Аьрасатнал кьинилул байрандалуцIун дархIусса мероприятиярттал лагрулий июнь зурул 9-нний В. Макаровал цIанийсса «Музей боевой славы» тIисса музейраву тIиртIунни «Герои и подвиги» тIисса ккаккия. Цувгу цIа куну дур хасъсса аьралий операциялий чувшиврий жанну дуллуминнан ва хIакьинугу тикку талатиминнан.
Ккаккиялий дирхьуну дур Украиннал аьрщарай нанисса хасъсса аьралий операциялий ватандалул ххуллий чувшиврий жанну дуллуминнал кулпатирттал архиврдавасса суратру, аьраясса кадрарду, наградартту ва миннуцIунсса документру, аьрай ларххун диркIсса яннарду.
Миннувух дур Аьрасатнал Виричу капитан Исрапил МахIаммадовлул, Чувшиврул ордендалул кавалер, сержант Алик Гъазиевлул, лейтенант Аьзим Муслимовлул, чIавама сержант Ссунгъур ХIусмановлул наградартту ва аьрай ишла дуллай бивкIсса затру.
Ккаккиялий мукунна дирхьуну дур хасъсса аьралий операция нанисса кIанттурдай хIакьинугу талатисса аьралитурая, цала хушрай ватандалул ххуллийсса мурарду буручлан лавгминная бусласисса материаллу. Музейраву дирхьусса экспонатру хъунмурчIин дуллуну дур «Сила матерей» ккурандалул вакилтурал. Мероприятиялул лагрулий музейрал зузалтрал сакин дурну дия хасъсса аьралий операциялий чувшиврий жанну дуллуминнал ниттихъащалсса ва щахъаннищалсса хьунабакьаву.
Музейрал директор Жаннат Сагидовал жижара бунни бавтIминнахь, барчаллагь увкунни яла къалагайсса къювулух къабурувгун, ватандалул ххуллий жанну дуллуминнал аьпа абад баврил цIанийсса жяматийсса иширттаву чялишсса гьурттушинна дуллай бушиврухлу.
