Цалчинмур ЦIувкIратусса Аьбидов МахIаммад дяъви хьуннин зий ивкIун ур шяраваллил колхозрал председательну. Ми шиннардий мунал хъунмасса захIмат бивхьуну бур колхозрал иш бюхъан бан.

СсурхIиял дазуйсса Бичиличчай фермагу МахIаммадлул дурну дур, ми колхозниктурал маэшат гьаз бансса ххуллу-чаранну луглайнува­сса, бюхъу-бажар бусса председатель ивкIун ур.
ЦIувкIуллал пагьламантал циркравун тIайла буккан гьану бивзмагу МахIаммад Аьбидов хъанай ур. ХIакьинусса кьинигу яхьуну дур МахIаммадлул арсначIа, СулайманнучIа, 1939 шинал Физкультуралул ва спортрал иширттал­сса буллалисса Всесоюзный комитетрал буттан дуллусса ХIурматрал грамота.
Москавлив хьусса выставкалий хьхьичIунсса гьурттушинна даврихлу Микояннул цIанийсса (таний ЦIувкIуллал колхоз Микояннул цIанийсса диркIун дур) колхозрал физкультурный коллективран лавайсса кьимат бивщуну бур Москавуллал комитетрал. Цайми-цаймигу лахъазанну ва грамотарду ласлан къанясив хьуну бур Аьбидов МахIаммадлунгу: 1942 шинал дяъвилул Моздокрай кьувкьуну бур муналмур кьисматгу.
«Буттал колхозрал председательну зуннин Орджоникидзелий аьралий бурж биттур бувну бивкIун бур, — буслай ур Сулайман. – Ттулмур оьрчIшивугу, жагьилшивугу ппухълу дяъвилул зевххусса ятинтуралсса куннасса хьунни.
Жулва захIматрал, бюхъу-хIарачатрал чивун буккан бунну, амма буттахсса мякь яла къалавгунни навагу ттатта хьуну ухьурчагу.
На скульпторнахь-худож­никнахь буттал бюстгума буван бувссия. Ттухь чIявуссаннал учай: «Вил буттал инсаннащал хъяй акъа ихтилат къабайва», — куну. Ттуна ххуйну дакIний къаливчIунни, ттун 6 шин диркIун дур ппу аьрайн уцайни, ссин Нуржигьаннун – 4. Буттауссу Гьарунгу зана къавхьу­ссар дяъвилия. ХIажиоьмар тIима буттауссу зана хьуна, 1972 шинал дунияллия лавгуна».
Шяраваллил агьалинал бусайва Аьбидов МахIаммад буниял­ттунгу дакI хъинсса, дугърисса чув ивкIшиву. Колхозралссагу буллай, шяраваллил жагьилтал унгу-унгуну спортрахун машхул буллай ивкIшиву. Амма дяъвилул кьувкьуну бур муналмур кьисмат. ДяличIан дурну дур дуллай айивхьуцири ххуй-ххуйсса давурттивгу.
Халкьуннал талихIрал цIаний цалла жанну харж дурсса 96 къучагънал цIардугу чирчусса мармарчарил ула дуссар ЦIувкIрав, Совет Союзрал кIийла Виричу АхIмад-хан Султаннул гьайкалданул чIаравсса чIирай. Ватандалул цIаний жанну дуллусса уссурваврал – МахIаммад ва Гьарун Аьбидовхъал цIардугу дуссар му улттуй.