Декабрь зурул 3-нний МахIачкъалалив «Дусшиврул къатраву» шадлугърал даражалийсса мажлис хьунни Шяраваллил хозяйствалуха зузиминнал кьинилун хас бувсса. Шикку гьуртту хьунни ДР-лул ХIукуматрал председатель Аьбдулмуслим Аьбдулмуслимов, ванал хъиривчу Нариман АьбдулмутIалибов, ДР-лул шяраваллил хозяйствалул ва продовольствиялул министр Мухтарбий Аджеков, республикалул муниципал образованиярттал ва шяраваллал хозяйствардал хъуними.

Мажлис тIитIлай, Аьбдулмуслим Аьбдулмуслимовлул дур­ккунни Республикалул БакIчи Сергей Меликовлул чулухасса барча баву.
– Махъсса шиннардий хьунадакьлакьисса захIмашивурттах къабурувгун, Дагъусттаннал шяраваллил хозяйствардаха зузиминнал хъунмасса бутIа бихьлай бур республикалул агропромышленный комплексрал даву хьхьичIуннай давриву. Гьашинусса шингу жула захIматкашнал чIярусса бакIлахъия дучIан дур­сса хьунни. Мюрщими ва хъуними ризкьилул аьдад хъун даврил, ахъулссаннул ва ахънилссаннул, къюмайтIутIул бакIлахъия дучIан даврил чулуха жула республика мудангу хьхьичIунну дуссар. Ва отраслилуву зузисса цинявппагу пишакартал бур захIматшивурттахьхьун рай къабулайсса, кьянатсса шартIру духIан кIулсса, даврил опыт бусса. ДакIнийхтуну чIа тIий ура зун цIакьсса цIуллушиву, давриву тIайлабацIуртту ва республикалул экономика тIутIайх дичин дансса каши-кьудрат, – тIий бур Сергей Меликовлул чулухасса барча бавриву.
Аьбдулмуслим Аьбдулмуслимовлул кIицI лавгунни Да­гъусттаннал республика мудангу аграрный республикалун ккаллину диркIшиву.
«Республикалий махъсса ппурттуву туризм, промышленность хьхьичIуннай шаврил дахханашивуртту хъанай дунугу, Дагъусттан мудангу хьхьичIунну буссар аграриялулмур чулуха. Аьрщараха аякьа дусса ва захIмат ххирасса инсантурал хIарачатрайну, хьхьичIуннай хъанай дур шяраваллал хозяйствардал производство ва яхъанай дур буттахъая шийннай ирсирай нанисса зунттал халкьуннал аьдат-эбадатру»,– увкунни премьер-министрнал.
Хъирив Аьбдулмуслим Аьбдулмуслимовлул бувсунни республикалул АПК-лул 2022-ку шиналсса хIасиллая.
Мажлисрай мукуна гьуртту хьунни Къизлардал райондалийсса «Степной» тIисса совхозрал директорну зий ивкIсса, ЯтIул Ттугълил ордендалун лайкь хьусса, агропромышленный комплексрал ветеран Шарапуттин Инигов.
Шяраваллил хозяйствалуву бихьлахьисса захIматрахлу ва хьхьичIунсса ккаккиярттахлу дояркахъан, хIухчалтран, механизатортуран ва цаймигу пишакартуран дуллунни паччахIлугърал чулухасса наградартту ва Барчаллагьрал чагъарду.
Вара кьини шагьрулул Хъун майданнив хьунни республикалул районнал шяраваллил хозяйствардал продукциярттал ярмарка. Шикку ца яла ябацIанмур ва аваданмур майдан бия ЦIуссалакрал райондалулсса. Вайннал продукция ласлай аьдат хьусса инсантурал, дарщу-дарккусса кьинилух къабурувгун, лув дагьан къариртун, цимур-ца машан ларсунни.
Ярмаркалий кьювкьу­сса багьрай дахлай бия личIи-ли­чIисса продукция. Му ба­къассагу, шикку лакку дукрардал ссупра тIивтIуну, цуя-ца инсан къаивтунни хъамалу къаувсса. Муданма кунма, ва ххуллухгу, балай тIий, къавтIий, мажлис чIюлу бунни ЦIуссалакрал культуралул зузалтрал.
ЦIуссалакрал райондалул майдандалийн увкIсса Аьбдулмуслим Аьбдулмуслимовлул лавайсса кьимат бивщунни жула захIматкашнан, хIадурну ушиву бувсунни ва отраслилуву зузиминнан кабакьу буллан.