[dropcap]В[/dropcap]ай гьантрай, М.В.Ломоносовлул цIанийсса Москавуллал ПаччахIлугърал университет лавайсса даражалий къуртал бувну, ЯтIул диплом ва мусил медаль ларсунни Ккурккуллал шяравасса Камиллул душ Карина ХIажиевал.

Карина цила нитти-буттащал Москавлий ялапар хъанай буссар. 2019-ку шинал ванил Москавуллал школагу мусил медальданий къуртал бувссия. Медальгу кIира ларсъссия: ца – школа лавайсса кьиматирттай къуртал бувну тIий, цагу – ЕГЭ-дай лавайсса баллу (220-нния ливчусса) лавсун тIий.

КIицI лаган, Карина чIяву­чин ххуйну кIулсса, ММА-ин­дустриялуву цIа дурксса промоутер, FIGHT NIGHTS лигалул генеральный продюсер Камил ХIажиевлул душри. Каринал гьунаргу, бюхъу-хъитгу цила нитти- буттая ва бава-ттаттая ирсирай бивсса бухьунссар. Цила чIумал Камиллулгу Москавуллал школа мусил медальданий къуртал був­ссия. ХIакьину ва ци даражалул инсан уссарив гьарнан кIулли. Каринал бава-ттаттагу шяраву бусравсса агьлу-авладраясса дур­ккусса инсанталли. Кьадинахъал ХIажинал арс ХIажиев Аьбдурашид тарихрал элмулуву агьам­сса ахттаршиннарду дурсса аьлимчуври. 1963-ку шинал дурурччу­ссар тарихрал элмурдал кандидат хьунсса диссертация. 1967-ку шинал хьуссар тарихрал элмурдал доктор.

Шяпинал душ Элеонора ХIажиева хIакин-терапевт бур. Сайки 50 шинай зий бивкIссар Москавуллал Элмурдал академиялул азарханалий. Аьбдурашидлул ва Элеонорал буттахъулгу шяраву махъ нанисса, хIурматрайсса инсантал бивкIссар. КIивагу чулухасса агьлу-авладраву аьлимтал чансса бакъассар. Укунсса мархри бусса душнил гьунарданийгу, хьхьичIуннайшивурттайгу цучIав махIаттал къахьунссар.

Буниялагу, Карина гьарица чулуха итххявхсса душ бур. Ва лахьлай буссар лезгинкалий бизан «Ансар» тIисса ансамбльдануву. Каринан марцIну кIулли ингилис маз, махъсса 7 шинай лахьлай бур китай маз, уттигъанну тIурча, испан мазгу лахьлан бивкIунни. Щак бакъар, Каринал ттиния тихунмайгу циятува баян баншиврий.
Жуварив ванин чIа учинну так тIайлабацIуртту ва хьхьи­чIуннайшивуртту.