Лакрал райондалул Телеграм-каналданий бувсун буссар Гъумук зунтIий бушиву Туристътурансса информациялул центр.

Му центр цуппагу бикIантIий бур дя Гъумук паччахIххуллуцI. МФЦ-лул къатрачIа хIадур бувну бур му центр бишинсса кIану, дуркIун дур хIакьину-гьунттий батIлай байбишинсса материал.

Ларгсса шинал ахирданий Дагъусттаннал ХIукуматрай хьусса туризмалул сезондалул хIасиллу дуллалисса батIаврий туризмалул ва халкьуннал сянатирттал министр Эмин Мердановлул бувсуна туристътуран яла тIалавсса кIанттурдай тIитIин дакIний бушиву модульнайсса Информцентрду. Ми цивппагу батIлай бур «Эксперт» ООО-лул.

Мукунсса центр шинал ахирданийннин тIитIин тIий бур мяйва: Гъуниннал райондалий Гамсутль шяравалличIан, СалтIиял жюружанттучIан, Къарадахуллал къума ратIничIан гъансса кIанттай, Шамильский райондалий Гоор шяравун биявайсса кIанттай, Ххунзахъиял райондалий Тобот жюружанттучIан наниххуллий, МахIарамкантуллал райондалий Приморский шя­равалличIа, Докузпариннал райондалий Усухчай ва Килер шяраваллал дянив, Къумтуркъалаллал райондалий СарикъумрачIан нанисса кIанттай ва Гъумук.
Ци мурадру биттур буллан­тIиссар укунсса информцентрдал?

Лакрал райондалул пресс-службалий бувсунни туристътурансса информцентрду аьркинну бушиву бигьалаган, кIанттурду ккаккан бувкIминнансса къулайшиннарду дузал даншиврул. Мисалдаран, тарих авадансса Гъумучиял шяравалу даингу итталу дикIайва райондалулгу, республикалулгу кьатIату бувкIминнан, хIатта жула республикалий туризм хьхьичIуннай хъанай дайдишиннинна. Утти, жула республикалийн туристътурал мугьали бияврицIун, тIабиаьтрал хьуннав, тарихрал хьуннав, диндалул хьуннав, гьайкаллу гьарзасса, тIабиаьтрал аьнтIикIасса Гъумукун ва аьмну Лакрал ва Ккуллал районнайнгу чансса най бакъар ми.

Архния увкIсса, кIану къакIулсса инсаннаща бюхълай бур, най унува ва центрданийн увххун, цуппагу хъинну къулай­сса кIанттай – маршрутка, таксирду бацIайсса кIанттай бухьувкун, кIул бан чув гьантта икIан бюхъантIиссарив, чув цукун игьалаган бюхъантIиссарив, чув ци гьайкаллу дуссарив. Миккува бюхъантIий бур центрданул харжлугърах чяйлул ягу кофелул стакангу хIачIан.
ХIасил, хъамал ххирасса Да­гъусттаннал агьулданул туристътуран хIасул дуллантIий бур дакIния къабуккайсса асарду личIансса шартIру.