Ва кьини бавтIун бия ванал дустал-ихтивартал, художествалул магьирлугърал вакилтал, гъан-маччами ва ванал шяравачутал.
Выставкардал залдануву тамашачитурал хьхьичIун буккан бувну бия жула цамагу машгьурсса лаккучу, меценат Оьмари Къаллаевлул коллекциялувасса, синттул янналий Арсеннул суратру дирхьусса произведенияртту. Цува ГьунчIукьатIрал шяраву увну, оьрмулул хъунмур бутIа магьирлугъраха зий-занай Санкт-Петербурглив лавгун бухьурчагу, художникнал гьарцагу произведениялуву, гьарцагу накьичраву Буттал кIанттухссагу, Лакку билаят­рахссагу ччаву, мякь ликъавххун бушиву тасттикь хъанай бия.

Залму АьбдурахIманова
— Петербурграйсса ттул мастерскойлуву цимилагу хьусса меценат, магьирлугъран лайкьсса кьимат бищун кIулсса инсан Оьмари Къаллаевлущал хьусса ихтилатирттая махъ дирхьусса суратрур вай. Жул дянив чансса къавхьуссар Дагъусттаннаясса, мунил культуралийн хIакьину биллалисса асардаясса ихтилатру. Ва коллекциялуву чIалачIи бувну буссар, аьвзалзаманнуя тIайла хьуну, хIакьинунинсса инсаниятрал ххуллу-хха. Ваниву 36 композиция буссар, — увкуна цалва мукъуву художникнал.
Выставка тIитIлай, Дагъус­ттаннал Художниктурал союзрал председатель Кьурбанаьли МахIаммадовлул кIицI лавгуна, цивппа хъинну пахрулий бушиву Аьрасатнал культуралул хъуншагьрулий республикалул сийгу, цIагу бюхттул дуллалисса жула художник Арсен Къардашовлуя ва ванал да­вурттая.
— Мяйжаннугу, Арсен ур хIакьсса магьирлугъраха зузисса, цалва гьунарданул гьаз увсса художник. Санкт-Петербургуллал ва Москавуллал яла машгьурми галереярттаву ва выставкарттай ванал давуртту чан къархьуссар. Пахру бур укунсса жула ватанлувная,-увкунни Кьурбанаьли МахIаммадовлул.
Цала дус выставкалущал барча ан увкIсса Ссалам Хавчаевлул бувсунни цанма хъунмасса бахтти-талихI хьушиву гьашину кIинттул февральданий Санк-Петербурглив Арсеннул мастерскойлувун уххан, художникнал канила дуклакисса эмаратирттай тамаша бан.
— Арсеннул давурттив на ккалли давияв жунма кьисмат бувсса, багьа бакъасса ххазиналун. Ва ур хъинну къирият дусса, ци захIматшивуртту ялун диярчагу, яхI къагъагъайсса хасиятрал инсан. Ххарира хIакьину нава ванал чIарав, ванал давурттай тамаша бан учIаврия, — увкуна ванал.
Ва кьини Арсен Къардашов барча ан бувкIминнавух бия жулва машгьурсса художниктал Хайруллагь Кьурбанов, Буниямин Къаллаев, Аьбдулзагьир Мусаев, хьхьичIми шиннардий культуралул министрну зий бивкIсса Зумрут Запировна ва цаймигу.
Буниямин Къаллаевлул цала дуснан ляличIисса бахшиш хIадур дурну дия – щютIуххуй цаппара лакку макьанну дурцуна, выставка хъиннура чIюлу дуруна.
ГьунчIукьатIрал жяматрал цIа­ния цала шяравучу барча уллай, щарнил ккурандалул хъунама Зиябуттин ХIажимирзаевлул кIицI лавгуна, цивппа хъинну пахрулий бушиву укун машгьурсса, гьунар бусса художник цала шярава уккав­рия.
— Жул хъун дакъасса шярава бувккун бур чIявусса цIадурксса инсантал: аьлимтал, вирттал, чичулт, художниктал. Ва ххаллилсса кьюкьлуву агьамсса кIану бувгьуну ушиву цал ттигу тасттикь хъанай бур шикку Арсеннул дустурах, ванал даврил уртакьтурах вичIи дирхьуну махъгу.
Жун кIулли Санк-Петербурглив яла агьамсса, хъуни-хъунисса идарарттаву ванал давуртту лархъун, хъинну тIалавну душиву. Мукунма кIулли, тих ялапар хъанай ухьурчагу, ванал дакIгу, рухIгу жучIа, жул жяматращал, жул шяраву душиву. Вай суратиртталва буслай бур цуксса ххирассарив ванан жулва Дагъусттангу, жулва Лакку билаятгу. Ттула чулухагу, щала жулва жяматрал чулухагу чIа учин ччай ура Арсеннун цIуллушиву, цала дакIнил асарду кIибавчIусса суратирттайну жува ххари буллансса каши-кьудрат ххи шаву, — увкуна ванал.
Выставкалийн бувкIсса цинявн­нахь барчаллагь тIий, Арсеннул бувсуна, шиккун дуккан дурсса чIяруми давурттал бакIщаращи ларгмур ттуршукулул 80-ку шиннардия нанисса бушиву.
— Яруссаннал театрданул жанахI чIюлу буллай диркIсса пардаврттай сурат дихьлахьисса ппурттуву на кIул хьуссияв гания махъсса ттула дустуравасса ца Аьбдулзагьир Мусаевлущал. Жу бивкIру 500 квадрат метралул дусса янналий суратру, накьичру дихьлай. Муна му чIумал ттуву чантI куна янналий накьич дихьлансса гъирагу. Янналийсса накьичирттаву ттуща бюхълай бия музыка ва ччаву чIалачIи дан. Учин мукъун, гобелен на ккалли дара бюхттулсса композитор Бахлул музыкалул асар биян бувсса магьирлугърал журалун. Гобелен кунна, тамашачинан яла гужну, бюхханну асар биян бан бюхъайсса магьирлугърал цамур жанр ттун цалсса хIисав хьун дурар. Ва выставкагу ттун пикри хьунни ттулла дакIнин гъансса, ттунма хъунмур гъира бу­сса янналий дирхьусса суратирттая щаллу дуван. Барчаллагь тIий ура цал ттигу ва ттул кьини лахъа-хъун дан бувкIсса цинявннахьвагу, — увкуна Арсеннул.
Гьунар бусса художникнал цIа дургьуну, ванайн чIа-чIаннин оьвчайсса бур Санкт-Петербургливсса, Пушкинолийсса, Павловскалийсса, Петродворецравусса хъунисса заллу чIюлу бан.
Ванал накьичру дирхьусса яннардал чIюлу бувну бусса бур Пулково-2 аэропортрал VIP-зал, «Короли Востока» ресторан ва цаймигу кIанттурду. Ватандалийн увкIсса гьарца аьрххилиягу художник Санкт-Петербурглив зана шай­сса ур зунттал билаятрал виуцIин увсса цIу-цIусса асардал ва хияллал ххуржинттащал.
P.S. Хъиривмур номерданий жу бищунну вай гьантрай «Илчи» кказитрай хъамалу хьусса Арсен Къардашовлущалсса ихтилат.