[dropcap]Б[/dropcap]уттал кIанттул цIанийсса Хъунмасса дяъвилий ххувшаву ларсун гьашину 78 шин бартларгунни. Шиная шинайн чан хъанай бур жандалий хIайп къаувкуну та Бюхттулсса Ххувшаву гъан дуллай бивкIми. Ччяни дунияллия лавгун бур оьрмулул шиннардилгу, дяъвилий ккавкцириннулгу аьйплу бувсса Хъун дяъвилул ветерантал. Ччянива аьпалухьхьун лавгунни та дяъвилий къучагъшивуртту ккаккан дурсса ЧIяйннал шяравасса Кьурбаннул арс Идрис Кьурбановгу.
Ххувшаврил кьини Идрислун кIилийнусса байран диркIун дур. Ва цувагу ва кьини увсса ур (1906 ш.).
Дяъви байбишиннин Кьурбановхъал кулпат Таганрограй ялапар хъанай бивкIун бур. Дяъви байбишиннинва, Ухссавнил Ккавкказуллал аьралий округрал Дагъусттаннал халкьуннал кавалериялул дивизиялувун увцусса чIумалва, байбивхьуну бур Идрислул аьралий ххуллу.
Мунияр шихуннай ванал оьрмулул чIяруми шинну аьралуннаву ларгун дур. Аьралуннаву къуллугъ буллалисса чIумал хасъсса курсру къуртал бувсса Идрис ивтун ур эскадрондалул отделениялул командирну. Ца-кIира шинава тIайла увккун ур Москавлив химинструктортал хIадур байсса полкравун. Мунияр махъ – Киеврайн, М.Калининнул цIанийсса аьралий школалий дуклан. Ва къуртал байхту гьан увну ур Бакуйн, 404-мур авиабригадалул кабельно-шестовой взводрал роталул командирну. Цала къуллугърал бигарду дакI марцIну бартбигьлагьисса Идрислуя рязисса командованиялул ва тIайла увккун ур дуклан летчиктал хIадур байсса И. Сталиннул ц1анийсса аьралий школалийн. Ва бувккуну махъгу Идрислун личIи-личIисса аьралий къуллугъру баххана бан багьну бур.
Дяъви байбивхьусса чIумал Идрис ивкIун ур архсса авиациялул 50-мур дивизиялул связьрал хъунаманал хъиривчунал къуллугърай. Аьралий къуллугъирттай савсъсса, даву канилух дурксса капитаннайн, ца кIаная ца кIанайн утлай, яла жаваблувшиву думи къуллугъру тапшур буллан бивкIун бур. 1942 шинал, майорнал чингу дуллуну, ва бомбардировочный авиаполкрал связьрал хъунаману ивтун ур. Связьрал даву Идрислун ххуйну кIулсса, хьхьичIвами къуллугъирттайгу канилух дурксса диркIун дур. Мунияту связь сантирайн дутан аьркиннийн ва гьан айсса ивкIун ур. Идрис талай ивкIун ур Белоруссиянал ва Прибалтикалул фронтирдай, гьуртту хьуну ур Кенигсберграйн гьужум буллалисса талатавурттаву. Ва ивкIун ур гьунар бусса командир ва къучагъсса талатала. Дяъвилул цIараву ккаккан дурсса чувшиврухлу лайкь хьуну ур Лениннул, ЯтIул Ттугълил, кIира ЯтIул ЦIукул, Буттал кIанттул цIанийсса дяъвилул 1-мур ва 2-мур даражалул орденнан, «За оборону Сталинграда», «За оборону Кавказа», «За взятие Кенигсберга», «За победу над Германией» медаллан. БувкIун бур И. Сталиннул чулухасса Барчаллагьрал чагъардугу.
Идрис демобилизациялул хьуну ур 1954 шинал подполковникнал чиндалуву. Ва дяъвилий унува, кIива мюрщисса оьрчIгу махъ кьабивтун, дунияллия лавгун бур ванал кулпат. Зана хьуну махъ щар дурцуну, шанма оьрчI цаймигу бувну бур. Аьпалул хьуну ур Идрис 1977 шинал. Ванал махъ ливчIун бур ххаллилсса наслу.
