Дагъусттаннал халкьуннал шаэр Расул ХIамзатовлун 100 шин шаврин хасну, «Школа безопасности» программалул лагрулий Казбековуллал райондалийсса Дылым шяраваллия арх дакъасса Туристътурал кьанив хьунни Республикалул туристътурал ва краеведтурал 67-сса слет. Ва сакин дурну дия Казбековуллал райондалул администрациялул ва Гьунарду итххяххан баврил «Альтаир» тIисса центрданул зузалтрал.
Мукьва гьантлий 13-нния 16 шинайн бияннинсса оьрмулувусса Дагъусттаннал школардал дуклаки оьрчIал ккаккан бунни цала гьунарду командарттавусса ва цалалусса бяст-ччаллаву.
Бяст-ччаллаву гьуртту хьунни 15 команда. Оьрмулул шиннах бурувгун, гьуртту хъанахъими бавчIуну бия шанма бутIуйх. ЦIуссалакрал райондалия шикку гьуртту хьунни ЦIуссаккуллал 2-мур школалул дуклаки оьрчIру. Ми гьуртту хъанай бия мюрщиминнал группалуву. Командалул каялувчину бия школалул физкультуралул учитель Издаг Сулайманова. Ванил кумагчиталну хьунни географиялул учительтал Мария Рамазанова ва Сурая ХIайдарова. Краеведениялулмур бяст-ччаллайн оьрчIру хIадур бувну бия географиялул учитель ва краевед Сулайман МахIаммадовлул. ОьрчIан слетрайн аьркинмунил дузалшинна дунни школалул директор Татьяна Айгуновал ва хозяйстволул бутIулсса байсса мунил хъиривчув МахIаммадрамазан Сулаймановлул. Слетрал лагрулий хьунни спортрал ва краеведениялул бяст-ччаллу, викторинарду. ЦIуссаккуллал дуклаки оьрчIал бувгьунни ца цалчинсса ва шанма кIилчинсса кIанттурду. Циняв бяст-ччаллал хIасиллу дурну, командалун буллунни мукьилчинсса кIану.
Краеведениялулмур конкурс хьунни аьмсса командалул бяст-ччаллия личIину. Ванил бия шанма ятIап: доклад хIадур баву ва му буруччаву, краеведениялул викторина. Вай бяст-ччаллаву ЦIуссаккуллал школалул бувгьунни шамилчинсса кIану. Шикку гьуртту хьусса Амина МахIаммадовал докладран жюрилул лавайсса кьимат бивщунни.
