Ци зун аьркинссар, агана ви­ла чулухуннай тIай­ла­дакъашиву дурсса, вила ихтиярду къадурурччусса иш хьурча?

ХьхьичIва-хьхьичI, мугьлат бакъа баян бан аьркинссар полициялул органнайн. Мукун­сса иширал хIакъиравусса аьрза чичин бучIиссар ччимур чIумал, МВД-лул кIанттул органнайн бувкIун; официал сайтирдайхчин; телефондалийн 102 номерданийн оьвкуну.
Каних чивчусса аьрза булаву бакъассагу, бучIиссар оьвкуну бусангу.
Аьрзри кьамул байссар хьхьу-кьини къаувкуну, виваллил иширттал кIанттул органнал дежурная частьрай.
Виваллил иширттал органнал зузалтрал кьамул бан аьркинссар тахсиркаршивурттал хIакъиравусса ччимур аьрза, так МВД-лул кIанттул органнал административ къатрал кьатIув.
Закон къадуруччаврил хIа­къи­равусса информация щаллусса бакъахьурчагума, кьамул бан аьркинссар. Хьумунил хъирив лаяву ва чаран лякъаву – му полициялул давур.
Ци чулийгу, дакIний битияра: цуксса мяълумну, балжину бувсрив зу зула хIалкьазия, мунийн хъар хьунтIиссар полициялул зузалал вил аьрзлул хIакъираву дурмунил хIасиллу.

ДакIний битияра:
цIа дакъасса аьрза бухьурча, мунил хIакъираву уголов дело сукку къадантIиссар;
полициялул органнайн бу­чIарча, ккаккан бан аьркин­ссар зула цIа-бакI дусса документ;
телефондалувух оьвтIий бухьурча, бусияра цIа, фамилия, буттал цIа, зува ялапар хъана­хъисса адрес, телефон;
тIайлабакъасса аьрзлул хIа­къираву уголов жавабрайн буцайссар;
тахсиркаршиврул ягу административ тIулдакъашиврул хIакъиравусса аьрза кьамул буллалийни, дежурная частьрай зухьхьун регистрациялул номерданущалсса аьрза кьамул бувшиврул талон дулун аьркинссар;
аьрзлул хIакъираву ци хIукму бувссарив, чагъар чивчуну ягу электрон журалий, баян бай­ссар аьрза бувманайн, му бувну 24 ссятрал дянив. Цумур бухьурчагу аьрзлул хIакъираву хIукму байссар уголов дело су­кку дан­сса ягу къадансса, ягу му аьркинсса органнайн тIайла бу­ккансса;
зула аьрзлул хIакъиравусса информация ласун ва хIасиллая кIул хьун шайссар виваллил иширттал ягу му буллусса органдалул хъунаманачIан увкIун.

КIулну бикIан:
агана зул аьрза виваллил ишир­ттал органнайн багьлагьисса бакъахьурча, му тIайла буккайссар хасъсса федерал органнайн;
инсаннай уголов делолийн багьлагьисса тахсир ккаклаки­сса аьрза, му ххал бивгьу­сса хIасиллайн бувну, судрайн тIайла буккайссар;
следовательнал ягу дознавательнал хIукмулущал ягу цайми иширттащал рязину бакъахьурча, зухь ихтияр дуссар мунил хIакъираву силистталул органдалул каялувчинайн ягу прокурорнайн буккан. Бюхъайссар судрайн булунгу.
Балики полициялул зузалал уголов дело сукку къадарча, тахсир хьу­ма жавабрайн къаувцуну къаличIантIиссар. Бюхъайссар, аьрза судрайн булун аьркинсса иш бикIан. Зула ихтиярду дуру­ччиншиврул, виваллил иширттал органнайн аьрза булаврий гьашиву къадурну, зувагу шаймур буллан аьркинссару.
ВичIи дишин аьркинссар полициялул тIутIимуних. Масала, квартиралува зат дарцусса иш бухьурча, мичча занай гьармунийн ка щилан къабучIиссар, цурку ашкара анмур хаварба­къулий лиххан къадан.
Агана хIарамзадатурая телефондалийхчин зарал бивну бухьурча, телефондалий цукунчIавсса операцияртту мабувару, оьвтIий ивкIманал номер къабяйкьин. Хъиннува хъинссар полициялул зузалт бучIаннин му лещарча. Хъинссар, анаварну банкрайн оьвкуну, вила счетращалсса операцияртту блокировать дувара учирча.
Уголов процесс ва судопроизводство наниссаксса хIаллай, зарал бивманахь ихтияр дуссар:
— тахсир хьуманай ци тахсир ккаклакиссарив кIулну бикIан;
— показанияртту дулун, цайнна, цала кулпатрайн ва гъанчувнайн къаршисса личIаннин.
— ниттил мазрай бусан хьуншиврул уквасса таржумачи тIа­лав ан;
— процессрал документирттал копияртту ласун;
— судрал инстанциярдай уголов дело ххал дигьлагьиний ми­кку гьуртту хьун.
ЦIубутIуйсса силистта къуртал хьуну махъ, зарал бивманахь ихтияр дуссар уголов делолул материаллащал кIул хьун, документирттал копияртту бан ва цанма ччимур мичча чичин. Мукунна ванахь ихтияр дуссар уголов делолул хIакъираву лавсун бувкIсса аьрзардая кIул хьун ва миннуцIун къаакьлакьисса цала пикри чичин.
Балики, цува ягу гъанчув нигьал буллалисса кIанттурду хьурча, цивппа буруччияра тIисса аьрза чичин.
Судрал хIукму бувну махъ, зарал бивманахь ихтияр дуссар мунищал рязи къахьун.
Зарал бивманал, граждан иск­райн бувну, мунал хъуслин ва дакIнин бивсса зарал, мукун­ма силистталул давурттацIун бавхIуну дан багьсса харжлугъ лахъан аьркинссар.
ДР-лул Виваллил
иширттал министерстволул сайтрая
ХIадур бувссар
Андриана Аьбдуллаевал