Апрель зурул 5-нний «Дагестан» РИА-лий хьунни Республикалул аьралий комиссар Дайтбаг Мустапаевлул интнил призыврал хIакъиравусса пресс-конференция.

Байбихьулий ванал ларгсса (2022) шинал ссуттилсса призыврал хIасиллу дунни.
– Жула республикалун кка­ккан бувну буссия 3,5 азара инсан тIайла уккан аьралуннаву къуллугъ бан. Комиссариатирттал зузалтрал хIарачатрайну жуйва бивхьусса бигар цила чIумал щаллу бан бювхъунни, – увкунни Дайтбаг Мустапаевлул.
ЦIанасса призыврал хIа­къи­раву ихтилат буллай, ванал бувсунни гьашину ин­тту аьралуннаву къуллугъ бан 4 азаруннийн бивсса жагьилтал гьантIишиву, призыврал кампания апрель зурул 1-нния июль зурул 15-ннийнин най дикIантIишиву.

Аьралий комиссарнал бусласимунийн бувну, интнил призыв дайдишин хьхьичI, Да­гъусттаннал БакIчи Сергей Меликовлул каялувшиндаралу хьуну дур интнил призыврайн хIадуршинна даву мурадрай­сса районнал призыврал комиссиярттал председательтурал, районнал ва шагьрурдал аьралий коми­ссартурал кIира нюжмардийсса батIавуртту.
– Интнил призыв нанисса чIумал Аьрасатнаву 45 азарунния ливчусса жагьилтурайн оьвчин тIий бур призыврал коми­ссиярттайн.
Генерал штабрал жула республикалия аьралуннаву къуллугъ бан буцин ккаккан бувну бур 4 азаруннийн бивсса инсантал. Вайксса ккаккан баврил савав дур билаятрал хъуниминнал жула Ярагъуннил гужру 1,5 миллиондалийн бияннин ххишала бансса хIукму баву.

БатIаврил ва призыврал пунктирдай дайдирхьуссар призыврал комиссиялул давуртту.
Дузал дурну дуссар призыв­рацIун дархIусса шартIру. Призывниктал тIайла буккантIиссар къуллугъ буллантIисса кIанттур­дайн автобусирттай, поездрай ва самолетрай. Республикалул сборный пунктрая тIайла буклакисса жагьилтал щаллу бантIиссар гьарица аьркинмунил. Гьарцаннахьхьун дулунтIиссар цала цIанийсса банкрал карта ва цанналусса электрон карта, – бувсунни аьралий комиссарнал.

Ванал кIицI лавгунни аьралуннаву къуллугъ бан буцлацисса жагьилтал Донецкаллал, Луганскаллал, Херсоннал ва Запорожуллал областирдайн къагьанбантIишиву, аьралуннаву къуллугъ бан бувцуми хьхьичIва кунма ца шинай къуллугъ буллантIишиву, агана Обороналул министерствалущал контракт чичин пикри къахьурча.
Журналистътурал суаллахьхьун жавабру дуллай, аьралий комиссарнал бувсунни контрактрайсса къуллугърал хIакъираву. Ванал бусласимунийн бувну, контрактрай къуллугъ бан ччиминнаща яла чанну ца шинайсса контракт чичин бю­хъайссар.