МахIачкъалалий, Журналистурал союзрал къатраву, хьунни ДР-лул связьрал ва телекоммуникациялул министр Юсуп МалламахIаммадовлул пресс-конференция. Шикку гьуртту хьунни республикалул СМИ-дал каялувчитал ва журналистал. Конференция дачин дурну ия Дагъусттаннал Журналистурал союзрал председатель Аьли Камалов.
И. Саидова
Юсуп МалламахIаммадовлул бувсунни махъсса ппурттуву министерствалул кьамул дурсса проектирдая ва ми мюнпатну зузи даврия. Ванал кIицI лавгунни Минкомсвязьрал хъунмур даву паччахIлугърал властьрал органнал даврицIун дархIусса душиву.
— Гьашинусса шинал дахIаврил министерствалул жулла республикалий бивхьуссар ГЛОНАСС-спутникирттащалсса 16 референцный станцияртту. Утти ми станциярттай дирхьусса оборудованияртту сантирайн дичлай, миннуха зий буссару. ГЛОНАСС-рал технологияртту зузи даврийну чIярусса бигьашивуртту хьунтIиссар, бюхъантIиссар дуклаки оьрчIру, пассажиртал ххилаххисса транспортрал хъирив бизан, ччясса мутталий «анавар кумаграйн» оьвчин, — увкунни Юсуп МалламахIаммадовлул.
ЦIусса технологиярттая бакъассагу, министрнал балжину бувсунни республикалийсса документру электрон журалийн буцаврил системалия. Ванал бусаврийн бувну, цIанакул ведомствардал кувннал кувнначIан документру электрон журалий тIайла буклай, даву бигьану ва анаварсса мутталий дуллалисса система дачин дурну дур. ХIакьинусса кьини Минкомсвязьрал цинярда ведомствардайсса идарартту буцлай бур электрон журалий документру щаллу буллалисса системалийн.
— Жул агьаммур мурадгу, чагъардал даву духлаган дурну, электрон журалул система ххуттавун рутавур. ЗахIмат хъанай бур чагъардайсса документру дузал буллан, бувну махъгу къулбасру дуван лавсун занай хъуннасса чIун лаглай дур. Мунияту жу ряхра паччахIлугърал органнал властьращал ва шанна муниципал сакиншиннаращал зузи дарду электрон журалий документру щаллу буллансса цIусса пилотный проект, — увкунни министрнал.
Мунал ялагу бувсунни зунттал шяраваллаву МТС-рал связь хьхьичIуннай давриха зий бушивугу. Пикрилий бур 3 G сигналданийсса МТС-рал дахIаву дурагу дакъасса районнайгу зузи дуван.
— МТС-рал дахIаврин хас бувсса масъалартту Минкомсвязьрал аякьалийнгу лавсун буссар. Вай масъалартту дузрайн буккан баву мурадрай, чIарав авцIунни Республикалул БакIчи Рамазан АьбдуллатIипов. Цаппара муниципал сакиншиннардащалгу маслихIат ккавкссар дахIаврил базовый станцияртту бувансса. Станцияртту буллалисса чIумал, агьалинан миннуя зарал бакъашиву бувчIин бан хъинну захIматну бикIай. ЦIанакул дахIаврил компаниярттал каялувчитуращал инвестициярттал кьутIирду дуллай, зий байбивхьуну буссару. Республикалул 140 шяраву базовый станцияртту бувансса проектру дацIан най дур 450 миллион арцун, — увкунни Юсуп МалламахIаммадовлул.
Ва пресс-конференциялий мукунма гьаз хьунни региондалийсса МФЦ-рду чIяву баврил ва Дагъусттаннай геоинформациялул система зузи даврил масъала. Му бакъассагу, Юсуп МалламахIаммадовлул дакIнийн бувтунни «Сочи-2015» форумрай Дагъусттаннал, АьФ-лул Минкомсвязьрал ва «Ростелеком» ПАО-лул дянив кьутIи чирчушиву.
– Ва кьутIилул мурад хъанай бур Дагъусттаннай телекоммуникациялул инфраструктура ва хIукуматрал информациялул системарду хьхьичIуннай даву. КьутIилийн бувну, Дагъусттаннай анаварсса бущилийсса интернет зун тIий дур агьали ялапар хъанахъисса 309 кIанай, — увкунни министрнал.
МалламахIаммадовлул кIицI лавгунни цува хIадурну ушиву республикалул журналистуращалгу хIала-гьурттуну зун. Ванал маслихIат бунни цачIу сакин дан электрон журалийсса миллатрал прессалул проект.
