Аьдатравун багьсса куццуй, гьашинугу Ххувшаврил кьини Москавливсса Дагъусттаннал диаспоралул вакилтал бавтIунни Новодевичье хIатталлийн, Совет Союзрал к1ийла Виричу АхIмад-Хан Султан ва парашютрал спортрал мастер Наби Аминтаев, вайннащал архIал цинявппагу жула вирттал дакIнийн бичин.

[dropcap]Ш[/dropcap]иккун бувкIминнавух бия Совет Союзрал Виричу, летчик-космонавт Муса Маннаров, «Да­гъусттан» МЦК-лул президент Арсен ХIусайнов, вара Центрданул Медициналул зузалтрал ассоциациялул каялувчи, психологиялул элмурдал доктор, доцент Гулизар Башанаева, АхIмад-Хан Султаннул ссу Алла, медициналул элмурдал доктор, профе­ссор Сяъдуллагь Абакаров, Аьра­сатнал Текстильщиктурал ассоциациялул президент Шамхал Илдаров, ПаччахIлугърал Думалул депутат Хизри Абакаровлул кумагчи, ЦIуссалакрал райондалул Халкьуннал Мажлисрал депутат Рамазан Хайдакьов, медициналул элмурдал доктор, профессор Астемир Шайхаьлиев ва м.ц. Гьамиящиял шяравасса Шакият Бамматова бувкIун бия цила арснал душваращал. Вайннал бувккунни вирттаврахасса шеърирду.

Вирттаврал гьаттардий тIу­тIив­гу дирхьуну, баян бунни минутIрайсса пахъ багьаву.
Цала ихтилатраву Арсен ХIу­сай­новлул бувсунни АхIмад-Хан Султаннул ва Наби Аминтаев­лул къучагъшивурттая. ДакIнийн бувтунни хIакьину Украиннал аьрщарай хасъсса аьралий операциялуву билаятрал мурадру буручлай Виричунал цIанин лайкь хьусса арулагу дагъусттанчу.

– Хасъсса аьралий операциялуву цалчин Виричунал цIа ларсунни жула НурмахIаммадлул. ХIакьинусса кьинигу Украиннал аьрщарай билаятрал мурадру буручлай бур азарунния ливчусса дагъусттанлувтал. Чансса бакъар миннаву личIи-личIисса паччахIлугърал наградартту лайкь дурсса. Жула ватанлувтурал ккаккан дуллай бур Буттал кIанттул цIанийсса Хъунмасса дяъвилий ххувшаву ларсъсса цала буттахъая, буттал буттахъая ирсирай дирсса чувшиву ва яхI-къирият. Щак бакъа, уттигу жува ххув хьунтIиссару, – увкунни ванал.
Хъирив Ххадижат Ц1аххаевал бувккунни АхIмад-Хан Сул­таннун ва НурмахIаммад ХIажимахIаммадовлун хас був­сса цила шеърирду.

Шамхал Илдаровлул кIицI лавгунни ва мероприятиялувух ялу-ялун чIявусса жагьилтал гьуртту хъанай бушиву. Махъ буллунни ялунчIин шиккун шамагу арснащал учIан. «Жува цачIу буссару, цачIу буссаксса — цIакьссару», – куну, къуртал бунни ванал цала ихтилат.
Цинявппагу ихтилатчитурал кIицI лавгунни ялун нанисса никирахь жула вирттаврая буслан аьркиншиву, миннал къучагъшиву жагьилминнан эбратну хьун аьркиншиву.