Июньдалул 29-нний ГьунчIукьатIрал школалий 11-мур ва 9-мур классру къуртал бувсса оьрчIан буллунни аттестатру. Лавайсса кьиматирттащалсса аттестат ва мусил медаль ларсунни МахIаммадлул душ Аймисай Сулаймановал.
Аймисай бур итххявхсса, дуккаврил гьунар бусса, гьарица чулухасса кIулшивуртту дусса душ. Школалий дуклакисса 11-гу шинал лажиндарай ва цалагу дарсирдайн хIадур къавхьуну бувкIун бакъар. Аймисай мудангу гьуртту шайсса бивкIун бур школалул, райондалул, республикалул конкурсирдай ва олимпиадарттай. Бугьайсса бивкIун бур хьхьичIунсса кIанттурду.
Ванил 9-мур класс къуртал бувсса чIумалгу ятIул аттестат лавсъссия. Уттигу ккаккан бунни цила бюхъу-бажар. Ккаккан бунни, циксса тIалавшиннарду духьурчагу экзаменнай, хIарачат барча, ми ххювардай дулун хьунтIишиву. Аймисайхь дарс дирхьусса учительтал ххарину ва пахрулий бур цала ученицая, чIа тIий бур ванин ттиния тихунмайгу тIайлабацIу.
