Вана сайки мукьра шинни Сириянаву, личIи-личIисса гру­ппировкардал дянивсса питнарду ва талатавуртту сававну, кьурчIисса ишру хъанай. Билаятрай ттизаманнул ярагъ ишла бувну, динну ва миллатру цIакьлин бувгьуну, чIявусса агьали зулмурдахьхьун бириллай бур, агьалинал ихтиярду ссуссукьу дуллай, ми къума-цIан буллай бур.

Сириянавусса ишир­ттавух кьатIатусса гужругу хIала бухлай, миннавухва террористъталгу, тагьар оьнура оьлуккин дуллай бур. «Исламское государство» тIисса террористътурал дастталул ва цаймигу группировкарттал Сириянаву цичIав тахсир бакъасса инсантал аьщун бизлай, кьатI буллай, оькки­сса зулмурду буллай бур. Исламрал дуниял кIидищун дуллалисса, Сириянаву ва Гъанмур Машрикьлив аьмну гъургъазарду дувансса мурадрай къуццу тIий бур. Бусурмангу, цайми диннал агьлугу кувннайн кув бичинсса, хIусутшиву рутансса иширттахун багьну бур. Му агьалинащалсса дяъвилуву чIявусса оьрчIру, хъами, къужри, аьлимтал ливтIунни, бунагь бакъасса инсантал оьрмурдацIа бунни, чIявусса агьалинан мина кьаритан багьунни. Мубараксса Кьурандалий бур, «ца бунагь бакъу оьрмулуцIа уваву, инсаният аьщун дизаврин ккаллиссар» тIий. Ми ишру хIисавравун лавсун, Дагъусттаннал Аьлимтурал совет оьвтIий буру щаллагу дунияллийсса, чантI увкусса инсантурайн, нанияра жува цачIунмай хьуну, международный терроризмалущал талансса ххуллурду ва чаранну лякъинну, Сириянавусса гъургъаза дацIан дуванну, щаллагу исламрал дунияллун нигь дусса балаллуя байщун буванну, лявхъу миналий яхъанан ччисса Сириянал халкьуннал ихтияр дуруччинну тIий. ХIакьину жунма, хъинну хъирив лавну, тIайлану кьимат бищун багьлай бур Сириянаву хъанахъимунин, жагьилтал махъаллил буван багьлай бур ИГИЛ-данувун хIала шаврия. Цуксса кьурчIинугу, ми террористътурал кьюкьраву бур Дагъусттаннал жагьилталгу. Ми хъяврин хьуну бур. Дагъусттаннал аьлимтурал ва имамтурал биялсса хIарачат бувссар жагьилтал бяйкьу ххуллийн багьан къабитан, амма аьлимтурал ва имамтурал тIутIимур къалалавсунни миннал. Къаххуйсса иширттавун багьунни. ИГИЛ-данул бакIчитурал идеология такфирданийн чул бивщусса дур. Ми бур бусурман умматрай вих бакъашиврул (куфра) аьйрду ляхълай, ми бяйкьлакьиссар. Сириянаву оьрчIру ва хъами литIлатIаву, аьщун бизавуртту ва цIу щуну ччуччавур­тту исламрацIун бавкьусса затру бакъар, мукунсса иширттайнгу жигьад къаучайссар. Аьрасатнал мудангу дусшиврийсса арарду ду­ссия Сириянащал ва аьрабнал билаятирттащал, Сириянаву къаххуйсса ишру хъанай байбишайхтува, щалла дуниял гьужумрай дуккарчагу, Сириянаву хъанахъимур дакьаврийну щаллу бан аьркинссар тIисса тарап дургьуссия. Уттигу, Сириянаву дяъвилул къавгъа сукку бувминнайн жу оьвтIий буру, сириянал агьалинал бучIантIимунил пикри бувну, пасатсса дяъви бацIан буван бакIрайн ласияра тIий. Дагъусттаннал Аьлимтурал совет дакI дарцIуну бур, Аьрасат Сириянавусса иширттавух хIала шаврил мурад – ччясса мутталий Сириянаву дакьаву шаву, инсантал оьрмурдацIа буллалаву дацIан даву бушиву. Жу оьвтIий буру цинявгу бусурманнайн, исламрал умматрал дянив, хаснува Сириянал мубараксса аьрщарай, Шамлив чIярусса шиннардийсса дакьаву дагьния тIутIисса дуаьрду дувара тIий.
Дагъусттаннал
Аьлимтурал совет