«Ттул Дагъусттан – ттул ххуллурду» регионал проектрал лагрулий Ккуллал шяравусса АбутIалиб Гъапуровлул цIанийсса кIичIираву асфальт бутIлай бур. ХIакьинусса кьини давуртту къуртал шавай дур, ливчIун бур плитка ва чартту бакьин.

Плиткарду даркьусса ххуллу бантIий бур азарханалучIату паркрачIан, шиччагу школалул хIаятрачIан бияннин.
Вай давуртту дуллалиссар райондалул агьалиная транспортрах дартIсса налогирттал харжлугърайну. Вайннухва бакьин бантIий бур машинартталми ххуллурдугу.
– Ва кIичIиравун асфальт бутIлатIисса, ва чIявусса инсантал заназисса ххуллу бунутIийри. ВаничIан гъанну бур азархана, футболданул площадка, спортзал, школа ва парк. Муниятур ва региондалул программалувун багьлагьиссагу. Давуртту къуртал дан ккаккан бувну буссар августрал ахирданийннин, – кунни райондалул бакIчинал хъиривчув Ажуб Халидовичлул.
Вара журалул давуртту дайдирхьуну дур Ваччиял шяравугу.

Аминат АхIмадовал