СЯЪДУЛ АРС БУГЪУННАХЪАЛ САЭД
Сентябрь зурул 20-нний дунияллия лавгунни Гъумучатусса Бугъуннахъал Сяъдул арс Саэд.
Саэд увну ур 1942-ку шинал Гъумук. Финансирттал техникум бувккуну мукьах, 1965 шиная шинай 11 шинай зий ивкIун ур Лакрал райондалулфинотделданул хъунама бухгалтерну. 1965 шинал, цала буттал каялувшиву дуллай ивкIсса Гъумучиял колхозрал ферма тапшур дансса тIайласса, вихшала дусса зузала къаляхълай, колхозрал правлениялул тавакъю бувну бур Саэдлухь, кIа фермалул даву бакIрайн ласикьай куну. Цалла къулайсса, канилух дурксса давугу кьадиртун, буттал буллай ивкIсса захIмат зия хьун къабитанна тIий, Саэд лавгун ур Гъумучиял колхозрал фермалул хъунаману зун. Цала ппу куна, ххишала акъа марцIну, тIайлану кIа фермалий каялувшиву дуллайгу ивкIун ур 1992 шинайннин. Колхозрал фермагу райондалий ца яла хьхьичIуннаймунин ккалли хъанахъисса даражалийн гьаз дурну дур. ХIукуматран накI дулавриву Гъумучиял колхозрал фермалул райондалий цалчинмур кIану бувгьуну, фермалул зузалтрангу, Саэдлунгу хъунисса бахшишру дуркIун диркIун дур республикалул хъуниминнал чулуха. Саэдгу лайкь хьуну ивкIун ур чIярусса хIурматрал грамотарттан, «Ветеран труда» тIисса медальданун. 1992 шинал пенсиялийн укканнин зий уссия Гъумучиял колхозрал ревизионный комиссиялул хъунаману.
Саэд ия жяматран бусравсса, махъ нанисса, ляличIину марцIсса дакIнил заллу. Инсаннал чIарав ацIан мудан хIадурссагу ия. Жяматрал мажлисирттай сий дайсса адаминагу ия.
Саэд дунияллия лагаврил кьурчIишиву кIидачIлай, жижара буллай буру ванал кулпатрахь, оьрчIахь ва махъсса гъанчунахь, чIа тIий буру Саэдлул оьрчIан ва гъанчунан цIуллушиву ва лахъисса оьрмурду. Имандалий лавгсса ххаллилсса Саэдлулгу гьав нурданул дуцIиннав, цан алжан нясив баннав. Амин!
Гъумучиял жяматрал чулуха Миясат Щурпаева
——————————
КЬУБАНЧИЛ АРС КЬУБАНЧИЕВ РИЗВАН
Сентябрьданул 10-нний, личIину инжитгу къавхьуна, оьрмулул 95 шинаву ахиратравун лавгунни Ккуллал жяматрал бусравсса ва хIурмат лавайсса хъуначу, 60-хъул шиннардил мутталий машиналул руль канища хIура къадурсса шупIир ва автомеханик, дугърисса, чумартсса, ас-ламусрал увччусса зунтталчу, дяъвилул ва захIматрал ветеран, Дурнахъал Кьубанчил арс Кьубанчиев Ризван (Ругъу).
Ризван увссар Ккулув 1920 шинал ирсирай нанисса ризкьичинал Дурнахъал Кьубанчил кулпатраву. 1934 шинал буттал шяраву 7 классгу къуртал бувну, танисса циняв чIунархIал оьрчIру куна, нитти-буттан кумаг буллай, ризкьилуха, хъу-лухччинуха, колхоз дурну мукьах -колхозраву зий ивкIун ур. 1939 шинал хушрай армиялийн лавгун ур. Ленинградрай младший комсостав хIадур байсса курсругу бувккуну, Ригалий къуллугъ буллай унува, аьрали касму лахьхьаврил хьхьичIунсса, кьянкьа-кьурчIисса, хIаписар хьун гъирарай ивкIсса жагьилнан тIайлабацIу къавхьуну бур. Цал ца, яла гамур инфекциялул азарду (туберкулез) ххарарххуну, дачIи шинай госпиталлай хъин хъанайгу ивкIун, комиссовать увну, 1941 шинал дайдихьулий шавай тIайла увккун ур. Техника, машинартту ххирасса, амма чурххал хIал цIакь хьун уванасса Ризван буттал шяравусса электростанциялул техникну ивтун ур. ДачIи шинавату станциялул начальник Юсупов Исмяил (ХхялтIа Иссю) армиялийн увцукун, начальникну ивтун ур. Дяъви къуртал хьуну, Исмяил зана хьувкун, цIуллу-сагъшиврулгу таза увксса Ризваннул 1945 шинал ахирданий дяъвилия зана хьусса фронтовиктуращал ХIусайнов Рамазаннущал (Учук Разущал) ва Щамхалов МахIаммадлущал (Навт баххущал) архIал кьамул бувну бивкIссар колхозрал дахьва лавсъсса цIусса грузовикру. Вай шама къучагънаяту байбивхьуну бивкIссар билаятрайх цIа ларгсса Гьарун Саэдовлул цIанийсса колхозрал бусалардавун багьсса ттуршуннийн бивсса машинартту циву бусса автопарк. Вай шаннагу уздансса чулий цIагу – Учук, Навт бахху ва Ругъу – тарихраву лирчIссар ялун нанисса никирттан ихIсандалун, бурцIурдил ва къачагътурал хъямала дурсса буттахъал оьтту-ттурчIай дурсса уздан колхозрал технически гьанулул лишанну кунна, аьпа бан Диччихъал МахIаммадхIажинал цIа колхоз дачин даврил усттаршиврул лишан кунна.
Цалла сянат ххирашивруцIун ва усттаршивруцIун, дакI хъиншивруцIун ва сахаватшивруцIун, буттал шяраву акъа, щалла райондалийгу, МахIачкъалалия зунттавунсса щалва трассалийхсса щархъайгу Ккуллал Ризван-Ругъу къакIулсса, мунал «лимузинналуя» къабавсса чанну икIан бюхъайссия, «лимузин» учайссия дус-ихтивартурал мудан пар-партIи бувну шювшунмасса Ризваннул машиналийн. Ризван ия тIабиаьтрала увсса интеллигент, гьарца чулуха – аькьилсса мукъул заллу, лаххи-ликкиялул чулуха – франт. Мукунсса уну тIий бакъаяв Ккуллал жяматран Ризван ххирасса, ганах, ганал маслихIатрах вичIи дишайсса: гьар кIанайгу, гьарца иширавугу. Ялув кIицI лавгсса автопаркрал шупIиртурал хъунмасса коллективравугу, шяраваллил советрал депутатну унигу, колхозрал правлениялул уртакьну унигу – мудангу, мудангу. Мукунсса уну тIий бакъаяв Аллагьнал Ризваннун, ларгсса аьсрулул 40-ку шиннардий тIутIул кацIру кунмасса щарнил душваравусса аьнтIикIа Бачарихъал ххуй Аминат бувцуну, ганищал 70 шинайсса оьрму бутан нясив бувсса?
Лавгунни тти жула Ризван, биялсса оьрмугу бувтун, бусравсса цIа ва чув мяш хьунсса наслугу (8 оьрчI-душ, 21 оьрчIал оьрчI, 28 оьрчIал оьрчIал оьрчI) кьабивтун. Аьпа баннав цал, алжаннул ххари аннав!
Ппу лагаврил пашманшиву кIидачIлай, жижара буллай буру арсурваврахь Кьубанчихь, Дибирдухь, Тельманнухь, МахIаммалухь, Сагидлухь ва Рамазаннухь, душваврахь Халуннухь ва Гулбариятлухь.
Щала Ккуллал жяматрал цIанияту Киров Султанов
