П. Рамазанова
МахIачкъалаллал 30-мур школа мусил медальданущал къуртал бунни Расуллул душ Идрисова Мадинал. Ванил нину Светлана 1-мур ЦIувкIратуссар, цуппагу халкьуннан ххуйну кIулсса артист, Лакрал театрдануву чIярусса шиннардий зий ивкIсса Гьаруннул душри.

Мадинал ппу Гъуниннал райондалиятусса ур. Ванил, школа кунма, марцIсса ххювардай, къуртал бунни МахIачкъалаллал ОьрчIал магьирлугърал 6-мур школагу. «Мадина дуккавривугу итххявхсса, школалул жяматийсса оьрмулувугу мудан хьхьичIунну гьуртту хъанахъисса душ бур. Ванил музыкалул конкурсирттайгу хьхьичIунсса кIантту бувгьуссия, кIулшивурттал хъирив багьсса, творчестволул гьунар бусса, школалул цIа-кьини гихуннайгу гьаз дувансса душри» , – тIий бур директор С. Малиотаки.

Жугу, кIулшивуртту гихуннайгу куртIгу, цIакьгу дуллансса гъирагу, магьирлугърал дуниял ярг дувавривугу бутIа бишинсса цIуллушивугу чIа тIий, барча буллай буру кIивагу школа марцIсса ххювардай къуртал бувсса Идрисова Мадина. Дуккавривугу, дуллалимунивугу тIайлабацIу чIа тIий буру!