Июльданул 28-нний Москавлив, «Аргументы и факты» издательстволул къатлул, халкьуннал шаэр Расул ХIамзатовлул 100 шинал юбилейран хасну, «Край любви мой Дагестан» тIисса мультимедийный проектрал презентация дунни.
ПатIимат Рамазанова
Ва проект бартдиргьуну дур Культуралул иширтталсса буллалисса Президентнал фондрал кумаграйну. Аьмну ва дур журналистътурал, редактортурал, суратрищултрал, видеографтурал уртакьну дурсса даву. Расул ХIамзатовлул цIаницIун дархIуну, проект Дагъусттаннал ххуйшивуртту ккаккан дуллалисса дур: культура, тарих, архитектура, гьарзат дур ва проектраву, гьарзатгу шаэрнал творчестволуцIун дархIуну дур.
«Жу ва проектраха зузисса чIумал, вакссара хъуннасса лагрулийсса даву хьунссаххай бакъассияв, поэзиялия хъиндайдихьу дурну, 3D экскурсия бувну, щалвагу Дагъусттаннайх буккан хъанахъисса даву хьунни», – увкунни «Аргументы и фактылул» гендиректор Руслан Новиковлул.
Москавуллал миллатрал политикалул департаментрал каялувчи Виталий Сучковлул кIицI лавгунни Расул ХIамзатовлул шеърирду гьарманал дакIнивун буххайсса, бюххайсса бушиву, маслихIат бунни цал-бунугу шаэрнал миналийн ЦIадавгу, щалвагу планеталул геологиялул музейран ккаллисса Сулакьрал каньондалийнгу биян.
Ихтилатру бунни шаэрнал душ, Дагъусттаннал музейрал директор СалихIат ХIамзатовал, Дагъусттаннал Постпредстволул вакил ХIамзат ХIамзатовлул, ДНЦ РАН-далул Мазрал, культуралул ва магьирлугърал институтрал литературалул отделданул каялувчи АхIмад Муртузялиевлул. Вара проектрал лагрулий миллатрал колорит ккаккан дуллалисса, хъамал дагъусттаннал ужагърайн хъамалу буцлацисса даву дунни лак заллусса «Жи есть» ресторандалулгу.
Ресторандалувун бувкIцириннал кIицI лавгунни, буниялттунгу дагъусттаннал ужагъ ттизаманнул журалий авурну, аьнтIикIану чIалачIи буллалисса даражалийсса даву душиву. «Жугу Дагъусттаннал культура ядавриву жущава шайкунсса бутIа бихьлай буру. Жулла культуралул, халкьуннал аьдатирттал кьимат жучIава бушиву чIалачIи буллай буру», – увкунни «Илчилул» корреспондентнахь ресторандалул заллу, Камиллул душ Паркьуева Камилал. Шиккува кIицI лаган, ресторан тIивтIуну бур 2008 шинал декабрь зуруй.
