Дагъусттаннал халкьуннал шаэр Расул ХIамзатов увсса кьини Москавливсса ванал гьайкалдануцI тIутIив дирхьунни Дагъусттаннал БакIчинал ва ХIукуматрал Администрациялул хъунама Алексей ХIасановлул ва Аьрасатнал Президентнал Дагъусттаннал Постпред Владислав Толстюклул. Ва мероприятиялий гьуртту хьунни Дагъусттаннал Культуралул центрданул вакилтал каялувчи Арсен ХIусайнов бакIчину ва Мариян Илиясовал цIанийсса «Дараччи» фондрал душру.
«Щаллагу дунияллий Дагъусттан машгьур бувсса шаэрнал кьимат бюхттулну буссар мудангу Москавливсса дагъусттанлувтуравугу. Мяйжаннугу, чIявусса лак бия бавтIцириннаву. Цала оьрмулул иширттай Москавлийн аьрххилий бувкIсса лакгума бувкIун бия тIутIив дишин. Арсен Буйдалаевичлул тIайлану увкунни, цува дунияллия лавгния махъгу хъунасса шаэр Дагъусттаннал агьали билаятрал гьарцагу мурцIний, хъуншагьрулий цачIун батIан буллалисса кашилул заллу ур куну.
Расул ХIамзатовлул творчество – Дагъусттаннахсса ччаврил видурцIусса, къявхъа тIутIисса дур, ванал граждан лирикалул гьарцагу хха аманатрал дуаьлул ххуллийсса бур, гьар шинах ванал гьаттачIан батIавугу цIакь хьусса аьдат дур», – увкунни «Илчилул» корреспондентнахь мероприятиялий гьуртту хьусса Басират Билаловал.
ДакIнийн бутанну Яузский бульварданий 2013 шинал Расул ХIамзатовлун гьайкал тIитIлатIисса шадлугърай гьуртту хьушиву Аьрасатнал Президент Владимир Путингу.