[dropcap]В[/dropcap]ай гьантрай оьрмулул юбилей кIицI ларгунни оьрчIан кIулшивуртту дулаврил ххуллий хъунмасса захIмат бивхьусса ххаллилсса учитель ва тарбиячи, ЧIяйннал шяравасса Мисиду Аьлиловал.
[dropcap]М[/dropcap]исиду цуппагу чIярусса шиннардий Хъювхъиял ва ЧIяйннал школарттай зий бивкIсса бусравсса учительтурал душри. КIирагу шяраваллил жяматрал хIакьинугу хIурматрай кIицI лагай физкультуралул учитель Сулайман Аьбдуллаевич ва ванал кулпат, байбихьулул классирттал ва географиялул учитель ПатIимат Мусиевна.
Сулайман Аьбдуллаевич фронтовик ивкIун ур. Вайннал ряхва оьрчIава шамуннал учительнал пиша язи бувгьуну бур. Цинявппагу оьрчIру нитти-буттал захIмат ххирану, ас-намус буну тарбия бувну бур. Вай шяраваллил жяматрангу бусравну бур. Мисидул язи бувгьуну бур оьрус мазрал ва литературалул учительнал пиша.
[dropcap]М[/dropcap]исиду школалий дуклакинийва итххявхсса, дан-дитан кIулсса, цIуцIанпир бусса душ бивкIун бур. Ва гьуртту шайсса бивкIун бур школалий дуллалисса цинярда мероприятиярттай. Дирисса, хъап-хъит бусса душ ичIаллил, къурнил давурттаву нитти-буттангу ххуйсса кумагчи бивкIун бур.|
Ца ппурттуву, кIинттул, ниттил ва щинав кьуллалийн гьан бувну бур. Щин микIларчIун ляркъуну, бачIвасса бадрардащал къабучIан, микIирал къюмайртту гъаргъун, миннул бадрардугу бувцIуну бувкIун бур. Укун гьарица ишираву ххуллу ласун кIулсса душ бивкIун бур.
Учительтурал кулпатраву хъунма хьусса Мисидун школалий дуклакинийва учительнал пиша ххуй бизлай бивкIун бур.
– Ттун луттирду ккалан ххирасса бикIайва. Ппу чIявусса луттирду лавсун учIайва миха-тиха. Жухьгу луттирду ккалаккияра тIийна икIайва. Бюхъай луттирдал ххира бувну бикIан ттун филологнал пиша, – тIий бур Мисиду.
[dropcap]Ч[/dropcap]Iяйннал школагу ххуйсса кьиматирттай къуртал бувну, Мисиду бувххун бур Дагъусттаннал пединститутрал филологиялул факультетрайн. Институтравугу ва хьхьичIунсса студентътуравух бивкIун бур. Гьуртту шайсса бивкIун бур жяматийсса давурттавух. Дуклай бунува, сурат рищаврил кружокрайн занай, сурат рищун лархьхьуну дур. Стипендиялух фотоаппаратгу лавсун, шяраву хъатIай суратру ришлай, цинявппа ххари байсса бивкIун бур.
Цуппа студенткасса чIумалсса ца укунсса ишгу дакIний бур Мисидун. АрхIал дуклакисса душвавращал «Комсомолец» кинотеатрданувун кинорайн лавгсса чIумал, ванин ххал хьуну дур чIаравсса кафелуцIух цIу ларчIун най. Бажар бусса душнил, мугьлат бакъа гиккува бадра лявкъуну, щин дутIлай, цIу лещан дурну дур. Таний вания кказитрайгу чивчуну бивкIун бур.
Институт къуртал байхту, Мисиду тIайла бувккун бур Хъусращиял школалийн. Ца шинавату, Ккулув цIуну тIивтIусса школалий оьрус мазрал учитель аьркинну ур тIий, кIиккун гьан бувну бур. КIикку зий шанна шин шайхту, 1977 шинал, щар хьуну, ласнащал, Аьлиллущал, Къизлардайн бивзун бур. Аьлил гийх инженер-гидротехникну зий ивкIун ур.
Ккулув зий хъунма хIал къабарчагу, кIулшивуртту дусса, дарс ххуйну дишайсса, оьрчIахгу ччаву дусса учительница ччяни ххира хьуну бур ва хIакьинусса кьинигу дакIний бур Ккуллал жяматран. ЦIанасса чIумалгу ванил дарс дирхьусса оьрчIру, миннал нину-ппу, оьвтIий, цIухху-ккакку буллан бикIай.
Къизлардайн бивзун махъ Мисиду зун бивкIун бур 5-мур садикрай. Учитель аьркинну ур тIий, мичча тIайла бувккун бур цал Карл Маркслул цIанийсса поселокрайсса школалийн, к1ира шинава — Къизлардал 7-мур школалийн. ЧIяруми шиннугу ванил шикку ларгун дур, оьрус мазрал ва литературалул учительну ва социал педагогну зий. Социал педагог хIисаврай ва шагьрулул сайки циняв школарттайн захIматсса оьрчIачIан гьан байсса бивкIун бур. Ва давугу, гьарица цила дуллалимур кунна, усттарну дайсса диркIун дур. Аьмну 45 шин дурну дур Мисидул оьрчIан кIулшивуртту ва тарбия дулаврил ххуллий зий.
Жула учайссар, кIанттул инсан акъарча ххуй айсса, инсанналли цува усса кIану ххуй байсса куну. Чув бухьурчагу, цуппа бавцIусса кIану чIюлу буллалисса инсан бур Мисиду. ОьрчIан кIулшивуртту дулаврил ххуллий бивхьусса захIматрахлу ва лайкь хьуну бур Дагъусттаннал КIулшивуртту дулаврил министерствалул чулухасса цикссагу ХIурматрал грамотарттан ва Барчаллагьрал чагъардан. Школалул хIурматрал улттуй мудангу ванил сурат лархъун дикIайсса диркIун дур. Яла хъунмур наградарив Мисиду Сулаймановнан дур цуппа цила учениктуран дакIний бушиву. Вай ччя-ччяни бучIай цанма ххирасса учительница цукун бурив ккаккан, барча бувай ва байраннай, оьвтIий, цIухху-ккакку буллан бикIай. ХIурматрай дакIнийн бутай Мисиду Сулаймановна архIал зий бивкIминналгу. Зунсса гъирагу, гьавасгу ваниву ттигу бур, амма, цIуллу-сагъшиврул тагьарданийн бувну, Мисиду Сулаймановнан цинна ххирасса даву кьаритан багьну бур.
Мисидул ласнащал архIал ххуйсса тарбия дуллуну дур арснан, Аьбдуллун. Ва хIакин ур. Зий ур травматолог-ортопедну Республикалул ОьрчIал чIяру профиллу дусса азарханалий.
Мисиду ххарину бур арснаягу, цила дарс дирхьусса оьрчIаягу ххуйсса инсантал хьуну, цила захIмат дузрайн буккаврия.Юбилейгу барча дуллай, чIа тIий буру Мисидун цIуллушиву, чIярусса ххари-хъиншивуртту.
Вила арсналгу, учениктуралгу тIайлабацIурттал ххари буллай битаннав ина, Мисидуй.
