АЬВДУРАХIИННУЛ АРС
ХАВЧАЕВ АЬВДУЛЛАГЬ
Апрельданул 1-нний, къашавай лахъи хIалгу къабувну, аьпалухьхьун лавгунни дугърисса лаккучу, лакралгу, Дагъусттанналгу дянив цIа дурксса Кьукуннал шяраватусса Хавчаев Аьвдуллагь АьвдурахIиннул арс.
Аьвдуллагь увну ур ноябрьданул 24-нний 1938-ку шинал хIурмат лавайсса АьвдурахIиннул ва Шарипатлул кулпатраву.
1956-ку шинал Ккурккуллал дянивмур даражалул школагу къуртал бувну, 1957-1960-ку шиннардий къуллугъ буллай ивкIун ур совет аьралуннаву, Туркманнал дазуй пограничникну. 1964-ку шинал Саратоврал юридический институтгу къуртал бувну, 1965-1972-ку шиннардий зий ивкIун ур Буйнакск шагьрулул прокуратуралий хъунама следовательну. 1973-ку шинал увчIуну, ацIра шинал мутталий зий уссия Дагъусттаннал Верховный судрал членну. 1983-2000-ку шиннардий МахIачкъалаллал Советский райондалул судрал председательну, муния махъ 2008- ку шинайн ияннин – Дагъусттаннал Верховный Судрал председательнал цалчинма заместительну.
МукьцIалунния лирчусса шиннардий судрал системалий зий, Аьвдуллагьлул ккаккан бувссар цува хъинну лавайсса даражалул специалист, давриву ляличIину дакI марцIшиву дусса, тIайлашиву дайсса зузала ушиву, мукунна цIакьсса тIалавшин дайссия цинявппа судьятураягу. Дагъусттаннал бакъа, Аьрасатнал Верховный судрал дянивгу уссия хъинну лавайсса хIурматрай.
Давриву ккаккан дурсса хьхьичIуншивурттахлу лайкь хьуну ур личIи-личIисса хIурматрал лишаннан ва бахшиширттан – Аьрасатрал Хъунмур квалификациялул коллегиялул дуллуну дур судьятуран дулайсса яла лахъмур чин, Дагъусттаннал Госсоветрал ХIурматрал грамота ва цаймигу личIи-личIисса бахшишру.
Аьвдуллагьлун ххуйну кIулссия ва дуруччайссия зунттал тIул-тIабиаьтгу, мува даражалий тарбия буллай уссия цала оьрчIругу, оьрчIал оьрчIругу. ЛяличIину ххирассия лакку мазгу, Лакку кIанугу, цала буттал шяравалугу, гьарца отпускгу гьан байссия Кьукнив. Лагма-ялттунащал уссия хъинну иминсса, хIал бавкьусса, дусталгу ххирасса, ми буруччингу кIулсса . Ванал къатлул цIакьсса ттарцIну хьусса инсанну буссия ванал кулпат ПатIиматгу, тIивтIунмасса ненттабакIращал гассят ссупра хIадурссия хъамаллуран.
Аьвдуллагьлул ва ПатIиматлул хъуни бувну, ччаннай бацIан бувну бур ххаллилсса шама арсгу, ца душгу.
Аьвдуллагьлул бунагьирттал аьпа баннав, цал рухI алжаннул ххари даннав тIий, ванал кьурчIисса бивкIулул къумашиву кIидачIлай, дакIнийхтунусса жижара буллай буру кулпат ПатIиматлухь, душнихь, оьрчIахь, уссурваврахь, ссурваврахь ва махъсса цинявппагу гъан-маччанахь. Зул оьрмурдай барачат бишиннав, зухьхьун цIуллушиву дулуннав, кьурчIишиву лагь дансса ххаришивуртту ялун дияннав!
Кьукуннал ва Карашрал
жяматру
Хъуннасса кьурчIишиву кIидачIлай, дакIнийхтунусса жижара буллай буру Хавчаев Ссалам АьвдурахIимлул арснахь, ванал уссу
Аьвдуллагь
жуятува батIул шаврийн бувну.
Цал бунагьирттал аьпа баннав, рухI хъинний дишиннав, алжаннул ххари аннав. Махъминнал оьрмурдай барачат бишиннав.
МахIачкъала шагьрулул 34-мур школалул
ТОКС-рал кьюкьлул цIания Галина Къараева
ХIажинал арс ХIусайнов АьвдурахIман
Март зурул 10-нний цакуну жула дянивату личIи хьунни ДГУ-лул «Менеджмент» кафедралул хъунама, ХIажинал арс ХIусайнов АьвдурахIман.
Увну ур АьвдурахIман 1948-кусса шинал ТаджикIнаву Душанбайлив.
Дагъусттаннал паччахIлугърал университетрал инженер-техникалул факультет къуртал бувну махъ ванал захIматрал ххуллу байбивхьуну бур «Дагестангражданпроект» тIисса проектирдал институтраву инженернал даврия. Зий ивкIун ур республикалул комсомолданул ва партиялул давурттай.
УвчIуну ур МахIачкъалаллал Ленинский райкомрал 2-ма секретарьну, зий ивкIун ур Обком КПСС-рал отделданул каялувчину, «Кавказский биржевой банкрал» правлениялул председательну, МахIачкъалаллал администрациялул бакIчинал хъиривчуну, ДР-лул Президентнал Информациялул ва пресс-службалул начальникну.
Чув ци къуллугърай ухьурчагу, гьарцагу цацIунмасса буржру ванал бартбигьайсса бивкIссар лахъа-хъунсса даражалий, кIулшиву ларайсса, чантI увкусса инсаннал ва профессионалнал зумуну. ХIалалгу бувссар гьарца чулухасса хIурмат ва кьимат.
Ва ур экономикалул элмурдал кандидат, ДР-лул лайкь хьусса экономист, ДР-лул ПаччахIлугърал премиялул лауреат, СССР-нул Граждан обороналул хIурмат лавайсса зузала, Аьрасатнал Муниципал академиялул мяйжаннугусса член. ЧIярур цайми-цаймигу титуллу ва наградартту.
ЗахIматри АьвдурахIманнул кулпатрал, арснал, аьзизсса душваврал дакIру рахIат дансса махъру лякъин. ДакIнийхтуну кIидачIлай буру вайннахь хъуннасса пашманшиву.
АьвдурахIманнул бунагьирттал аьпа баннав, рухI паракьатний дишиннав, махъминнал оьрмурду лахъи баннав.
Дустурал, гьалмахтурал цIания АьбдурахIман Адамов
Аьвдулкаримлул душ АлхIасанова ПатIимат
Оьрмулул 73 шинаву аьпалухьхьун лавгунни ас-намус ххисса, дакI-аьмал авадансса зунттал хъамитайпа, Кьукуннал шяраватусса Аьвдулкаримлул душ АлхIасанова ПатIимат.
ПатIимат бувну бур 1950-ку шинал Кьукуннал шяраву, мяйва оьрчIал нину-ппуну хьусса Аьвдулкаримлул ва Залихатлул кулпатраву.
Шагьрулийн бивзун махъ ПатIимат хъунмасса хIаллай зий бивкIун бур МахIачкъалаллал янна дуруххай фабрикалий, лайкьгу дурну дур хIурматрал грамотартту ва барчаллагьрал чагъарду.
ЗахIмат ххирасса, тIул-тIабиаьт уздансса ПатIимат мудангу хIурматрай бивкIссар даврил уртакьтуралгу, жяматралгу дянив.
Цила оьрмулул дус ХIасаннущал архIал вайннал ххаллилну хъуни бувссар шанма оьрчI – кIия арс ва ца душ.
ПатIимат аьпалухьхьун лагаврил пашманшивугу кIидачIлай, дакIнийхтунусса жижара буллай буру ласнахь ХIасаннухь, арсурваврахь Арсеннухь ва Зияуттиннухь, душнихь Анжелахь ва махъсса цинявппагу гъан-маччаминнахь. Цил рухI алжаннун нясив даннав, имандалий лавгун лякъиннав, махънал оьрмурдай барачат бишиннав.
Кьукуннал жямат
МАХIАММАДЛУЛ ДУШ РАДЖАБОВА МИЯСАТ
КIувурдал шяравасса ххаллилсса хъамитайпа, ас-намус бусса инсан, зузала, МахIаммадлул душ Раджабова Миясат аьпалул хьуну мукьцIал лавхъунни.
Бувну бур Миясат 1940-ку шинал Дагъусттаннал халкьуннал артист, РСФСР-нул лайкь хьусса артист МахIаммад Мусалаевлул ва Зувайрижатлул дянив.
Кулпатраву 10 оьрчI буну, ниттин кумагран, 5-мур класс бувккуну махъ Миясат лавгун бур фермалийн дояркану. КIувурдал колхозраву зий ванил 32 шин дурссар, вай шиннардил мутталий бувсса дакIнийхтунусса захIматрахлу лайкь хьуссар райондалул ва республикалул лагрулийсса личIи-личIисса бахшиширттан, медаллан.
Миясат ялагу зий бивкIссар КIувурдал шяраваллил культуралул къатлувугу. БувчIуну бивкIссар райондалул мажлисрал депутатнугу.
Ласнащал, Аьбдуссамадлущал, хъунигу бувну, дуккингу бувну, оьрмулул ххуллурдайн бивчуссар 5 оьрчI. Ччяни аьпалул хьусса ласная махъгу диялсса гьиву цилла хъачIунттай ларсун най бивкIссар.
Миясат бия хъинсса дакI-аьмалданул заллу, лагма-ялттунащал бавкьусса, къатлувун увхманал хIурмат бусса, ккашилнал лякьа, мякьнал кьакьари кIулсса инсан. ХIакьсса зунттал хъамитайпалун лайкьну ва бия кару магьирсса, канил цимирагу даву дуван кIулсса. Цилла каруннал щаршмур пишкаш къадурну къатлувун увкIма итакъаакьайва.
Миясат аьпалул шаврил кьурчIишиву кIидачIлай, жижара буллай буру оьрчIахь Рамазаннухь, Аьбдурашидлухь, Пазиратлухь, Пакиятлухь, Валентинахь, арснал хъаннихь, махъсса цинявппагу гъан-маччанахь. Миясат алжаннул ххари буваннав, ванил барачат махъ ливчIун лякъиннав, ванин ххираминнал оьрмурду лахъи баннав.
КIувурдал
ва Хьурттал жяматру