Хъамал кIул хьунни Республикалул туннурдал центрданул даврищал. Лавайсса кьиматрай кIицI ларгунни коллективирттал саргъунсса даву, хаснура Республикалул ва МахIачкъала шагьрулул клинический азарханардал, Дагъусттаннал кардиологиялул ва къюкIлил ва туннурдал хирургиялул центрданул даву.
«Дагъусттаннай чан хьунни оьттул туннурдал цIуцIавуртту сававну инсантал литIавуртту. Так ца СКФО-лий бакъасса, щала билаятрай хьхьичIун бувккунни ми цIуцIавуртту хъин давриву.
Жуща бювхъунни COVID-19 цIуцIаврия махъсса хъиличавуртту духлаган дан. Дагъусттаннайнсса хIакьинусса жул аьрххилул мурад республикалул цIуллу-сагъшиву дуруччаврил идарартту федерал экспертътуращал уртакьну зунсса ххуллурду лякъинссар, дагъусттанлувтурал цIуллу-сагъшиву дуруччаврил цIанийссар», – увкунни В. А. Алмазовлул цIанийсса НМИЦ-лул хъунама директорнал регионнайсса даврилсса буллалисса кумагчи Надежда Звартаул.
Гихуннайсса даврил ххуллурду ххал бигьлагьисса батIаву хьунни ДР-лул цIуллу-сагъшиву дуруччаврил министр Татьяна Беляева, Дагъусттаннал паччахIлугърал медуниверситетрал ректорнал буржру чIумуйну биттур буллалисса Висампаша Ханаьлиевлул, ДР-лул Халкьуннал Мажлисрал ЦIуллу-сагъшиву дуруччаврил комитетрал хъунама Илияс Маммаевлул, хъуними хIакинтурал ва республикалул экспертътурал гьурттушиндарайну.
БатIаврий кIицI лавгунни В. А. Алмазовлул цIанийсса НМИЦ ДР-лул Минздравращал уртакьну зун тIий бушиву. Центрданул зузалтрал консультация дурну дур Дагъусттаннаясса арулттурша къашайшалал, шаназаллий ххюттурша инсан хъин хьуну ур элму ахттар даврил Алмазовлул цIанийсса центрданий.
Руслан ХIабибуллаев
