кулпатирттан ци кумаг аьркинну буссарив. СВО-рал гьурттучитурал бувсунни аьралий иширттая. Барчаллагь увкунни бигьа бакъасса заманнай цахара ва кулпатирттаха аякьа дуллалиминнахь ва ихIсандалул кумагру буллалиминнахь.
– Асар хъанай дур ва хъинну бусравну дур жухара дуллалисса аякьа. Гьарцагу дуркIсса посылкалущал жучIан диллай дур жула ужагъирттавасса гъилишиву, иминшиву. Цинявппагу аьралитурал цIания барчаллагь баян буллай ура, – увкунни ца аьраличувнал.
Шиккува кIицI лаган, аьралий операция байбивхьуния шийнмай ЦIуссалакрал райондалия тIайла бувкссар дуки-хIачIиялул ва цаймигу аьркиншиннарал щаллу бувсса гуманитар кумаг.
«НахIакь бакъару жува Аьрасатнал Ттугълил кьини хьунабакьлакьисса. МукIруну ура Аьрасатнал Ттугъ кьуват бусса каруннихь бушиврий», – увкуна райондалул бак1чинал хъиривчув Султан ХIамзатовлул.
Ахирданий МаматIи ХIамзатовлул барчаллагь баян бунни аьралитурайн.
– ХIакьину зу, оьрмурдан нигьачIаву дунугу, вас-ццах бакъа Ватан дуручлай буру. Зу кунмасса патриотътал буссакссса ххувшаву ласуншиврийнсса вихшала хъиннура цIакь хъанай дур. ЧIа тIий ура цинявппа цIуллуну-сагъну зула нитти-буттачIан, кулпатирттачIан зана шаву», – увкуна МаматIи ХIамзатовлул.
Имара Саидовал
