«Дагъусттаннал шяравалу» тIисса этнографиялул комплексрал сакин дурну, Москавлив, Машрикьуллал халкьуннал искусствалул ПаччахIлугърал музейраву, Расул ХIамзатовлул 100 шинан хасну, мартрал 31-нний тIиртIунни «Расул ХIамзатовлул Дагъусттан» тIисса цIанилусса выставка.
[dropcap]Ш[/dropcap]икку ккаккиялун дирхьуну дур шаэрнал оьрмулул личIи-личIисса шиннардий ларсъсса 80-нния лирчусса суратру, республикалул ва билаятрал цIа дурксса художниктурал щаллу бувсса живописьрал ва графикалул 40-нния ливчусса произведенияртту. Вайннувух бур Арсен Къардашовлулсса, Хайруллагь Кьурбановлулсса, Ислам ШовкIринскийлсса, Галина Пшеницыналсса, Тимур Кагировлулсса ва цайминналсса.
Хъунасса шаэрнал оьрмулуцIун ва творчествалуцIун дархIуми дакъасса, шикку дур Дагъусттаннал халкьуннал культуралуцIун, багьу-бизулуцIун дархIусса чIярусса цаймигу затру.