Апрельданул 30-нний, тIа­биаьтгу шануцIа щаллуну чантI увкуну, гьавагу биялну гъили хьусса ппурттуву, кIинтния махъ хьхьичI лелу­ххантрал чIур­дал, хъирив Хъурда­ккаврил байрандалийн бувкIсса инсантурал тяхъа­сса чIурдал таза дуккан дурну дия Шахьуйннал шяравалу. Гьашину шикку Хъун хъузалану ия Адамлул арс Муслим Аьлиев.

ДукIу Къурнил хъатIи був­сса, архсса Калининградрай ялапар хъанахъисса, Аьшттарханов ИсмяиллучIату Кьуру лавсун, Муслимлул ва ванал кулпатрал Тамарал хъунмасса захIмат ва хIарачат бувну бия шяраваллил инсантурал ва хъамаллурал хьхьичI лажинкIялашиву дуван. ВацIилу-Зунттуйн лажинну дарцIусса, цIуну дурсса вайннал къатраву хьхьичI кьинива щиривкIуну бия бухху-букку. Къатрал хIаятраву щаллу дурну дия миллатрал зумунусса фотозона: буккан бувну бухсса бу­ттукьа ва тIахIни-кIичIу, лавхъун бартбису.
Муслимлул ва Тамарал чIа­рав бацIан, зунттал халкьуннал хьхьичIарасса аьдатрай тамаша буван, лагмасса щархъая тIайла хьуну, Калининградрайн бияннинсса шагьрурдая бувкIун бия чIявусса инсантал.

Дукрарду шахьлай цIарах цучIав ацIан къауваншиврул, гъан-маччами байрандалий бигьа-рахIатну щябикIаншиврул, шагьрулиява бучIан бувну бия дукрарду дувансса усттартал. ЦIарай щарай, хъюртIа тIий бия хъуни кIункIурду. Цахъис хьхьи­чIун буклай учин, ссупралийгу, дукьрахIанттия, узбакIнал пулаврая байбивхьуну, дакъасса дукрарду дакъая.
ЧIюлу бувсса, рукI-хъарас­ращалсса чал бакI дургьу­сса Хъун хъузала хьхьичIну, вайми хъиривну, бувккуна циняв къурув. Баргъ-гъарагъи дакьиннав, ссавнил аьрщи, аьрщарал инсантал буччин буваннав тIисса мяъналийсса дуаьрду дурну махъ, къамагу бивщуну, щуна цалчинсса хъарас. Къурув дувайсса аьдат-эбадатру щаллу дурну махъ хьуна спортрал личIи-личIисса журардал бяст-ччаллу. Шикку ххув хьусса мюрщиминнан ва хъуниминнан, цалла оьрмулул шиннах бурувгун, дуллай бия бахшишру ва байрандалул агьаммур лишанну хъанахъисса бартри.

Гихунмайсса мажлис лахъи лавгуна ссупралух. Хъурдаккаврил мажлис хъиннува чIюлу бувна лакрал балайчитурал Залина Гудовал, ХIабиб Кьурбановлул ва Нуруллагь Шагьмурадовлул. Лахълахъисса мукъурттил лях-карах балайрду увкуна шяраваллил инсантуралгу, хъамаллуралгу. Ва кьини махъру лахълахъимигу, вайннах вичIи дирхьумигу хьхьичIва-хьхьичI чIа тIий бия дуниял паракьат шаву, ххишала дяъвилул чIу къабаяву, вания гихунмайрив – лакрал шяраваллурду цIу дуккаву, ххари-хъиншивуртту чIяру даву.

Гьашинусса Хъун хъузала Муслим ур ишбажаранчи. Ванал кулпат Тамара бур Гьун­чIукьатIрал шяравасса, ванил, ДГУ-рал финансирттал ва экономикалул факультетгу бувккуну, 20 шинни ДР-лул Центробанкрай зий. 2020-ку шинал шяраву вайннал дурссар цIусса къатри. ДукIу Муслимлул лавсъссия Кьуругу, цIусса къатраву ва байран дуван­сса пикрилий.
– Гания шийнмай, дачIи шинай цал планну дичлай, цукун ци дуван хъинавав тIий, пикрирдай бивкIру, дачIи шинайгу – хIадур хъанай. Ва байран инсантуран дакIний личIанну, увкIма игьалаганну дуван ччай бия. Жул пикрилий, укунсса байранну чара бакъа аьркинссар, вайннул инсантал кувнначIан кув гъан буллалиссар, хъунмасса хIаллай кувннан кув къаккавкми ккаклакиссар, къакIулми кIул хъанахъиссар. Хаснува махъа нанисса жагьилтал, телефоннавун кьувтIунавасса. Барчаллагь жул чIарав авцIусса гьарцагу инсаннан, гъан-маччанан, дустуран, – тIий бия Муслим ва Тамара.

Байран хьуна лавайсса даражалий, мюрщиминнангу, хъуниминнангу дакIний личIанну. Ахттакьун бизулуву ларчIсса чявхъа гъаралгу хъисрагу къадахчуна байрандалухун, хасну тIабиаьтрал укунсса ишругу хIисаврайн лавсун, гъарая­сса магъинугу, кIири бургъиясса ххютнугу ванияр чIярусса шиннардил хьхьичIра шяраваллил хьхьичI дурсса «навесрал» муххал магъуйх ришлашисса гъарал чIунил ва гъарал щин дуччиннин хIарчIсса аьрщарал кьункьал ва мажлисран ялуннагу ца ххуйшиву ххи дуллай дия.

Бити цIана Шахьував, хьхьичI­ра кунна, хъуру къадугьлай би­кIангу, дити шяраваллил ар-май­даннугу, къурдугу, батIанма акъа, урттил бярахьхьун лавгун бикIангу. ДакI дарцIуну бура инсантурачIан аьрщарал кьадру-кьимат, захIматрал бусрав-сий зана хьуншиврий. Цалссарив, уку-укунсса байранну чара бакъа аьркинни жунна, жямат цал ххишалану, байран савав хьуну, буттал шяравун бучIаваншиврул, шяраваллил жяматрал, лагма щархъал ва личIи-личIисса миллатирттал дянивсса дусшиврул арарду цIакь хъананшиврул.