Декабрь зурул 4-нний оьрмулул 92 шинаву дунияллия лавгсса паччахIлугърал ва политикалул ишккакку, ЗахIматрал Виричу, Дагъусттаннал ПаччахIлугърал Советрал экс-председатель МахIаммадаьли МахIаммадов ларгсса итникьини увччунни буттал шяраву Лаващав. Декабрь зурул 5-мур кьини республикалий дя­гъулул кьинину баянгу бувна.

ЧIярусса шиннардий Да­гъусттаннал хъунаману ивкIсса ванал бивкIулул кьурчIишиву кIидачIлачIисса аьпалул махъру увкунни Аьрасатнал ва Дагъусттаннал хъуниминналгу.
– Лавгунни дунияллия Па­ччахIлугърал советрал бусрав­сса председатель, Аьрасатнал ва Дагъусттаннал хIакьсса патриот, аькьилсса каялувчи ва дакI аьчух­сса инсан. Вай гьантрай муначIан иян дакIнийну уссияв, чIал хьуну лявкъунна. МахIаммадаьли МахIаммадовлущалсса гьарца хьунабакьаву оьрмулул дарсну шайва, ванал цумур ишираву цукун къуццу тIун аьркинссарив куртIсса маслихIатру байва. ЗахIматсса чIуннардий Аьрасатнал цашиву ядувансса хIарачатгу, гьунаргу кIулну, Ватандалухсса ванал ччавугу кIулну, Да­гъусттаннал агьалинал ванал чулухунмайсса хIурмат хъунма­сса бия. Ттун мудангу ва дакIний личIанссар ттула хъунама дус хIисаврайгу, дагъусттанлувтурал язими хасиятирттал заллу хIисаврайгу: захIмат ххирашиву, ссавур душиву, аькьилшиву ва чувшиву. Жижара буллай ура ванал вихшаласса оьрмулул дус Зулгижат МахIаммадовнахьгу, арс МахIаммадссаламлухьгу, циняв гъан-маччацириннахьгу, – увкунни Сергей Меликовлул.
Аьрасатнал Президент Владимир Путиннулгу кIицI лавгунни МахIаммадаьли МахIаммадович дакIнийхтуну аякьа дуллай ивкIшиву цува лявхъусса билаятраха, зунттал агьалинаха, миннал масъалартту ва буруккинну ххуйну кIулсса инсан ивкIшиву.
– Дагъусттаннай аварасса ппурттуву МахIаммадаьлил цува чувшиву дусса ва кьянкьану ацIайсса каялувчи ушиву ккаккан бувссар. Жува мудан дакIний итанну ва яргсса, лахIан ан къашайсса, аслийсса патриот ва гражданин, – кунни Президентнал.
ДакIнийн бутанну, МахIам­мад­аьли МахIамма­дов увшиву 1930-ку шинал июнь зурул 15-нний Лаващав захIматчитурал кулпатраву. 1979-ку шинал январь зуруй Дагъусттаннал ХIукуматрал аппаратраву зун айивхьуссар, цIубутIуй – ДАССР-данул Министртурал советрал хъунаманал хъиривчуну, 1983-ку шиная шийнай – вава советрал хъунаману. 1987-ку шинал увчIуссар ДАССР-данул Верховный Советрал Президиумрал хъунаману, 1994-ку шинал тIурчарив – Да­гъусттаннал ПаччахIлугърал советрал хъунаману. 2006-ку шинал февраль зуруй Владимир Путиннущал хьунаавкьуну, цува къуллугърая мурахас ува тIисса аьрза буллуссар .