Апрель зурул 14-нний Дагъусттаннай дайдишинтIиссар агьали давурттал дузал буллалисса «Работа России. Время возможностей» тIисса щалагу Аьрасатнал ярмукIалул цалчинмур бутIул даву. Му даврил агьаммур мурадну бур анаварсса мутталий агьали даврил дузал баву.

МахIачкъалалив му дай­дишинтIиссар «Аьрасат – ттул тарихри» тIисса музейраву ссят 13:00 ва къуртал хьунтIиссар ссят 18:30. Шикку гьуртту хьунтIиссар 80-хъул предприятияртту, 500-ннийн бивсса вакансиярттащал. ЯрмукIалий гьуртту хьунтIисса предприятиярттавух дур: АО «Завод им. Гаджиева», АО «Завод Дагдизель», АО «Концерн КЭМЗ», ООО «Каспийский завод стекловолокна», АО «Мостоотряд-99», ОАО «Денеб», ООО «2 ГИС-Дагестан», ООО «Визаж косметикс», ООО «Фирма АС», ООО «Опт-Трейд-Лимитед», ООО «З&М-ГРУПП», «Павлония» кафердал сеть ва цаймигу предприятияртту.

Давуртту лякъаву бакъассагу, пишакартуран кIул хьунтIиссар даврил даража гьаз бансса ва тIалавсса пишарду лахьхьин­сса куц.
– Щалагу Аьрасатнал даражалийсса вакансиярттал ярмукIалул цачIун буллали­ссар республикалул чIиримур ва дянивмур бизнесрал промышленностьрал, экономикалул ва цаймигу тIалавсса сферардаву даврил щаллу буллалисса ва давурттах луглагисса инсантал. ЯрмукIалийн бувкIминнаща бюхъантIиссар, давурттал дузал буллалиминнащал ихтилат бувну, жула региондалий да­къассагу, региондалул кьатIувгу давуртту лякъин, – увкунни ДР-лул захIматрал министр Мурад Казиевлул.
Мунал мукунма бувсунни личIи бувну бикIантIишиву давурттал дузал буллалиминнал ва давурттах луглагиминнал ихтилатру бан ккаккан бувсса, даврил шартIирдая ва вакансиярттая бусласисса стендру дусса площадкартту:
– кIулшивуртту дулаврил идарарттал тIалавшиннарду дусса пишарду лахьхьин буллансса.
– цивппа заллусса даву дачин дан ччиминнан ( лавайсса даражалул карьерарду дачин дурсса консультантътурал чIарав бацIаврийнусса) кумагрансса.
– цIуллушиврул ссуссукьушиву дусса инсантуран карьералул чулухасса кумагрансса маслихIатру буллалисса.
– мастер-классру буллансса ва цаймигу.

Агьали давурттал дузал баврил вакансиярттал щалагу Аьрасатнал ярмукIалул кIилчинмур бутIул даву дайдишинтIиссар июнь зурул 23-нний. ЯрмукIалул федерал бутIун хасъсса «Робота России» тIисса порталданий кIул бан бюхъантIиссар регионнаясса давурттал дузал буллалисса хьхьичIунсса ишбажаранчитурая.
Вакансиярттал ярмукIалий бикIантIиссар студентътуран, выпускниктуран цIанасса оьрмулуву тIалавшиннарду дусса пишарду язи бугьансса маслихIатру буллалисса экспертътал.
ДакIнийн бутанну «Демография» миллатрал проектрал лагрулий агьали давурттал дузал буллалисса къуллугърал даву иширайну зузи дурну душиву.