![](https://ilchi.info/wp-content/uploads/2023/04/af460ed9-7347-4368-984b-782ec87099d6-e1680860658118.jpg)
Уттигъанну Москавлив хьусса Щалагу Аьрасатнал оьрчIал ва чIаважагьилтурал творчествалул Кирилл Молчановлул цIанийсса VIII конкурсрай 2-сса кIану бувгьуну зана хьунни Уручуллал шяравасса МахIаммадлул ва Кьукуннал шяравасса Асиятлул душ Шамсият Аьлиева.
Дуклай бур Шамсият Каспийскаллал шагьрулул 1-мур школалий 7-мур классраву. Музыкалухун багьну бур оьрмулул 8 шинаву. Агьаммур дуккаврицIун ва занай бур МахIачкъала шагьрулул ОьрчIал искусствардал 7-мур школалийн (флейта). Шамсият хъанахъиссар ва школалалул цалчинсса флейтистка, ванихь дарс дихьлай ур жула республикалул машгьурсса преподаватель Рамиз Казиев.
![](https://ilchi.info/wp-content/uploads/2023/04/9fc44f67-bd8d-4e09-99aa-b43b94021cf3-e1680860743795.jpg)
Конкурсрай, «Духовые инструменты» номинациялий II даражалул дипломран бакъассагу, Шамсият лайкь хьунни К. Молчановлул произведение яла ххуйну щаллу баврихлусса дипломрангу, язима концертмейстернал дипломрангу.
Конкурс хьуссар К. Молчановлул цIанийсса школалий. Кирилл Молчанов – Совет заманнул композитор, «А зори здесь тихие» кинофильмрахун музыка чивчусса, мукунма «Жди меня, и я вернусь», «Парней так много холостых, а я люблю женатого» ва цаймигу балайрдахун музыка чивчусса. Ванал арс, «До и после полуночи» передачалул ведущий, Владимир Молчанов, мудангу икIайсса ур ва конкурсрал гала-концертрал жюрилуву, ххув хьуминнан бахшишру дуллалисса шадлугърай. Амма Шамсият ванащал хьунакъабавкьуну бур, Москавлив гала-концертрайннин къабацIаврийн бувну.
[dropcap]В[/dropcap]а конкурсрал жюри та-бухьурчагу сакин хьуну бикIайссар билаятрал культуралуву цIа дусса инсантурая.
Шамсият ларгсса шинал гъинттул Москавлив ВДНХ-лий хьусса ОьрчIал культуралул цалчинсса форумрайгу гьуртту хьуссия. Ва аьрххилий хьусса цамур лакку душния чивчуну, Шамсиятлуя га чIумал къачивчуна ливчIссия. Культуралул форумрай Шамсиятлул «Гамзатов-квест» проект дуссия финалданийн дурксса язисса 7 проектрал сияхIрай. Ва проектравун духлахиссар «ГАМЗАТОВ-квест», цивагу чIалантIисса Расул ХIамзатовлул творчествалуцIун дархIусса, дунияллул личIи-личIисса кIанттурдай дирхьусса культуралул объектру. Аьрасатнал Культуралул фондрал хъунмур бахшишран Башкортосттаннаясса гьурттучи лайкь хьурчангу, махъсса вайми оьрчIангу, вайннавух Шамсиятлунгу, буллуссар цIа кусса дипломру, цайн бувнугу оьрчIаща АьФ-лул Культуралул министерствалущал уртакьну зун бюхъантIисса цалла проектру иширайну щаллу давриха.
Шамсиятлул нину Асият бур ОьрчIал искусствардал 7-мур школалул завуч. Ва хъанахъиссар жуна ххуйну кIулну ивкIсса, аьпа биву, Сулайман Мусаевлул уссил душ. Асиятлул бур Шамсиятлияр мюрщисса кIинничалтгу, вайгу занай бур вава искусствардал школалийн, оьрчI – ксилофон бишлай, душ – фортепиано. Укун, музыкалухсса ччаву вайннал кулпатраву ирсирай най дур.
Музыкалухун бакъасса, Шамсият багьну бур ккалаккаврихунгу, ванин хъинну ххирар луттирду, вай бахлахисса ттучандалува лу канихь бакъа ва тачIав къабуккайссар.
ЧIа учинну чIава музыкантнан тIайлабацIу, ц1у-ц1усса хьхьич1уннайшивуртту.