МахIачкъалалив, Дагъусттаннал Художниктурал союзрал выставкартту дувай залдануву, тIиртIунни гьарца шинал шайсса пленэр живописьрал выставка «Лето – 2022». Ва сакин дурну дия Культуралул министерствалул ва Художниктурал союзрал.
Выставка тIитIлатIисса шадлугърай махъру лавхъуна Дагъусттаннал Художниктурал союзрал председатель Кьурбанаьли МахIаммадовлул, залданул директор Амирхан МахIаммадовлул, М. Жамаллул цIанийсса Художествалул училищалул директор Мухтар Камбулатовлул ва цайминналгу.
Ва кьини ккаккиялун дирхьуну дия 200-нния лирчусса давуртту. Ванийн жагьилсса художниктурал выставка тIурчангу, жагьилминнащал архIал шикку гьуртту хъанай бия оьрмулул ва творчествалул биялсса ххуллу бивтсса, цIа дурксса художникталгу. Вай кIивайннавухвагу бия лакрал миллатраяссагу. Буварду вайннащал чIиви-хъунсса ихтилат жугу.
Гульнарал «Дастархан»
Хъунайннал шяравасса Аьлиева Гульнарал ва выставкалий дирхьуну дия «Дастархан» темалийн дагьайсса натюрмортирттал серия – най дуна итталун дагьлагьисса давуртту. Гульнара бувну бур УзбакIнаву, ванил творчествалувугу ва билаятрал культуралул къачIивисса кIану бугьлай бур.
– «Дастархан» узбакI мазрай «ссупра» тIиссар. Инсантал цачIун бувайсса, лагма лаган бувайсса, нахIусса дукралух, чяйлул пинжанналух дакIнийхтунусса ихтилатру бачин буллали бувайсса ссупра. Ттул мурад – ттулла давурттайну инсантурал дакIурдиву ларг чIунну утта дуккан давур, личIи-личIисса миллатирттал инсантурал цашиврий, дянивсса цIакьсса арардал агьамшиврий цал ххишалану чIурчIав давур, – тIий бур Гульнара.
Уттинингу Гульнара гьуртту хьуну бур личIи-личIисса выставкарттай. 2009 шинал Дагъусттаннай хьусса «Русский силуэт» конкурсрай лайкь хьуну бур Гран-приран, хъиривва Москавлив жулла республикалул чулуха гьуртту хьуну бур ва конкурсрай. Ванияр ца-кIира шинал хьхьичI Санкт-Петербурглив гьуртту хьуну бур «Этнопалитра», «Этно-пикник», «Мосты дружбы» выставкарттай, мукунна ва шагьрулий хьуну дур жагьилсса художникнал циллалусса «Дастархан» выставкагу. Ларгсса шинал хьуссар Дунияллул халкьуннал дянивсса «Кубачинская башня» тIисса цIанилусса III биеннале, ванийгу душнил дурссар хьхьичIунсса гьурттушинна.
Гульнарал бувккуну бур Дагъусттаннал М. Жамаллул цIанийсса Художествалул училище (отделение «дизайн костюма»), хъиривва – ДГПУ (отделение ИЗО, сурат дишаврил учитель). Зий бивкIун бур личIи-личIисса типографиярттай графический дизайнерну, мукунма футболданул «Анжи» клубрал дизайнернугу.
ЦIана Гульнара тархъансса художник хIисаврай дизайнраха зий бур, мукунма живописьраха ва графикалухагу.
ПатIиматлул «ПархтIутIив»
ПатIимат Кьурбанова бур Гьуйннал шяравасса. Бувну бур МахIачкъалалив. Школалийсса дуккаврищал архIал бувккуну бур шагьрулул ОьрчIал художествалул школагу. Школалия махъ М. Жамаллул цIанийсса Художествалул училище бувккуну бур. Махъ Москавлив Художествалул практикарттал ва музейрдал технологиярттал лаваймур школалий ларсун дур луттирдал реставрациялийн ва переплетрайн дагьайсса кIулшивурттугу. ЦIанасса чIумал ПатIимат бур ДГПУ-рал художествалул ва графикалул факультетрал студентка, зий бур цилва къуртал бувсса ОьрчIал художествалул школалий сурат дишаврил, живописьрал ва скульптуралул дарсру дихьлай. Мукунма луттирдал реставрациялухагу зий бур.
ПатIимат цимигу выставкалий гьуртту хьуну бур. Ва кьини тIурча, выставкалий дия чагъарданий кIалашрах (хъуручIух) дирхьусса графикалул журалул суратру – двиптих, яни кIира сурат. Вай дия пархтIутIал (подсолнух) суратру.
– Ахъува пархтIутIив рирттуну бувкIсса чIумал, щябивкIун, сайки ца лахIзалий, хъунмасса гъирарай дирхьуссия на вай суратру, цирдагу хьхьурай, – тIий бур ПатIимат.
Саиматлул «Амул буттукьа»
Хьурттал шяравасса Саимат Бариевал ва выставкалий дирхьусса суратирттаву ляличIинура итталун дагьлай дия «Амул буттукьа» («Бабушкин сундук») тIимур сурат.
Саимат зий бур МахIачкъала шагьрулул оьрчIал художествалул школалий дарсру дихьлай. Мунищала ва бур оьрчIал гьунарду итххяххан баврил «Галерея знаний и творчества» центрданул директоргу. МахIачкъалалив, Сочилий, Санкт-Петербурглив ва Москавлив личIи-личIисса выставкарттай ва конкурсирттай гьуртту хьуну, лайкь хьуну бур чIярусса бахшиширттан, ХIурматрал грамотарттан.
Аьйшатлул лакку суратру
Ва выставкалий Аьйшат (Ася) МахIаммадовал ккаккиялун дирхьусса давурттавух дия цила буттал шяравусса, Шахьувавсса, Дяшяраваллил махIлалул сурат, мукунна «Хъювхъавсса ахттайн чIун» цIанилусса сурат. Вай дур художникнал личIи-личIисса шиннардий дирхьусса суратру.
Аьйшат дарсру дихьлай бур Дагъусттаннал М. Жамаллул цIанийсса Художествалул училищалий. Къазахъисттаннай бувну, Дагъусттаннай школа къуртал бувну, муния махъ Дагъусттаннал художествалул училищагу, махъ ДГПУ-рал художественно-графический факультетгу бувккуну, зий бивкIссар цилва пишалий личIи-личIисса кIанттурдай. Сурат дишаврихсса гъира ванивун хар-хавар бакъа багьну бакъар, ва тамашалий бикIайсса бивкIун бур Грековлул цIанийсса Ростовуллал художествалул училище бувккусса ниттиуссу Кандаев ХIусайннул давурттай.
Ажувлул ххуржинттава
Гъумучасса Ажув Къячаевлул ва выставкалий дирхьуну дия графикалул ва акварель давуртту, вайннувух «Родопскийлийсса столик» тIисса цIанилусса суратгу. Ванил хъун бакъасса тарихгу бур укунсса: Ажув Родопский бульварданий инсантурал суратру дихьлай ивкIун ур, даврия игьалаган авцIусса чIумал ванал итталун багьну бур гиккува столданух щябивкIсса инсантал. Ванан му кIирисса гъинтнил кьини цалла итталун дагьсса сурат хъинну ххуй дирзун дур, чанигу ва ппурттуву художникнан аьркинсса куццуй багьлай бивкIун бур. Му мутта янилагу, дакIнивагу гьаннин, анаварну дирхьуну дур ва сурат.
Ажувнал 1984 шинал къуртал бувну бур Дагъусттаннал М. Жамаллул цIанийсса Художествалул училище. 1992 шинал къуртал бувну бур Украиннал Федоровлул цIанийсса Полиграфический институт. Уттинингу Ажув гьуртту хьуну ур чIярусса выставкарттай. Ва ур Аьрасатнал Художниктурал союзрал член. Зий ивкIун ур Дагъусттаннал хъунисса издательстварттай. Ванал дирхьусса суратирттал чIюлу бувссар миллатирттал мазурдийсса 100-нния ливчусса луттирду, «Дагъусттаннал ярагъ», «Дагъусттаннал костюм», «Дагъусттаннал кухня», «Дагъусттаннал тIабиаьт» тIисса ва цаймигу бахшишран булун куну буккан бувсса луттирду.
Ва ялун нанисса гъинттул хьунтIиссар ванал цаллалусса выставка.
Бадрижамал Аьлиева
