[dropcap]М[/dropcap]арт зурул 28-нний ДР-лул ХIукуматрал Председатель Аьбдулмуслим Аьбдулмуслимовлул каялувшиндарай хьусса совещаниялий гьаз бунни шяраваллил кIанттурдайсса ДР-лул МФЦ-лул филиаллай зузисса хъаннил даврил чIун ца ссятрал кутIа даврил хIакъиравусса масъала.

Шяраваллил кIанттурдайсса МФЦ-лул филиаллай зузисса хъаннил даврил чIун кутIа даврил сиптачину увккунни Да­гъусттаннал оьрмулунсса дузалшиннарду дуллалисса профсоюзрал комитетрал председатель АьбдурахIман Адамов. Ва цувагу совещаниялий гьуртту хьунни.
– КIулсса куццуй, ЗахIматрал кодексрай хIисаврайн лавсун бур шяраваллил кIанттурдай зузисса хъаннил, харжгу ябувну, зузаврил чIун кутIа дансса каши ишла дан бюхъайшиву. МФЦ-рдай зузалтран бивхьусса харж хъар хъанахъиссар миннал дурсса даврия. Зузаврил чIун чан даврийну МФЦ-лул зузалтрал харжиран зарал биян къааьркинссар, – увкунни Аьбдулмуслим Аьбдулмуслимовлул.

Гьаз бувсса масъалалул хIа­къиравусса цала пикрирду бувсунни ДР-лул ХIукуматрал председательнал цалчинсса хъиривчу Руслан Аьлиевлул, ДР-лул экономикалул министр ХIажи Султановлул, ДР-лул захIматрал министр Мурад Казиевлул ва Республикалул юстициялул министр Сергей Караченцевлул.
ХIажи Султановлул бувчIин бунни, АьФ-лул 2012 шинал декабрь зурул 22-нний кьамул бувсса №1375-мур хIукмулийн бувну, муниципалитетирттайсса агьалинал ­аьдад хIисавравун ларсун, кка­ккан дурну душиву МФЦ-лул даврил норматив. Му бакъа­ссагу, гьарца шинал цIакь дайшиву МФЦ-рдал филиаллансса паччахIлугърал заданияртту.
– Ца чулуха, МФЦ-рдал даврил хIакь миннал дурсса даврия хъар хъанай бур. Вамур чулуха тIурча, бувчIлай бур шяраваллал кIанттурдайсса МФЦ-рдайн агьали кIюрххилва бучIайшиву, мунийн бувну, зузалтрал даврийн цукунчIавсса щавщи къабиллалиссар, – увкунни ХIажи Султановлул.
Сергей Караченцевлулгу ххи бунни, АьФ-лул ЗахIматрал кодексрал 263.1 статьялийн бувну, шяраваллил кIанттурдайсса хъаннил зузи кьини кутIа шаврийну миннал харжирдайн щавщи биян бан ихтияр дакъашиву. Мунийн бувну, вай филиаллал каялувчитурал, даврил сияхIгу хIисавравун ларсун, цивппа рязишиву исват буллалисса хIукму кьамул бан аьркинссар.
Жула республикалий ва цIанакул сукку бувсса масъалалул хIакъиравусса практика нукIура ишла дуллай бу­ссар. ДР-лул ГАУ МФЦ-лул кая­лувчи МахIаммадамин Арслан­аьлиевлул бувсунни УнцIукIуллал ва Хивуллал районнайсса МФЦ-лул филиаллай, ЗахIматрал кодексрал 263.1 статьялийн бувну, зузи кьини кутIа дурну зий бушиву.
Совещаниялул даврил хIа­силлу дуллай, Аьбдулмуслимовлул кIицI лавгунни, шяраваллил кIанттурдайсса филиаллай зузисса хъаннил даврил чIун кутIа даврицIун ( ссят 18.00-нния ссят 17.00-ннийн бияннин, яни зузи кьини ссятрал кутIа дан) рязи хъанай ушиву. Зузи кьини кутIа даву мурадрайсса хIукмурду кьамул був­сса филиаллал каялувчитурая тIалав бунни агьалинал чулухасса хIаллихшиннарду лавай­сса даражалий щаллу даврил ялув бацIаву дан.