ЦIу – чIявуминнал хIисав бай чурххан зарал биян байсса затну, ца-цавайннал мунийн «белая смертьгу» учай. ЦIу къабивчусса дукра хIисав дай хайрсса, цIуллушивруцIун даркьусса дукрану.

Ххал барча, цIу бакъа инсан дузал къашайсса ур. МуницIун чIявуну цIу бюхъайссар чIярусса цIуцIавурттан дарувну бацIангу. ЦIил кьарал хъар шайссар климатрая (гьаварая). ЦIу буссар инсаннал оьттуву (в тканевой жидкости) 0,5-0,6%. Инсаннал чурххава гьухъащал цIугу бу­ккайссар, мунияту кIиришиву лахъсса хIукуматирттай гьантлун букан аьркинсса цIил лагру (норма) кIилийну хъуннассар, 10-15гг.. кIанай 25-30 грамм цIил ккаккан дурну дур. Амма ччаруллал къашавайминнан, давление думиннан цалла дукралуву цIу чан бан аьркинссар.
Агарда зу бухьурча тIабиаьт­раясса продуктылущал чур­ххан аьркинссаксса цIу кьамул буллай буссару тIий, кIулну бикIияра, кIири лавгсса цIу зия шайссар, мукунма зия шайссар лахъи лавгсса цIугу. Мунияту ахънилссаннуйн аьркинссар цIу тIайлану бичин.
Организмалун цIу биял къахъанахъисса чIумал, биял къахъанахъимур цIу оьтту­ва тканная тIалав буллан бикIай­ссар, чурххал тагьар зия шайссар: нервардал система, къюкIлил, туннурдал система зия шайссар, хьхьару батIлан бикIайссар. ЦIу чара бакъа аьркинссар гьарца кьини желудокран, желудочный сокравусса соляная кислота сакин дангу.
— ОьттуцIа хьусса инсаннавун оьттун кIанай дутIайссар физиологический раствор хлорид натрийлул – 0,9%.

Щегловлул метод
Хъунмасса Буттал КIанттул цIанийсса дяъвилул чIу­мал госпиталлай биял хъанай къабивкIссар медсестрахъул, даруртту. Щавурду дирминнан кумаг бансса аьмал лявкъуссар хирург Щеглов Иваннул. ЦIуну бувкIсса саллатIнал чапалсса щавурдайн дутан дайсса диркIун дур цIил щинавун щусса кисей (гипертонический раствор – 8-10 г. цIил, 100 гр. щинавун бивчусса). Мукьра къат дурсса кисейлул салфеткарду гьантлун кIийлла даххана дан аьркинссар, 3-4 гьантлува щаву марцI хъанай, хъин хъанай дачайссар.
Ва растворданул, сорбентрал кунна, щавулувусса дуцири чапалшиву ва оьчIучIи кIункIу дурну дуккан дайссар, микробру литIайссар, щаву хъин хъанай дачайссар. Укунсса цIил повязкардал ххассал бувну бивкIун бур дяъвилул чIумал Щегловлул отделениялувусса чIявусса щавурду дирсса саллатI гангреналия.

Чичинну цIу хIаласса ца-кIира рецепт
Ччанну гьухъа битайсса – грибок дусса инсантурансса рецепт:
— Ца литIра гъилисса щинаву 4 хъунна къуса цIилгу, 6 кIунтI йодралгу хIала байссар. Гьарца кьини 5-10 минутIрайсса вай щинаву бихьлахьияра ччанну хъин хьунцIа.

— Ущу-щулгъилул кьацI увку­сса кIанттайн цал щин дуртIуну, яла цIу ялун бичирча хъинссар.

ЧунтIуллая:
— Хрендалул сокраву цIу хIала байссар (1:1) лагрулий, ми гьарца кьини чунтIуллайх дуклан аьркинссар.

Туннурду гьарта бувкминнан (варикозное расширение вен):
— Хьхьирил цIу бяххан бувара щинаву, дякъин дувара 0 градусрайн диянцIа. Кисейрай бивхьуну, му дишин аьркинссар туннурдай. Ва процедура дуллан аьркинссар кIюрххих.

КIулну бикIияра:
— Гипертонический растворданий цIу бикIан аьркинссар 10% бивсса, ххишаласса цIу бухьурча бюхъайссар ялунгу зарал биян бан.
ЦIуллуну битаннав.
Т. ХIажиева