МахIачкъалалий Расул ХIамзатовлул цIанийсса Миллатрал библиотекалуву октябрь зурул 1-нний хьунни Республикалул чIава журналистурал ххюлчинмур слет. Шикку гьуртту хьунни республикалул шагьрурдаясса ва районнаясса 150-нная ливчусса чIава журналистал.
Слет сакин дурну дия «Орленок Дагестана» тIисса оьрчIансса кказитрал ва ДР-лул Информациялул ва печатьрал, Элмулул ва кIулшиву дулаврил министерстварттал чIарав бацIаврийн бувну.

И. Саидова
«Орленок Дагестана» кказит­рал хъунмур редактор Басират ХIусайновал бувсунни слетрай гьуртту хьун бувкIун бушиву ва кказитращал уртакьсса чIава корреспондентътал ва школар­ттай итабакьлакьисса кказит-журналлай зузисса оьрчIру ва душру.
— ХIакьинусса кьини жул кказитрал тираж дур 8 азарунния лирчусса. Республикалул чIявуми школарттай ва кказит чичайссар классран ца ягу кIива экземпляр. Мукун хIисав булларчангума, кказит буккайминнал аьдад 100-нния лирчусса хъанай дур. Учин бюхъанссар, хIакьинусса кьини оьрчIансса кказит хъинну тIалавну бур куну, — увкунни Басират ХIусайновал. Ванил кIицI лавгунни кказит­рал редакциялул хъуннасса даву дуллай бушиву итххявхсса оьрчIру хъиннува хьхьичIунмай баву мурадрай.
2008 шиная шихунмай кка­зит­рал редакциялий сакин бувну буссар республикалул чIава журналистал цачIун буллалисса «Медиашкола». «Медиашколалул» итабавкьусса 40-нния ливчусса выпускниктал, редакциялул тIайла бувккун, дук­лан бувхссар республикалул ва Аьрасатнал шагьрурдайсса журналистикалул ВУЗ-ирдавун. Мукунма «Орленок Дагестана» кказитрал редакциялий сакин бувну бур «Лига юных журналистов» тIисса Аьрасатнал жяматийсса идаралул Дагъусттаннайсса региондалул отделение. Ва отделение хIасул баврийн бувну чIава журналистураща бюхъайссар Аьрасатнал даражалийсса мероприятиярттай гьуртту хъанан.
ДР-лул кIулшивуртту дулаврил министр Шагьаьппас Шагьовлул чулуха оьрчIру барча буллалисса адрес дурккуна министрнал хъиривчу ХIажимурад Аьлиевлул.
— Шиная шинайн гьарза хъанай бур слетрай гьуртту хъанахъисса гьунар бусса оьрчIру. Слетрал даврил лагрулуву чIава журналистурал дянив конкурсру дуллалаврийну ва даврил агьамшиву хъиннура хъунна хъанай дур, ялун личин буллай бур гьунар бусса, итххявхсса оьрчIру. МукIруну ура слетрал чIявусса гьунар бусса оьрчIан журналистикалувунсса ххуллу тIитIиншиврий, — тIий, чивчуну бия министрнал чулухасса барча буллалисса адресрайгу.
Укунсса слет даврил агьамшивриясса ихтилат бувна респуб­ликалул печатьрал ва информациялул министрнал хъиривчу Зубайру Зубайруевлул.
Слетрал программа мяйжаннугу авадансса дия. Шиккура наградарттугу дуллунни Ххувшаврил 70 шинал юбилейран хас бувсса «ЧIава журналист» тIисса конкурсраву ххув хьусса оьрчIан.
Хъирив «Дяъвилул оьрчIру» тIисса конкурсраву ххув хьуминнангу дуллуна бахшишру.
Слетрал хIасиллу дурну махъ чIава корреспонденътурахьхьун буллуна журналистурал удостоверенияртту.
ЧIава журналистурал слет дуллай байбивхьуссар 2011 шиная шихунмай.