ЖАХIПАРДУЛ АРС ХIАСАНОВ ИЛИЯС
Октябрь зурул 13-нний, хар-хавар бакъана инфаркт хьуну, оьрмулул 71 шинаву дунияллия лавгунни хъинну дакIнил хъинсса, давриву хьхьичIунсса ва марцIсса, ас-намусрал увччусса чув-адамина, Буршиятусса ХIасанов Илияс ЖахIпардул арс.
Илияс увну ур 1944 шинал Буршиял шяраву. АцIва класс къуртал бувну бур Гъумук, детдомрай унува. Армиялия махъ дуклан увххун ур Ураллал строительствалул институтравун. Га къуртал бувну махъ зий ивкIун ур Аьрасатнал личIи-личIисса шагьрурдай. Анжилив зана хьуну махъ зий уссия хъунама инженерну «Кавсантехмонтажрай», яла «Южстальконструкциялий», ООО «Махстрой» ва цаймигу кIанттурдай (Чачаннаву, АьсатIиннаву, Къабардин-Балкарнаву), личIи-личIисса телевизордал мачтарду, ххаллилсса ламурду буллай.
Дуллуну дур ванан диялсса грамотартту, бахшишру, ванал ларсъссар «Заслуженный строитель Республики Дагестан» тIисса цIагу.
Илияслул, цалва аьпалун кунма, бакIрайнгу лавсун, хIухчалтран ва бахьттагьалтран бигьахьувча куну, Буршиял ва Ххюлуссуннал дянивсса ххуллий, кIива ххаллилсса ламу бувссия цаппара шиннардил хьхьичI.
Дагъусттаннал ва Аьрасатнал цIанихсса строитель ЖахIпардул арс Илияс ХIасанов аьпалул шаврийн бувну, дакIнийхтунусса жижара буллай буру ванал кулпат Сабиратлухь, ссу Бадрижамаллухь, оьрчIахь, оьрчIал оьрчIахь ва цинявппагу агьлу-авладрахь.
Цал бунагьирттал аьпа баннав, рухI паракьатний дишиннав.
Дустурал, гьалмахтурал цIания МахIаммадов
Арбухан, Шалласу
Шалласуев, МахIаммад Кьурбан Ссаламов, Аьбдул Барий ХIусайнаев
——————————
КЬАЛАНДАРДУЛ ДУШ АЬБДУЛВАХIИДОВА АЬЙШАТ
Октябрь зурул 14-нний, оьрмулул 77 шинаву, хар-хавар бакъасса бивкIулул жуятува личIи бунни дакI-аьмал ххуйсса, гьарцагу кIулначIа хIурмат бусса, ххаллилсса оьрчIал нину, ас-намусрал бувччусса зунттал хъамитайпа, Кьаландардул душ АьбдулвахIидова Аьйшат.
Аьйшат бувну бур 1938 шинал Буршиял шяраву. Ва бия хъинну захIмат ххирасса, марцIсса дакIнил заллу. Ванил цилва оьрчIругу, цуппа кунма, хъунанал хIурмат буван кIулну, захIмат ххирану тарбия бувну бия.
Аьйшатлул бивкIулул кьурчIишивугу кIидачIлай, жижара буллай буру ванил оьрчIахь, душваврахь, уссурссуннахь, цинявппагу гъан-маччаминнахь. Цил бунагьирттал аьпа баннав, рухI алжаннул ххари даннав.
Ванин бакъамур оьрчIан булуннав.
Буршиял жяматрал цIания
М. Якьубов
———————————
АЬБДУЛЛАГЬЛУЛ АРС
ДАВДИЕВ ГЬАРУН
Октябрьданул 19-нний, чансса хIаллай къашайгу хьуну, аьпалухьхьун лавгунни Ккуллал шяраву цIадурксса дарзинал Давдихъал Аьбдуллагьлул ва Хъунмутахъал Марияннул арс Гьарун.
Гьарун увну ур 1961 шинал Ккуллал шяраву. Буттал шяраву дянивмур даражалул школагу, яла технологиялул училищагу къуртал бувну, зий уссия колхозраву жура-журасса давурттай. Армиялия увкIун мукьах, колхозрал давурттайгу зий, цала буттал зумуну, дарзинал давугу дуллай уссия.
Чув, ци дуллай, ссаха зий унугу, хъунимигу, мюрщимигу мунащал, ца уссищал кунма, хIурматрай бикIайва, мунал бия чIявусса дустал, гьалмахтал.
Гьарун гьарца бивкIу-буккулий чялишну гьуртту шайссия, цинявннал чIарав ацIайсса, яхIгу, инсаншивугу дусса зунтталчу ия.
Гьаруннул ва ванал кулпат ХIуруннул буссия кIия арс ва кIива душ. Мигу дахьва цалва оьрмулул ххуллийн бивчуну, уссия минная ххарину, рязину. Мунал дувансса давурттивгу, хияллугу ливчIунни. Цибанссар, лавгунни жуятува, оьрмулул уччиннин къаивтун.
Гьарун жуятува батIул шаврил къумашивугу кIидачIлай, жижара буллай буру ванал кулпатрахь ХIуруннухь, кIиягу арснахь Давдихь ва Мажидлухь, душваврахь Аьшурахь ва Марияннухь, уссурваврахь, ссурваврахь, цинявппагу гъан-маччанахь. Гьаруннун къабуллусса оьрму махъминнан булуннав. Гьав нурданул дуцIиннав, алжаннул ххари аннав.
Ккуллал
ва ЦIуссаккуллал жямат
———————————
ХIАЖИМАХIАММАДЛУЛ АРС КЬУРБАНОВ КЬУРБАН
Октябрьданул ахирданий аьпалухьхьун лавгунни Качалхъал ХIажимахIаммадалул арс Кьурбанов Кьурбан.
Кьурбан увну ур 1942 шинал Ккуллал шяраву цIадурксса тIаннул усттар ХIажимахIаммадлул ва Аминатлул кулпатраву. Буттагу армиялия къаувкIун, Кьурбан ниттил хъуна увссар. Ккулув дянивмур даражалул школа къуртал бувну махъ шупиршиврул курсругу бувккуну, 3 шинайсса аьрали буржгу лавхъун, зий ивкIссар Ккуллал колхозраву шупирну. ХхюцIалунния лирчусса шинну дурссия Кьурбаннул шупирну зий. Аьрали къуллугъ буллай унигу мува пишалий зий ивкIссар, армиялул командир, генерал-полковник увцуну заназисса машиналий. Мунан дуллуссар орден «Знак почета» ва медаллу, хIурматрал грамотартту ва барчаллагьрал чагъарду. Кьурбаннул цалла дакIнил хъиншиврул, инсантурахсса ччаву ва хIурмат бушиврул цала чулухунмайгу мукунссава хIурмат бия. Чу зий ивкIун ухьурчангу, ванал так хIурмат бакъа хIалал къабувссар.
Кьурбаннул ва ванал кулпат Муслил, хъунигу бувну, чивун буккан бувссар кIия арс ва кIива душ.
Цибанссар, лавгунни Кьурбан чIун дакъана, оьрмулуву чIарав ацIан уссу акъа, ссу бакъа яхъанай ивкIсса, яхI ххисса чув-адамина. КьурчIисса бивкIулул жижара буллай буру Кьурбаннул кулпатрахь Муслихь, кIиягу арснахь ХIажимахIаммадлухь ва АхIмадлухь, душваврахь Аллахь ва Лианахь, куявтурахь, махъсса цинявппагу гъан-маччанахь.
Кьурбаннун къабуллусса оьрму оьрчIан, душваран, кулпатран булуннав. Гьав нурданул дуцIиннав!
Ккуллал жяматрал цIания Давдиев Кьурбан
——————————
Инсан сагъну уссар, му дакIний уссаксса
Цакуну хьхьичI дацIай ванил сипат, тIуллу, бургаву, дакIнийн багьай ванил махъру…
Гьашину кIира шинни жущалва Сияли бакъа. Цавайннан ва бия хъинсса дус, цавайннан ххирасса преподаватель, гъан-маччанан тIурча, дакI цIимисса ссу.
Ванил яла ххуймур хасият дия биччибакъулшиву къадаву. Ва цищала зузиминнал, цила студентътурал ва мачча-гъанминнал оьрмулий, лагма-ялтту хъанахъимуний дакI аьтIисса бия. Цинма бувмур, чIивисса зат бухьурчангу, ванин тачIав хъамакъабитайва. Цинявннал чулухуннайсса ванил аякьа хъуннасса дикIайва. Цайминнаву мукунсса хасиятру хьхьичIунну дакъашиву мунин асар хъанан бикIайва. Сияли хъинну ххари шайссия телефондалийн оьвкусса гьарица инсанная, цуппа барча буллай гьан дурсса открыткалия, хъярчийсса эпиграммалия.
ДакIнийри, цал му бувсса кьини на хас бувссия мунин шеърирдал ца-кIива хха. Му хъинну ххари хьуна, гьарначIан оьвтIий, ми шеърирду ккалай бия. Сияли хъинну ххари шайссия, компаниялий цихьхьунма махъ лахъан булайхту. Махъгу мунил усттарну лахъайссия. Ванил яла ххирами махъругу бия «Ччаврихлу» тIисса. Мугу хъуннасса мяъналий учайва. Ванин хъинну ххирая цила кулпат, душру, душнил оьрчIру, гъан-маччами, щукрулий бикIайва гьарицагу ва дунияллий жунма итабавкьусса гьантлийн. ХIат-хIисав дакъасса ччаву дия цуппагу ххирасса, циннагу ххирасса буттал шяраваллих Ккурккуллах.
Ва кIулминнан тачIав хъамакъаритантIиссар Сиялил чаннасса симан ва уздансса тIуллу.
Галина Буттаева
