– Дагъусттаннай яла буккаймур кказит цумур бухьунссар, вил пикрилий? – тIий цIухлай бур ца кьини Ватсаправу коллега, «Minmor» сетевой изданиялул журналист Диляра ХIасанова.
– «Черновик» бухьунссар, – тIий чичав нагу.
– Ма! Пахру бува инава яла итталумур кказитрай зий бушиврия, – куну, ва сурат гьан дурунни.
– Учачакьай утти щил-бунугу на бусса кIанттай миллатрал кказит щил буккайссар куну, – чичлай бур гихунмайгу Диляра.
Баяйхьунссар Дилярангу Дагъусттан миллатирттал мазурдийсса кказитру щил буккайссар тIисса зат. ТIайламур бусан, ттун ттинин бакIрайн къабагьссар ва куццуй инсан уний авцIуну кказит ккалаккисса иш. На хъинну махIаттал-хIайран хьуну ливчIунна. Мунияту рищав ва сурат вичIан гьан дуван, – тIий бур коллега.
[dropcap]М[/dropcap]яйжаннугу, цуксса къаххуйри республикалул ца яла хьхьичIунмур изданиялий зузисса коллегал, цамур миллатрал инсаннал «Илчи» кказитрал хIакъираву увкумур.
Ца базилухгу, издательствалучIа маршрутка бацIан ба чайхту, шофернал цIувххунни ина кказит-журналлу итабакьай идаралий зий бурав, куну. «Илчи» кказитрай зий бура чайхту, хъягу-хъяй бувсунни ххуллийх «Илчи» ккалай най унува, люкравун агьсса адамина уккан уллай ивкIшиву цува. Ххи бунни: «Илчи» ца яла машгьурмур, тираж лахъмур кказит бухьунссар куну.
Яла тираж лахъмур бакъар, амма яла буккаймур бушиврий дакI дацIансса ишру тамансса шай.
Барчаллагь зун, жул ххирасса, дакI тIайласса буккулт!
КъадучIаннав жулла ялун тачIав ниттил мазрайсса кказит шавкьирай къаккалаккисса, ниттил мазрайсса ихтилат гъирарай къабуллалисса чIумул ссят, сурат!