(2-мур бутIа)
Цал укунсса зат кIицI бан багьлай бур. Дагъусттаннал хъунама Р. АьбдуллатIиповлул увкуссия: «Если вы не называете вещи своими именами, вы не воспитываете детей, которые будут грамотными и честными людьми. Мы хотим упорядочить дела в Дагестане, и без помощи учителя этого не сделать»
(«Школа должна решать главную задачу – приобщение к духовным идеалам», 20 августа 2013). Учитель гьарца ишираву аьркинну ур. Амма мунахасса аякьа башттанна лащинсса дур. Мунал ласайсса харжирах (Бархъаллал школалийсса ца учительнал, 46 шинал стаж бусса, ставка дахьва 8000 къурушрая личлай бур) цир ласунтIисса? Учительная чIярусса тIалавшиннарду дур. Мунан харж лахъ бавриятугу лапва чIявусса гъалгъарду бур. Дянивну вайксса-тайксса азарда къуруш тIий, хъяврин буллай буру жува. Жунма, кIулшиву дулавриву гьуртту хъанахъиминнал харжру цачIун бувну, мичча лавсъсса дянивсса харж бакъар аьркинсса. Ихтилат бикIан аьркинсса учительнал ца ставкалух – 18 ссят – ласайсса харжираятур. Ялами хаварду – ми иттах лах бишлашавур. Хъуни махъру! Ца газрал баллон сайки 500-600 къурушран дур. Дугьай хъунил ца бутIа (2000 кв.м.) нувщул бугьларча, ххалбара миккусса багьри. Нувщи аьрщаравун бичаву къагьархха. Минерал оьргъашиврул ца дарваграл багьа ци бур, бугьаву, уртту дурчIаву, кказа баву, аьрщи диян даву, гъангъаратIив литIун баву, нувщи биххаву ва шаппайн ласаву. Цанни учитель хъуниха зузисса, учинссар. Цан уссарив шяраву ялапар хъанай уманан кIулссар. Хъунил давуртту цайми чIяруссар. Хъуниха зузиссар учитель уччиннин цанмагу, къатлувуминнангу ччатI аьркинну буну тIий. Ва хъинну агьамсса масъалар, цичIавнияр хъунмасса. ЧчатIуйри цимурца дарцIуну дусса. Дарсирдая махъсса чIумал хъув нанисса учитель – му ца малаикри. Вари шяраву инсан ацIаврил мяъна-мурад, МОМЕНТ ИСТИНЫ. Тай жулва ппухълуннал, кIай зунттавусса зунххишиннардай дурну, жунна аьпалун кьадиртсса хъуруннах ябитира. КIай хъуру дурссар нано-технологиярдугу, интернет ва телевизордугу, «Сколковогу», электронное правительствагу ссайн учайссарив къакIулсса арантурал, хъарасирттах, кулунгирттах, чIатIрах. Тайгуя жулва малаиктал. Тайннал телевизоръя Хъун ккурчIа. Ча, хIакьину жува цаппарасса тай ппухълуннал арсру-душру ттигу школардай зийна буру, кув тIурча, пенсиярттайн бувккун буру. Аьрасатнал хIукуматралгу жунна кумагран ччуччия дулайссия. Утти, тIурча, ми ччуччия ласунсса арцу дуллали хьуну бур. Дуллуну къуртал хъанайгу бур учин къашай. Му масъала цимилгу ххалбивгьунни Дагъусттаннал цаппарасса министерстварттай, ведомство-учреждениярттай. Ххалбигьлагьаврил мурадгу щинчIав къакIулссар. Мукун, цавайннал дайсса даву гайминнал дуллалисса учрежденияртту, циваннив, сислай бакъар льготникнан дагьаймур дулун. Масала, нава тIимур бачIва къабитан, ласав «В парламенте Дагестана обсудили проблемы предоставления компенсаций учителям и врачам на приобретение твердого топлива» (Элиза Алиева, 20 ноября 2013) тIисса макьалалува укунсса затру. 1. Вице спикер парламента С. Исаков подчеркнул, что «оказанию мер социальной поддержки отдельным категориям граждан было посвящено не одно совещание, но, несмотря на это, решение до сих пор не найдено. 2. Председатель комитета НС РД по здравоохранению и социальной политике М. Авезов: «Зима уже не за горами, дома необходимо топить углем и дровами, а вопрос до сих пор не разрешен. 3. …«Камиль Давдиев предложил проработать механизмы, которые позволяют людям на местах приобретать качественное твердое топливо и получать квитанции». Тамашасса иш бур ва. Ва масъала парламентраву цимил гьаз барчагу, арцу дулунсса (ччуччиялул нормалух – 6 тонна хъуручIул) хIукму цукунчIав ца чулийн бувккун бакъар. Цирвав савав? Ялагу гама ур «твердое топливо» ва «квитанции» тикрал дуллай. Я вил къаттай, тIий ура на, ккакки-дити, ми топливо Дагъусттаннай диялсса дакъа тIийрихха банмагу та Дагъусттаннал Конституционный судрал квитанциярду тIалав дуллалавуртту дукьан дурсса, ца чулуха.
Цирдагу 2012 шинал 25-мур апрельданий. Циванни миннуяту тIун уттигу? Ялагу тава та, тава та. Утти бучIанну цIусса хIукмурдачIан. Явара гьа, хъамакъабитанну кIа байбихьулий чивчусса «если вы не называете вещи своими именами» тIисса махъругу. «Открытая власть» тIисса махъругу баллай бухьувкун, гьарзат чичинна мукун аьчухну. Ларгсса шинал октябрь зуруй хьуссия Дагъусттаннал парламентрал 44-мур сессия. Та сессиялий ххалбивгьуссия «О внесении изменения в статью 4 Закона Республики Дагестан «О мерах социальной поддержки по оплате жилых помещений и коммунальных услуг отдельным категориям граждан в сельской местности и поселках городского типа» тIисса масъала, цувгу Дагъусттаннал ХъунаманачIату сессиялийн бувкIсса. Му сессиялий депутат М. Авезов укун тIий ур (видео дуссар, ттуйн вих акъанал, ххалбара): «Архсса зунттал щархъава цачIан чагъарду ва телеграммарду дукIлай дия, ай, цив зурул бакIрах 1000 къуруш дуллалавриятугу рязиссару, тIисса. Жугу хIукму барду, кIайннал аьрзардайн бувну, 1000 къуруш дуллан». Ва депутатри. Ванаща къавхьунни пулансса учительнал, шяраваллил, райондалул цIа кIицI лаган. Вайннуйн учайссар ялттувасса махълахъурду. Ванаща оьрус мазрай цалва пикри, мяйжаннугу цалва биявхьур, бувчIинну бусан къавхьунни. Ялунгума ва ур укун тIий: «Еще раз объясняю для тех, кто не понял. Есть учителя, которые хотят получать и то, и это. Есть и такие, которые хотели бы получать по 2,5-3 рубля». Ттун къабувчIунни ссайн тIиссарив «и то, и это» ва цирив ми «2,5-3 рубля». Амма закон кьамул дурссар. Ттун ягу вин бувчIа-къабувчIаврилсса буллай цучIав акъархха. Мукун хъанай бухьувкун, мува сессиялий депутат, директор Дагестанского НИИП, профессор Г.И. МахIаммадов укун тIий ур: «Депутат не должен быть регистратором закона, он должен вникнуть в сущность закона. В последние годы нам приносят в спешке приготовленный проект, и мы все голосуем за него, но дальше так продолжаться не может». Ца кIилахърулул чIумуй льготникнан дагьлай дур 6 тонна хъуручIул. Миннух дулун багьлай бур сайки 36 азарда къуруш арцул. Депутатътурал хIукмулийн бувну, ччуччиялух ца кIилахърулий дулун тIий дур 12000 къуруш арцул. Къахьунссархха миннух аьркинссаксса ччуччия ласун. Аьрасатнал закондалийн бувну, льготникнан кумагран дуллалимур региондалул закондалийну дукьан даву къатIайлар. Му хъуннасса ссуссукьушиннар. Мунийн кумаг къаучайссар. Депутатътурангу кIулну хъинссар цалла кьамул дуллалисса законная чIурду булайминнан кумаг хьун аьркиншиву. Цуппа муна му зат дакIнийн бутаншиврулъяхха Р. АьбдуллатIиповлул 42-мур сессиялий увкусса: «Депутаты должны отражать интересы и самочувствие избирателей, такова депутатская работа». На къавихра архсса районная 3000-ннин кIанттай 1000 къуруш арцул жун гьассар, тIий, цу-унугу оьвтIий ивкIссар учаврийнгу. Дагъусттаннал Конституциялий буссар: «Исходя из целей социального государства, поставлена задача развивать систему социальной защиты, что предполагает введение эффективных правовых механизмов, обеспечивающих сохранение и возможное повышение ранее достигнутого уровня социальной защиты граждан» (ст.40,ч.3). Ялагу ца укунсса зат. Ванихава лавхьхьусса масъала ххалбивгьуну бур Ростовуллал областьрал чулухасса аьрзалийн бувну, РФ-лул Верховный судрал. Дур ОПРЕДЕЛЕНИЕ от 11 апреля 2011 года. Укунсса бувчIин баву дурну дур: «Наделение органов государственной власти субъектов Российской Федерации правом принимать нормативные правовые акты, устанавливающие размер, условия и порядок возмещения расходов, связанных с предоставлением мер социальной поддержки педагогическим работникам образовательных учреждений не влечет за собой право субъектов Российской Федерации снижать уровень социальных гарантий для соответствующих категорий граждан, предусмотренных федеральным законодательством». Ттун чIалачIиссаксса, къабувчIинсса шикку зат бакъар, къабувчIлай бур Дагъусттаннал парламентрал ци гьанулун ларсун кьамул дурссарив ва закон. Ялагу «Слово предоставляется Пуланову Пулану (мисалдаранни вай цIарду укун чирчусса) от фракции» ци тIиссар? ЧIурду булайми партиярдайх (фракциярдайх) бавчIуну бакъассархха. Учин аьркинни, мисалдаран, «депутату от Акушинского района».
Исмяил ХIусманов,
ш. Бархъал — ш. Москав
Редакциялул чулуха
Ва чагъар кIива-шанма зурул хьхьичI бувкIун бивкIсса чагъарди, вай масъаларттаха зузисса службалул официальнайсса жаваб дулунцIа бувгьуну бивкIсса. Му жавабгу жучIан хъинну чIалну дирунни. Бархъаратусса ХIусманнул гьаз буллалисса масъалалул хIакъираву цIуххаву дан жу лавгру Дагъусттаннал ЗахIматрал ва социал иширттал министерствалийн.
Ва чагъаруннин пишакартурал жаваб дулуншиврул аьрза кьабитан аьркинссар тIий, мукунсса аьрзагу чивчуну кьабивтссия. Дахьра утти дирунни жучIан му чагъаруннинсса укунсса жаваб:
— Мяйжаннугу, коммунал хIаллихшиннардах зуруя зуруйн дулун аьркинсса арцу (ЕДВ по ЖКУ) цаппарасса инсантуран, чIумуй дулун къархьуссар ми арцу ДР-лул бюджетрава Министерствалийн чIалну, цирдагу дачIи-кьачIину дирну тIий.
Мукун чIал хьуссар шяраваллаву ялапар хъанахъисса ва зузисса учительтуран ччуччиялух (хъуручIух) дулайсса арцугу. Ахъушиял райондалийсса учительтуран, миннавух Бархъаллал школалул учительтурангу. 2013-2014 шиннардий хъуручIух дагьлагьисса циняв арцу ДР-лул ЗахIматрал ва социал иширттал министерствалул дирчуссар райондалул соцзащиталул управлениялийн 2015 шинал март зурул 6-нний.
ХIасил, 2013-2014 шиннардий Бархъаллал учительтуран ччуччиялух дулун аьркинну диркIсса арцу минначIан дирну дикIан аьркинссар.
ДР-лул ЗахIматрал ва социал иширттал министрнал
хъиривчу Р.Ф. Фармонов
