ЦIуссалакрал райондалул администрациялул бакIчи МахIаммад-ХIажи Айдиевлул кабинетраву хьунни ссуттилсса призыврал хIакъиравусса батIаву.
Шикку гьуртту хьунни райондалул бакIчинал хъиривчутал, шяраваллал бакIчитал, ВУС-рал (военно-учетный столлал) пишакартал. Совещаниялул лагрулий ххал диргьунни ВУС-рал пишакартурал призыврацIун дархIуну дурсса даву.
Вайннал бувсунни цала циксса повесткартту дуллуссарив, военкоматрайн циксса жагьилтал бувкIссарив, цикссаннал дуклакисса кIанттурдаясса справкартту диян дурссарив, шаппа бакъашиврийн ягу военкоматрайн къабувкIшиврийн бувну цикссаннал хIакъираву рапортру чивчуссарив. Райондалул бакIчинал аьй ккарккунни пишакартурай, ссуттилсса кампания дайдирхьуния шихуннай, цума чув уссарив ххал увну, повесткартту дулун къабювхъуну тIий.
Цимилгу кIицI лавгунни армиялийн буцлацими хасъсса аьралий операция нанисса кIанттурдайн гьан къабантIишиву.
