«Горцы» фестиваль
Вай махъсса гьантрай Дагъусттанная хьуну бия Аьрасатнал регионнал ва чил билаятирттал творчествалул коллективирттал дянивсса культуралул диалограл майдан – шикку най дия Дунияллул халкьуннал дянивсса фольклорданул ва аслийсса культуралул ХХI «Горцы» фестиваль.
Ванил лагрулий жулла республикалул хъуншагьрулий ва махъсса муниципалитетирттай хьуна чIярусса шадлугъру. Вайннул дайдихьу дурсса «Каспий – дусшиврул зумарду» цIанилусса фестиваль хьуна МахIачкъалалив ва Дарбантлив.
ва ванил хъиривчу Марита МухIадова
«Горцы» фестивальданул гьурттучитуращал
МахIачкъалалив «Каспий – дусшиврул зумарду» фестивальданул лагрулий хьуна «Традиции народного костюма Каспия» тIисса байран-дефиле, Дарбантлив – «Дербент – перекресток цивилизаций» цIанилусса концерт, Пагьламантурал байран, «Балай уча, аьшукь» байран, халкьуннал канил пишардал мастер-классру ва выставкарду.
«Горцы» фестивальданул лагрулий Яруссаннал театрданул хьхьичI хьуна халкьуннал творчествалул «Аьрасатнал чIурду» тIисса байран, Лениннул майданнив тIурча – «Халкьуннал аьдатру» цIанилусса байран. Фестивальданул гьантрай най дия «Фестивальданул открыткартту» концертру.
Фестивальданий хьусса чIяру шадлугъирттавух дия «Русская поляна» цIанилусса оьруснал культуралул байран, «Фольклорданул шествие», «Жула Расул» литературалул марафон, «Ттул Дагъусттан – ттул Аьрасат» концерт ва м.ц.
Июньдалул 30-нний Р. ХIамзатовлул цIанийсса Национал библиотекалий ДР-лул культуралул министр Зарема Буттаева хьунабавкьуна «Горцы» фестивальданий гьуртту хъанахъисса коллективирттал каялувчитуращал ва вакилтуращал.
Шивува хьусса ккуркки столлал давурттавух гьуртту хьуна Беларусьнавасса, Монгъолнавасса, Азирбижаннаясса, Аьрасатнал регионнаясса (Ухссавнил АьсатIиннал, Къарачай-Чаргаснал, Къабардин-Балкьарнал, Ингушетиянал, Чачаннал, Ухссавнил АьсатIин-Аланиянал, Къалмукьнал республикарттаясса, Донецкаллал Халкьуннал Республикалиясса, Астраханнаясса ва чIявусса цаймигу) творчествалул коллективирттал каялувчитал ва усттартал.
ДакIнийн бутан, «Горцы» фестиваль дуллалиссар Дагъусттан Республикалул БакIчинал, АьФ-лул Культуралул министерствалул, Аьрасатнал ПаччахIлугърал В.Д. Поленовлул цIанийсса Халкьуннал творчествалул къатлул, ДР-лул Культуралул министерствалул ва Республикалул Халкьуннал творчествалул къатлул чIарав бацIаврийну.
